Código Cero - Diario Tecnolóxico de Galicia

Clausurado o curso do Centro de Formación Audiovisual da Deputación de Lugo cunha gala que rendeu homenaxe á TV dos 90

S. P. — 2026-06-16T21:58:00Z

A presidenta da Deputación de Lugo, Carmela López, clausurou este martes 16 de xuño o curso 2025-2026 do Centro de Formación Audiovisual nunha gala na que se fixo entrega dos diplomas ao alumnado da 22ª promoción do ciclo de Produción e Realización Audiovisual. A gala, á que asistiron familiares e amizades, estivo inspirada nos programas de televisión dos anos 90 e 2000 e foi organizada integramente polo alumnado de primeiro curso como parte da súa formación práctica.
“Estou convencida de que moitos dos nomes desta promoción volveremos escoitalos no futuro, en rodaxes, festivais ou mesmo nos Premios Mestre Mateo”, subliñou durante o acto a mandataria provincial, que felicitou á vintena de persoas graduadas polo esforzo e a dedicación amosados ao longo dos dous anos de formación, estendendo tamén o recoñecemento ás súas familias e ao profesorado que os acompañou.
Carmela López destacou na súa intervención que “para a Deputación de Lugo este centro é moito máis que unha escola. É un proxecto no que levamos máis de dúas décadas apostando porque cremos na formación pública, gratuíta e de calidade. Pero tamén porque cremos que o talento necesita oportunidades”.
A presidenta engadiu que “nun contexto no que proliferan as pantallas e os contidos audiovisuais, segue a ser imprescindible o talento das persoas capaces de crear proxectos que emocionen, informen e deixen pegada”. E neste sentido, animou o alumnado a confiar nas súas capacidades e a manter unha actitude activa de aprendizaxe e creación, porque “os proxectos máis importantes ás veces nacen onde menos o esperamos. O fundamental é seguir avanzando, creando e aprendendo”.
Matrícula aberta para o próximo curso
O prazo de solicitude de matrícula para o curso 2026-2027 xa está aberto. As persoas interesadas poden preinscribirse, ata o 3 de xullo, descargando o formulario na páxina web da Deputación ou recolléndoo no centro formativo. Unha vez cuberto, deberán presentalo, xunto co resto da documentación solicitada, directamente na sede en Lugo do Centro, na rúa Frei Plácido Rei Lemos.
Rematado o tempo de solicitude de admisión, o 7 de xullo publicaranse as listas provisionais de admitidos, agarda e excluídos. Do 8 ao 10 poderán presentarse as reclamacións, e o 14 de xullo sairán as listas definitivas. O prazo de matrícula ordinaria será do 15 ao 24 de xullo, e o 27 abrirase un prazo de matrícula extraordinaria ata completar todas as prazas.

O IV Premio Galego de Educación para o Desenvolvemento distingue o proxecto Talentos Inclusivos (CITIC)

