YouTube podería ser censurado (tamén) na India por albergar un vídeo que parodia a Gandhi
luns, 15 de xaneiro do 2007
Unha vez máis, o portal de vídeos en liña
YouTube está no punto de mira de colectivos ou individuos particularmente
ofendidos. Nesta ocasión, temos practicamente todo un país aldraxado, e non un
país calquera en número de habitantes: a India.
Así, YouTube corre
o risco xa de ser bloqueado en breve polas autoridades daquel país por
achegar ós usuarios imaxes non autorizadas e cargadas de polémica con relación
a Ghandi: as dun vídeo no que un individuo imitaba ó dito líder político e
espiritual nun espectáculo de nudismo.
Nas imaxes pódese ver a un humorista, caracterizado como o pai da nación india,
realizando un striptease nunha barra vertical, a xeito de bailarina dun club de
espectáculos.
A polémica xurdiu cando dúas canles do país emitiron o vídeo por
televisión, pois moitos milleiros de seguidores de Gandhi
interpretaron as imaxes como un insulto ó líder pacifista.
Agora, o Goberno hindú, ademais de pedir o peche da web, “esixe unha desculpa” por parte das canles que difundiron o vídeo da
imitación.