S. P. — 2026-06-16T21:51:03Z


Premio a Talentos Inclusivos

A Sala Agustín Magán do compostelán Centro Sociocultural de Santa Marta acolleu hoxe a gala de entrega de galardóns do Premio Galego de Educación para o Desenvolvemento e Cidadanía Global.
Un acto que abriu a subdirectora xeral de Cooperación Exterior da Xunta, Eugenia Paz Costoya, quen destacou a importancia do premio (que conta co respaldo e o financiamento da Dirección Xeral de Relacións Exteriores e coa Unión Europea da Xunta de Galicia) e o seu “significado especial, xa que incide na xustiza global e na responsabilidade compartida”, ao tempo que constitúe, segundo explicou, “unha ferramenta moi útil e capaz de xerar sinerxías entre profesorado, centros e entidades”.
Pola súa banda, a directora da Coordinadora Galega de ONGD, Sara García Mato, cualificou o Premio Galego de Educación para o Desenvolvemento e Cidadanía Global como un éxito colectivo, no sentido de que “suma catro edicións e case oitenta proxectos presentados, todos de gran calidade, o que indica a cantidade de persoas implicadas na educación transformadora e na construción dun mundo máis xusto”.
Segundo sinalaron dende a organización destes recoñecementos, a calidade das vinte propostas presentadas a esta cuarta edición dificultou o labor do xurado (composto por seis profesionais da cooperación, o ensino e a educación para a cidadanía global) que finalmente acordou distinguir os proxectos Non sempre se nace onde se pace na categoría A (Infantil e Primaria), desenvolvido conxuntamente polo CEIP A Canosa-Rus (Coristanco) e o CEIP Xesús San Luís Romero (Carballo); Cultivando conciencias, colleitando futuros na categoría B (ESO,, Bacharelato e Formación Profesional), do IES Plurilingüe de Valga, e Talentos Inclusivos na categoría C (ensino universitario), do Centro de Investigación en Tecnoloxías da Información e das Comunicacións (CITIC) da Universidade da Coruña.
O acto celebrado esta mañá tivo como protagonistas a profesorado e alumnado galardoados, que puideron compartir en primeira persoa os contidos, procesos e obxectivos das súas propostas.
O proxecto intercentros Non sempre se nace onde se pace pon o foco, entre outras cuestións, na cultura da solidariedade e a cooperación dende unha perspectiva intercultural a través da historia ficticia de Maruxa e Coralia, dúas mulleres migrantes que chegan a Galicia dende América e sobre a que se artellan diversas actividades. Nelas participaron de xeito coordinado alumnado de Infantil e Primaria dos colexios públicos A Canosa-Rus de Coristanco e Xesús San Luís Romero de Carballo, ambos na provincia da Coruña.
Tamén sobre a interculturalidade e as aprendizaxes compartidas pivota o proxecto Cultivando conciencias, colleitando futuros, no que alumnado do Ciclo Básico de Agroxardinería e Composición Floral e do Ciclo Medio de Xardinería e Florería do IES Plurilingüe de Valga (Pontevedra) desenvolveu un proxecto inspirado nos xardíns circulares Tolou Keur de Senegal, adaptando esta idea ao contexto galego e promovendo a biodiversidade e prácticas sostibles. Contando no proceso coa participación da comunidade senegalesa da localidade.
Pola súa parte, o proxecto innovador e solidario Talentos Inclusivos achega a ciencia e a tecnoloxía dende o Centro de Investigación en Tecnoloxías da Información e das Comunicacións (CITIC) da Universidade da Coruña a alumnado non universitario. O obxectivo desta proposta é espertar vocacións STEM (siglas de Ciencia, Tecnoloxía, Enxeñaría e Matemática) e desenvolver competencias dixitais con impacto social a partir de retos reais, facilitados por persoal e usuarias de asociacións como ASPACE Coruña, entre outras.
Talentos Inclusivos é un proxecto desenvolvido polo CITIC (Centro de Investigación en Tecnoloxías da Información e as Comunicacións) da UDC (Universidade da Coruña) e ASPACE Coruña, e que conta co apoio da FECYT (Fundación Española para a Ciencia e a Tecnoloxía) do Ministerio de Ciencia, Innovación e Universidades; o Consello Social da UDC; o Concello da Coruña e a Xunta de Galicia.
O seu obxectivo é espertar vocacións tecnolóxicas entre os mozos e dar a coñecer a realidade da discapacidade a través de equipos colaborativos de traballo para resolver retos tecnolóxicos expostos por persoas con parálise cerebral.
A través deste proxecto, estudantes de secundaria e bacharelato de diversos institutos de Galicia, terán que buscar solucións tecnolóxicas a unha serie de retos que serán propostos por usuarios da entidade ASPACE Coruña, Amencer-ASPACE, APAMP e Cruz Vermella A Coruña.
De Galicia a Guatemala para coñecer a cooperación ao desenvolvemento
Ademais de diplomas para alumnado e profesorado e un distintivo para os centros deseñado polo obradoiro de xoiería Silvereira, o Premio ofrece por segundo ano unha viaxe a proxectos de cooperación internacional en Guatemala a dous profesores/as de cada proxecto gañador.
Deste xeito, seis docentes poderán coñecer de primeira man este verán o traballo da cooperación galega nun país do Sur Global seguindo a experiencia da anterior edición, na que viaxaron ao país centroamericano profesoras da Facultade de Educación da Universidade da Coruña, do IES O Couto (Ourense) -en substitución do primeiro premio na súa categoría, o IES Luís Seoane (Pontevedra)- e do CEIP López Ferreiro (Compostela).
O Premio Galego de Educación para o Desenvolvemento e Cidadanía Global conta co respaldo e co financiamento da Dirección Xeral de Relacións Exteriores e coa Unión Europea da Xunta de Galicia. Nas súas catro edicións recibiu un total de 77 propostas de educación para a transformación social.

O Web Engines Hackfest inicia as súas sesións colaborativas

Redacción — 2026-06-16T20:03:50Z

A segunda xornada do Web Engines Hackfest converteu este martes o PALEXCO nun grande laboratorio de colaboración arredor das tecnoloxías que sustentan a web moderna. Tras unha primeira xornada centrada nos estándares, a accesibilidade e a gobernanza da plataforma web, o protagonismo recaeu desta vez sobre WPE WebKit, o proxecto impulsado por Igalia para navegadores integrados, e sobre unha intensa actividade de grupos de traballo especializados.
A mañá estivo dedicada a unha pista temática específica sobre WPE WebKit, unha das tecnoloxías de código aberto máis relevantes desenvolvidas desde Galicia para dispositivos conectados e sistemas embebidos. As sesións abordaron a evolución da nova API WPEPlatform, destinada a simplificar o desenvolvemento de navegadores integrados en dispositivos como televisores, sistemas industriais ou equipos baseados en Raspberry Pi. Os asistentes puideron coñecer tamén os avances na integración de Skia como sistema de composición gráfica, distintas técnicas para reducir o consumo da GPU e melloras de rendemento obtidas mediante optimización guiada por perfís (PGO).
Outro dos asuntos tratados foi a estratexia de control de calidade do proxecto, cunha presentación centrada nos mecanismos empregados para detectar regresións antes de que cheguen aos usuarios finais. A programación completouse cunha sesión dedicada á adaptación da plataforma WPE ao ecosistema Android, ampliando así as posibilidades de uso desta tecnoloxía en novos dispositivos e contornas.
As actividades da xornada desenvolvéronse en sesións técnicas de formato aberto, unha das características distintivas do encontro, que tamén permiten a asistencia en remoto a través de Jitsi.
Os participantes distribuíronse en grupos de traballo centrados en cuestións como o impacto da intelixencia artificial sobre a web, os desafíos derivados do crecente consumo automatizado de contidos por parte de sistemas de IA, a evolución da especificación AsyncContext ou o desenvolvemento de ferramentas de depuración para o navegador Servo.
A programación concluirá este mércores cunha nova xornada de sesións colaborativas e reunións técnicas nas que se seguirán definindo aspectos clave do futuro dos navegadores e das tecnoloxías web.

Qualcomm presenta avances no ámbito das lentes con IA

Marcus Fernández — 2026-06-16T19:30:00Z

A finais do ano pasado Google presentou Project Aura, lentes desenvolvidas en colaboración con Xreal, que integran pantallas transparentes cun campo de visión de 70 graos que buscan superpor contidos sobre a realidade e que hoxe, no marco da Augmented World Expo, anunciaron que serían as primeiras lentes con cable en funcionar con Android XR e as plataforma Snapdragon Reality Elite.
Esta nova plataforma de Qualcomm será o motor dunha nova xeración de dispositivos de computación espacial, que facilitarán unha impresionante inmersión visual, unha integracións profunda da IA xenerativa integrada no dispositivo e unha eficiencia enerxética que darán pé á creación de produtos de realidade estendida máis potentes e lixeiros.
Pero as lentes Xreal Aura aínda tardarán en ser unha realidade comercial, confiándose en que saian á venda no outono, a un prezo inferior a 1.500 dólares (antes de impostos), abríndose xa o proceso de reserva para poder facerse cunha das primeiras unidades deste produto prometedor, pero claramente orientado a desenvolvedores e early adopters.
De cara a un público máis xeral Qualcomm presentou tamén Snapdragon START (Scalable Turnkey AI-Ready Toolkit), unha plataforma modular para levar as capacidades de computación e de intelixencia persoal a dispositivos persoais, xa que estes procesadores poden integrarse nunha peza de só 42,50 x 8.90 x 3,08 milímetros.
Falamos dunha tecnoloxía compacta dabondo para a súa integración nunhas lentes e, de feito, Qualcomm xa prevé a súa instalación en varios formatos das mesmas: sen pantalla, con pantalla LCOS para un ollo e con pantalla uLED para ambos ollos.
Para facer posible a integración desta tecnoloxía xa chegaron a acordos con varias marcas de lentes tradicionais, polo que poderiamos estar ante o comezo dunha explosión de produtos orientados a achegar unha relación cada vez máis estreita e persoal coa intelixencia artificial.

: A plataforma Snapdragon Start posibilitará unha nova xeración de lentes con IA

A IA e os seus retos centran o II Encontro de Equipos TIC das comunidades autónomas

Redacción — 2026-06-16T19:06:57Z

A intelixencia artificial, a súa gobernanza e o seu impacto nas organizacións públicas foron os eixos centrais do II Encontro de Equipos TIC das comunidades autónomas, celebrado este martes en Madrid no marco do Foro de Dixitalización das Comunidades Autónomas.
A Xunta de Galicia participou a través do director da AMTEGA, Damián Rey, acompañado por responsables da Xerencia e das áreas de Administración Dixital, Infraestruturas e Seguridade, Solucións Tecnolóxicas Sectoriais, Transformación Dixital da Facenda Pública e da Oficina de Apoio Estratéxico e Planificación.
Ao longo da xornada abordáronse cuestións estratéxicas relacionadas coa aplicación da IA na Administración pública, os riscos asociados ao seu uso e as vías de cooperación entre comunidades autónomas. Tamén se analizaron os modelos de gobernanza desta tecnoloxía e a súa incidencia na organización do traballo e na xestión do talento.
O programa desenvolveuse a través de distintas mesas de traballo especializadas nas que se trataron aspectos como o uso da IA nos postos de traballo, a súa incorporación aos procesos de desenvolvemento e operacións e as súas aplicacións no ámbito sanitario. Ademais, debatéronse os desafíos que a intelixencia artificial formula en materia de ciberseguridade e a protección dos propios sistemas baseados nesta tecnoloxía.
A xornada concluíu cun plenario no que se compartiron as principais conclusións extraídas das mesas de traballo. Nel destacáronse os retos e oportunidades asociados á integración da intelixencia artificial nas administracións públicas, así como a importancia de seguir fortalecendo a colaboración entre territorios.

Escolares de Verín, Cerceda, A Coruña e Vilanova de Arousa, galardoados en Nós Tamén Creamos

S. P. — 2026-06-16T16:00:00Z

O conselleiro de Cultura, Lingua e Xuventude, José López Campos, e o secretario xeral da Lingua, Valentín García, felicitaron aos escolares galardoados nos premios Nós Tamén Creamos 2025-2026.
Fixérono na entrega de premios ás mellores curtametraxes do certame impulsado polas Consellerías de Cultura, Lingua e Xuventude e de Educación, Ciencia, Universidades e Formación Profesional para promover o uso da lingua galega a través de curtas de animación.
Neste marco, o conselleiro e o secretario xeral, acompañados polo director xeral de Centros e Recursos Humanos, Jesús Álvarez, agradeceron o esforzo de todo o alumnado dos 18 centros participantes e gabaron o seu enorme talento e creatividade.
En total foron galardoados oito centros educativos. En concreto, no 2º ciclo de Educación Infantil resultaron gañadores o Colexio Princesa de España, de Verín (Ourense), e o accésit foi para o Colexio Ponte Carreira de Frades, de A Coruña. Pola súa banda, no nivel de 1º e 2º de Educación Primaria, foi galardoado o Colexio Celso Emilio Ferreiro, de Cerceda (A Coruña), e o Colexio de Guillarei de Tui (Pontevedra) recolleu o accésit, mentres que na categoría de 3º e 4º de Primaria levou o premio o Colexio de Zalaeta, da Coruña, e o accésit foi para o Colexio O Vicedo, do Vicedo (Lugo). Finalmente, na categoría de 5º e 6º de Primaria resultou gañador o Colexio de Viñagrande-Deiro, de Vilanova de Arousa (Pontevedra), e o accésit foi para o Colexio do Feal de Narón (A Coruña).
Todas as curtas premiadas e as do resto dos centros escolares participantes poderanse visualizar no Portal da Lingua Galega, na súa canle de Youtube e, ademais, na sección infantil e na aplicación Xabarín da Compañía de Radio-Televisión de Galicia.
O certame é convocado cada no pola Secretaría Xeral da Lingua e a Dirección Xeral de Innovación Educativa, en colaboración coa Corporación de Servizos Audiovisuais de Galicia. Trátase, segundo explican as entidades organizadoras, “dunha iniciativa que busca promover unha imaxe positiva e actual da lingua galega, favorecer o seu uso e aprendizaxe en novos ámbitos e formatos e dar a coñecer as opcións de ocio en galego que lle ofrece á cativada a sección infantil da páxina web da Televisión en Galicia”.
Inclúense catro categorías que van dende o segundo ciclo de Educación Infantil ata sexto de Educación Primaria e para as que se outorga cadanseu premio e, se así o decide a Comisión de Selección, un accésit para cada categoría.
Entre os requisitos dos traballos, está que deben ser unha adaptación cinematográfica de animación coa técnica stop motion dalgunhas das obras literarias que se lles facilitaron aos centros participantes, ter calidade DVD e unha duración máxima de 5 minutos. Ademais, deben incluír un espazo de créditos finais no que recollerán o nome das persoas que participaron na súa creación.

Italia investiga a Apple por un posible incumprimento da DMA

Redacción — 2026-06-16T15:30:00Z

A Autoridade Garante da Competencia e do Mercado de Italia (AGCM) anunciou a apertura dunha investigación formal contra Apple ao considerar que podería estar incumprindo as obrigas de interoperabilidade recollidas na Lei de Mercados Dixitais (DMA) da Unión Europea. O procedemento céntrase na relación entre os sistemas operativos iOS e iPadOS e os servizos de almacenamento na nube alternativos a iCloud.
Segundo explicou o organismo italiano, existen indicios de que os provedores de servizos de nube para consumidores non dispoñen do mesmo acceso ás funcións de hardware e software que Apple reserva para iCloud. Entre os exemplos citados figura a imposibilidade de que servizos competidores realicen copias de seguridade completas dun iPhone ou dun iPad, unha capacidade que si está dispoñible para a plataforma da propia Apple.
A investigación constitúe a primeira vez que a autoridade italiana exerce as competencias que lle outorga o artigo 38.7 da DMA para realizar investigacións preliminares en apoio da Comisión Europea. O expediente foi aberto en estreita cooperación con Bruxelas e as conclusións serán remitidas posteriormente á Comisión, que continúa a ser a única autoridade con capacidade para facer cumprir formalmente a normativa.

O acceso ás funcións reservadas para iCloud

O documento aprobado pola AGCM detalla que iCloud non só permite almacenar fotografías, vídeos ou documentos, senón tamén realizar copias integrais dos dispositivos, incluíndo aplicacións, configuracións do sistema, preferencias de privacidade, mensaxes e outros datos necesarios para restaurar completamente un terminal ou configurar un novo dispositivo.
A denuncia que deu orixe á investigación sostén que Apple impide aos servizos rivais acceder ás interfaces de programación (API) necesarias para ofrecer esas mesmas prestacións. Como consecuencia, os usuarios de iPhone e iPad veríanse empuxados a empregar iCloud, especialmente cando necesitan unha copia de seguridade completa do dispositivo.
A autoridade italiana tamén apunta a posibles limitacións noutras funcións avanzadas. Entre elas figura a sincronización en segundo plano, que permite actualizar e procesar información sen intervención directa do usuario, unha capacidade que podería estar dispoñible para iCloud pero non para alternativas competidoras.

A interpretación da DMA

O artigo 6.7 da DMA obriga os chamados gatekeepers a garantir que terceiros poidan interoperar de maneira efectiva e gratuíta coas mesmas funcións de hardware e software que utilizan os servizos propios da plataforma. Apple foi designada como gatekeeper para iOS en setembro de 2023 e para iPadOS en abril de 2024.
A AGCM lembra que a Comisión Europea xa publicou en marzo de 2025 varias decisións de especificación nas que aclaraba que a interoperabilidade debe ser efectiva na práctica, sen obstáculos innecesarios e en condicións equivalentes ás das que goza o propio gatekeeper. Non é suficiente ofrecer un acceso parcial ou de menor calidade.
Segundo a análise preliminar do organismo italiano, os provedores alternativos de almacenamento na nube poderían non estar recibindo ese trato equivalente, o que limitaría a súa capacidade para competir en igualdade de condicións con iCloud.

Posibles repercusións

A investigación non implica por agora unha conclusión sobre a existencia dunha infracción, pero a AGCM considera que hai elementos suficientes para examinar se Apple está incumprindo as obrigas de interoperabilidade da DMA.
O procedemento deberá concluír antes do 31 de marzo de 2027. Durante este período, Apple poderá presentar alegacións e participar nas audiencias previstas polo organismo regulador.
O caso resulta especialmente relevante porque aborda unha cuestión que leva anos xerando críticas entre desenvolvedores e provedores de servizos na nube: a dificultade para ofrecer en iPhone e iPad unha experiencia equivalente á de iCloud. Se a investigación confirma as sospeitas da autoridade italiana, podería abrir a porta a novas esixencias regulatorias para que Apple facilite o acceso a funcións críticas dos seus sistemas operativos e reduza as vantaxes competitivas do seu propio servizo de nube.

O Plan Director formou en redes seguras a máis de mil persoas da comunidade educativa de Boiro

S. P. — 2026-06-16T15:00:00Z

Este mañá celebrouse no Consistorio de Boiro a Xunta Local de Seguridade do Concello, unha xeira de traballo na que participaron o subdelegado do Goberno na Coruña, Julio Abalde, o alcalde, José Ramón Romero, e os representantes dos corpos policiais con presenza no termo municipal: Policía Local e Garda Civil. Na xuntanza foron analizados os datos de seguridade correspondentes ao último ano e coordináronse os dispositivos e medios dispoñíbeis para afrontar a época estival, poñendo o foco nas multitudinarias celebracións e eventos do verán que acubilla Boiro cada ano.
Durante o encontro constatouse que Boiro mantén unha taxa de criminalidade inferior á media estatal, con 45 delitos por cada mil habitantes. Ademais, os datos do primeiro cuadrimestre de 2026 reflicten “unha evolución positiva, cun descenso considerábel tanto dos delitos como das infraccións penais rexistradas no concello”, sinalaron.
Julio Abalde destacou que estes resultados “reflicten o bo traballo desenvolvido pola Garda Civil e a estreita colaboración co Concello de Boiro para garantir a seguridade da cidadanía”.
Durante a reunión tamén se presentaron os resultados do Plan Director para a Convivencia e Mellora da Seguridade nos Centros Educativos e as súas Contornas, unha iniciativa do Ministerio do Interior desenvolvida en Boiro pola Garda Civil.
No último curso participaron seis centros educativos do municipio, cun total de 1.008 persoas da comunidade educativa entre alumnado, profesorado e familias. En total realizáronse 48 actividades formativas e de sensibilización, das que 14 estiveron centradas nas Tecnoloxías da Información e a Comunicación (TIC), Internet e ciberseguridade; outras 14 abordaron cuestións relacionadas co acoso escolar e o ciberacoso; mentres que o resto trataron aspectos como o consumo de drogas e alcohol, as adiccións comportamentais vinculadas ás apostas e aos videoxogos, a violencia de xénero e a violencia e o maltrato no ámbito familiar.
Julio Abalde aproveitou a súa intervención para poñer en valor os resultados acadados polo Plan Director en toda a provincia da Coruña durante 2025. Ao longo do ano participaron 349 centros educativos, o que representa o 75% dos existentes na provincia e supón un incremento do 5% respecto ao exercicio anterior. Ademais, máis de 49.000 persoas tomaron parte nas actividades impulsadas pola Policía Nacional e a Garda Civil.
“O Plan Director é unha ferramenta fundamental para previr situacións de risco e promover valores de convivencia, respecto e uso responsable das novas tecnoloxías entre a mocidade”, destacou o subdelegado.
Outro dos asuntos abordados na Xunta Local de Seguridade foi a coordinación das actuacións en materia de violencia de xénero. O Concello de Boiro está integrado no Sistema VioGén, impulsado polo Goberno de España para o seguimento e protección das vítimas.
No marco desta política pública, o Concello de Boiro recibiu desde 2018 un total de 63.228 euros procedentes dos Fondos do Pacto de Estado contra a Violencia de Xénero. Desa contía, 14.655 euros corresponden á asignación recibida no ano 2025 para o desenvolvemento de actuacións de prevención e sensibilización.

A Aula CeMIT de Guitiriz organiza varios obradoiros tecnolóxicos para a cativada no mes de xullo

S. P. — 2026-06-16T14:30:00Z

A Aula CeMIT do Concello de Guitiriz desenvolverá durante o mes de xullo un programa de actividades dirixido á cativada co obxectivo de fomentar un uso creativo, consciente e crítico das novas tecnoloxías.
A programación inclúe varios obradoiros gratuítos con prazas limitadas, que se cubrirán por rigorosa orde de inscrición. Terán preferencia os nenos e nenas con idades comprendidas entre os 8 e os 12 anos. O prazo de inscrición abrirase o vindeiro luns, 15 de xuño, e permanecerá aberto ata o 26 de xuño.
A primeira das propostas será o obradoiro Robótica con micro:bit, que se celebrará os días 8, 9 e 10 de xullo, permitindo aos participantes iniciarse na programación e na creación de proxectos tecnolóxicos mediante estas populares placas educativas.
A continuación, os días 15, 16 e 17 de xullo, desenvolverase o obradoiro Misión Lentes de RV: Unha nova dimensión, unha actividade centrada na realidade virtual e nas súas posibilidades educativas e creativas.
Os días 22, 23 e 24 de xullo celebrarase o obradoiro Aventura dixital creando con Canva e Genially, no que a cativada poderá descubrir ferramentas para a creación de contidos visuais e presentacións interactivas.
Estes tres primeiros obradoiros celebraranse en horario de 10:30 a 12:30 horas.
Por último, a Aula CeMIT acollerá a proposta Casa domótica accesible, que contará con dúas quendas diferenciadas: unha o 28 de xullo, destinada á cativada de 9 a 11 anos, e outra o 30 de xullo, dirixida á mocidade de 12 a 16 anos. Ambas quendas serán en horario de 10:00 a 14:00 horas.
As persoas interesadas poderán formalizar a súa inscrición na Biblioteca Pública Municipal, na Aula CeMIT de Guitiriz ou a través do teléfono 982 37 00 62, onde tamén se poderá obter información adicional sobre cada unha das actividades.

Lenovo presenta unha tableta dotada cun potente altofalante

Redacción — 2026-06-16T14:00:00Z

Lenovo deu a coñecer unha nova versión da súa tablet Tab Plus, centrada de novo no apartado de audio e cun redeseño do módulo traseiro de altofalantes. O modelo anterior xa destacaba por integrar oito altofalantes nunha protuberancia posterior de 13,58 milímetros, mentres que esta nova xeración incrementa a aposta ata nove altofalantes, o que obriga a un módulo circular que acada os 22,7 milímetros de grosor.
Esta peza traseira non só concentra o sistema de son, senón que incorpora tamén un soporte despregable capaz de xirar 360 graos, pensado para facilitar o uso en posición vertical e horizontal sen necesidade de accesorios adicionais. A compañía mantén así a idea dunha tableta orientada ao consumo multimedia e ao uso como dispositivo de audio autónomo.
O sistema de son está optimizado con tecnoloxía Dolby Atmos e combina tweeters e woofers para reforzar especialmente os graves. Inclúe ademais distintos modos de audio con opcións de ecualización orientadas a música e contido audiovisual, e permite empregarse como altofalante Bluetooth independente para reproducir son enviado desde outros dispositivos.
A nivel técnico, a tableta incorpora unha pantalla LCD de 12,1 polgadas con taxa de refresco de 120 Hz e resolución é de 2.560 x 1.600 píxeles. A batería é de 10.200 mAh, cunha autonomía estimada de ata 15 horas de reprodución de vídeo en plataformas como YouTube. Funciona cun procesador MediaTek Dimensity 7400 de oito núcleos, con configuracións que van de 6 a 12 GB de memoria RAM e opcións de almacenamento entre 128 e 256 GB, ampliables mediante tarxetas microSD de ata 2 TB. A cámara frontal é de 8 megapíxeles, mentres que a traseira é de 13 megapíxeles. Funciona con Android 16 e promete dous anos de actualizacións do sistema operativo, ademais de catro anos de parches de seguridade.
A súa dispoñibilidade e prezos aínda non está moi clara, pero o produto xa leva días listado en Google cun prezo de 429 euros para a súa versión con 8 GB de RAM e 128 GB de almacenamento.

Prevén captar máis dun cento de científicos internacionais cos novos programas do plan de I+G+i

Redacción — 2026-06-16T12:00:00Z

A Xunta prevé incorporar máis dun cento de investigadores de proxección internacional a través dos novos programas incluídos no Plan galego de investigación e innovación 2025-2027. Así o avanzou no Parlamento o conselleiro de Educación, Ciencia, Universidades e Formación Profesional, Román Rodríguez, durante unha comparecencia no Pleno na que fixo balance dos avances rexistrados na metade da execución desta folla de ruta.
Os datos presentados evidencian progresos na captación de talento investigador de alto nivel para os centros científicos galegos, un dos obxectivos estratéxicos da marca Galicia Calidade. Entre as iniciativas previstas figura Talentgal, programa que permitirá a chegada de 40 profesionais e que xa ten aberta a convocatoria correspondente aos primeiros 20 contratos.
A Fundación Galtia, concibida como o principal instrumento impulsado ata agora para atraer talento científico, xa está constituída e avanza nos preparativos da súa primeira convocatoria, prevista para os próximos meses. O obxectivo é alcanzar progresivamente a incorporación de 30 investigadores de prestixio internacional. Tamén se reforzará o programa Oportunius, dirixido a persoas beneficiarias das prestixiosas axudas do Consello Europeo de Investigación (ERC), que incorporará cinco novos investigadores en 2027. Ademais, o Executivo galego prevé lanzar ese mesmo ano a primeira edición do Programa Retorna Talento I+G+i, destinado a facilitar o regreso de científicos galegos que desenvolven a súa carreira no exterior.
Segundo destacou Román Rodríguez, Galicia está a incrementar a captación de recursos, reforzando o seu ecosistema científico e tecnolóxico e consolidando posicións en ámbitos nos que ata hai poucos anos resultaba difícil imaxinar un papel protagonista. O conselleiro sostivo que a comunidade é cada vez máis atractiva para investigar, innovar, emprender e desenvolver proxectos de alto valor engadido.

Aposta decidida pola IA e cuántica

A combinación entre intelixencia artificial e biotecnoloxía materializarase na futura Fábrica Europea de IA 1HealthAI, centrada nunha abordaxe integral da saúde humana, animal e ambiental. Trátase dunha das 19 infraestruturas deste tipo previstas en toda Europa. Román Rodríguez explicou que xa está a iniciarse a contratación dos primeiros profesionais coa intención de que a instalación estea plenamente operativa en 2028.
Galicia tamén deu pasos significativos no desenvolvemento das tecnoloxías cuánticas. Entre Santiago e Vigo xa funciona a liña de comunicacións ultrasexuras máis longa de España, cun percorrido de 120 quilómetros, que se ampliará ata Portugal. Esta conexión integrarase nunha rede europea de comunicacións de máxima seguridade.
O CESGA afronta igualmente o maior investimento da súa historia, cunha dotación de 56 millóns de euros. O plan inclúe a incorporación dun novo supercomputador que multiplicará por sete a capacidade actual e a instalación de dous computadores cuánticos no novo edificio da Sionlla, previsto para entrar en funcionamento a finais deste ano.

Nova de Lei de Ciencia e innovación

Román Rodríguez salientou que os resultados obtidos ata o momento están a ser «extraordinarios» e lembrou que o Plan galego de investigación e innovación 2025-2027 mobiliza o maior investimento realizado ata agora en I+G+i, cun total de 1.310 millóns de euros. O orzamento deste exercicio incrementouse un 9 % respecto ao ano anterior e duplica o destinado hai cinco anos.
O conselleiro tamén abordou os traballos para a futura Lei de Ciencia e Innovación de Galicia, que o Goberno autonómico aspira a que entre en vigor en 2027. A previsión é que o texto articulado poida publicarse e someterse a consulta pública durante o outono.
A nova normativa actualizará o marco legal para reforzar a carreira investigadora, consolidar as políticas de captación de talento e integrar o papel da Fundación Galtia. Tamén incorporará instrumentos orientados á transferencia de coñecemento, á valorización dos resultados da investigación, ao impulso de empresas de base científica e tecnolóxica e ao fortalecemento da colaboración público-privada. Ademais, promoverá unha maior coordinación entre os distintos axentes do ecosistema científico e facilitará a extensión da innovación ao conxunto do territorio mediante os plans locais de I+D+i, unha iniciativa pioneira en España.

Fabricación en Galicia dun prototipo para o CERN

Outro dos proxectos de maior proxección internacional nos que Galicia aspira a desempeñar un papel relevante está vinculado ao futuro colisionador de partículas que o CERN prevé construír na fronteira entre Francia e Suíza, considerado unha das grandes infraestruturas científicas das próximas décadas.
Actualmente permanece aberta a consulta preliminar ao mercado para que as empresas interesadas poidan participar no desenvolvemento do prototipo. Posteriormente tramitarase unha compra pública precomercial grazas á colaboración entre a Xunta, o Centro para o Desenvolvemento Tecnolóxico e a Innovación (CDTI) e o Instituto Galego de Física de Altas Enerxías (IGFAE). Se existe unha resposta positiva do sector, a previsión é que a construción do prototipo desde Galicia poida iniciarse ao longo de 2027.

Presentan unhas lentes con Linux, pantalla e batería intercambiable

Redacción — 2026-06-16T11:44:30Z

A empresa estadounidense Raven Resonance presentou oficialmente as súas novas lentes Raven Prism durante a feira AWE 2026, que se celebra entre o 16 e o 18 de xuño en Long Beach (California). O dispositivo, que definen como un «ordenador ambiental», busca diferenciarse da crecente oferta de lentes conectadas mediante unha combinación pouco habitual de autonomía, privacidade e apertura para desenvolvedores.
O elemento máis rechamante de Raven Prism é o seu sistema de baterías intercambiables en quente, unha solución que permite substituír a batería sen apagar o dispositivo nin interromper as aplicacións en execución. Este mecanismo pretende resolver unha das limitacións máis frecuentes deste tipo de dispositivos: a autonomía durante xornadas completas de uso.
As lentes funcionan con RavenOS, un sistema operativo propio baseado en Linux de 64 bits. Incorporan unha pantalla LCoS a cor proxectada mediante unha guía de ondas monocular situada diante do ollo dereito, ademais dun sistema integrado de seguimento ocular que permite interactuar coa interface sen necesidade de empregar as mans.
O equipamento complétase cunha cámara integrada que incorpora un indicador luminoso visible cando está activa e tamén unha tapa física para bloquear a captación de imaxes. A privacidade constitúe un dos principais argumentos do produto: os datos do control ocular procésanse localmente e ningunha información do usuario abandona o dispositivo sen consentimento explícito. Tamén se indica que as funcións de intelixencia artificial están deseñadas para executarse localmente sempre que sexa posible, reducindo a dependencia de servizos na nube.
A diferenza doutras lentes intelixentes que dependen dun teléfono móbil para boa parte do procesamento, Raven Prism funciona de maneira autónoma grazas a un procesador ARM de catro núcleos e 64 bits integrado no propio dispositivo. Haberá varias configuracións de memoria RAM e compatibilidade nativa con aplicacións Linux ARM64, incluíndo acceso mediante SSH.
Esta orientación cara á apertura tamén se reflicte no software. O dispositivo prevese que chegue ao mercado con máis de 25 aplicacións preinstaladas e acceso de baixo nivel ao sistema operativo. O obxectivo é atraer desenvolvedores, creadores, profesionais técnicos e clientes empresariais que busquen unha plataforma máis flexible que as alternativas dominantes.
Thomas Suarez, cofundador e director executivo de Raven Resonance, sostén que a informática persoal está a evolucionar cara a modelos nos que a tecnoloxía permanece dispoñible de forma constante pero discreta. Nesa liña, define Raven Prism como «un potente ordenador Linux controlado coa vista e centrado na privacidade que adopta a forma dunhas lentes».
O lanzamento comercial está previsto para finais de 2026. Polo momento non se comunicaron detalles sobre o prezo, a dispoñibilidade nin os programas específicos para desenvolvedores.

Vídeo no que dan conta do potencial das futuras lentes de Raven Resonance

Threads supera os 500 millóns de usuarios activos

Redacción — 2026-06-16T11:19:53Z

: Threads celebra o incremento de usuarios con novas funcións

Meta anunciou que Threads alcanzou os 500 millóns de usuarios activos mensuais, un fito que chega apenas tres anos despois do lanzamento da plataforma e que confirma o seu rápido crecemento dentro do segmento das redes sociais centradas na conversa pública. O anuncio chega menos dun ano despois de que Threads superase a barreira dos 400 millóns de usuarios activos mensuais.
Atribúen boa parte deste avance ás comunidades temáticas, unha funcionalidade introducida o ano pasado que permite agrupar conversas arredor de intereses concretos. Segundo Meta, estas comunidades convertéronse nun dos elementos de maior crecemento da plataforma, polo que agora abandonan a fase beta e reciben unha serie de melloras demandadas polos usuarios.
Entre as novidades destaca un novo centro de comunidades accesible desde o menú principal da aplicación, que facilitará localizar e cambiar entre os distintos grupos. Tamén se incorporan iconas propias para cada comunidade, co obxectivo de dotalas dunha identidade visual diferenciada.
A plataforma introducirá ademais indicadores de progreso para mostrar cando un tema está preto de converterse nunha comunidade oficial, así como un programa ampliado de campións da comunidade destinado a recoñecer os usuarios máis activos. As comunidades tamén gañarán unha dimensión máis local grazas á incorporación inicial de etiquetas en idiomas nativos para Xapón, Corea do Sur e Taiwán.
Meta avanzou igualmente que nas vindeiras semanas ampliará a dispoñibilidade dos chats en directo (Live Chats) a máis comunidades. Estas conversas poderán contar con varios anfitrións e permitirán citar momentos concretos directamente nas publicacións do usuario.

Máis control sobre o algoritmo

A segunda gran novidade anunciada é Your Algo (o teu algoritmo), unha ferramenta que complementa a función Dear Algo presentada a comezos deste ano. Mentres Dear Algo permitía influír nas recomendacións mediante publicacións públicas, Your Algo ofrece un mecanismo privado para indicar á plataforma que tipo de contidos ou conversas se desexa ver con máis ou menos frecuencia.
Os usuarios poderán especificar os temas que lles interesan e establecer durante canto tempo terá efecto a modificación do algoritmo: un, tres ou sete días. As preferencias configuradas só serán visibles para o propio usuario e administraranse desde un panel unificado xunto con Dear Algo.
A despregadura inicial de Your Algo comeza nos Estados Unidos, Canadá, Reino Unido, Australia e Nova Zelandia.

Vitae achéganos a 6ª edición do seu curso sobre como crear ferramentas profesionais con IA

S. P. — 2026-06-16T10:15:00Z

Xuño comezou a tope para Vitae Consultores en materia formativa e en materia transformadora: na primeira quincena (os días 9, 11 e 15) celebrouse a 5ª edición do curso Programación de Aplicacións Profesionais con IA, de 9 horas de duración, e agora na segunda metade do mes chega a sexta edición do mesmo. Desenvolverase os días 22, 23 e 25. Será unha nova oportunidade para coñecermos os detalles dunha tecnoloxía que pode ser de moita utilidade na construción de novas ferramentas informáticas: a IA.
En concreto, trátase dunha formación que xorde directamente do contexto no que estamos a vivir: un contexto no que a IA transformou profundamente a forma en que se desenvolve software e que nos ofrece un panorama no que programar xa non consiste só en escribir código, senón en dirixir, supervisar e validar procesos nos que a intelixencia artificial participa activamente.
“Este cambio de paradigma”, explica Vitae, “esixe novas habilidades, novos criterios e unha comprensión clara de como integrar a IA de forma produtiva e responsable no ciclo completo de desenvolvemento”.
Enfoque práctico
Este curso propón un enfoque práctico e realista da programación asistida por IA. Ao longo de 9 horas, o alumnado desenvolverá un proxecto sinxelo de principio a fin, utilizando ferramentas de IA non como un substituto do desenvolvedor, senón como un acelerador da análise, o deseño, a posta en marcha, o testing e documentación.
Ademais, adestrarase ao desenvolvedor no seu novo rol como responsable do proceso: formulando prompts efectivos, avaliando a calidade do código xerado, detectando erros ou riscos e tomando decisións técnicas informadas, evitando a dependencia cega das ferramentas de IA.
Traballarase con modelos de IA amplamente utilizados na industria (como ChatGPT, Gemini e Claude), así como con IDEs e asistentes modernos (Cursor, Windsurf, Antigravity, GitHub Copilot), integrándoos nun fluxo de traballo profesional baseado en control de versións, planificación e boas prácticas.
Ao finalizar o curso, os asistentes serán capaces de adquirir unha metodoloxía práctica e transferible para programar con intelixencia artificial; desenvolver a capacidade de dirixir, supervisar e validar o traballo xerado pola IA; e mellorar a produtividade e calidade do desenvolvemento mediante ferramentas de IA usadas profesionalmente.
Este curso terá unha duración de 9 horas. Gravaranse as sesións para poder consultalas de forma ilimitada unha vez finalizado o curso.
A persoa encargada de impartir os contidos será Jorge González, enxeñeiro Técnico Industrial na especialidade de Electrónica, con 25 anos de experiencia como analista programador e máis de 20 anos como formador de tecnoloxías web e de mobilidade. As tecnoloxías que domina Jorge son HTML5, PHP, JavaScript, React, NextJS, Angular, IONIC, Drupal, Symfony, Wordpress, Freeswitch, etc...
Na súa faceta de formador estivo sempre ligada á súa experiencia profesional. Entre as empresas e organismos que asesorou ou formou atópanse Google, LinkedIn, FC Barcelona, La Caixa, Nike, Cola Cao, Pronovias, Volkswagen, Capgemini, Grupo Antolín, Gas Natural, Indra, Deloitte, La Voz de Galicia, Plexus, Disashop, Softtek, Teimas, Marine Instruments, Clúster TIC Galicia, etc.

725 escolares de Lugo recibiron formación en ciberseguridade de mans da Policía Nacional

S. P. — 2026-06-16T10:00:00Z

A subdelegada do Goberno en Lugo, Olimpia López, participou este martes 16 de xuño no acto de entrega dos carnés de Ciberexpert@ no CEIP A Ponte, acompañada polo formador da Policía Nacional Iván García e a inspectora xefe Sonia Aparicio. Un total de 23 alumnos e alumnas de 6º de Primaria reciben este recoñecemento tras completar o programa, dentro do Plan Director para a convivencia e a mellora da seguridade nos centros educativos e as súas contornas.
Este acto de entrega serviu para facer balance do curso 2025-26, no que 725 escolares de Lugo recibiron formación en ciberseguridade grazas ao programa Ciberexpert@, desenvolvido pola delegación de Participación Cidadá da Comisaría Provincial da Policía Nacional de Lugo en colaboración coa Subdelegación do Goberno. En concreto, dezaoito centros da cidade participaron na actividade durante este curso: “Esta formación chega cada ano a máis alumnado e consolídase como unha iniciativa con gran acollida entre os centros escolares”, destacou a subdelegada, engadindo que “a seguridade dixital da infancia e a mocidade é un reto colectivo, e dende o Goberno de España apostamos por formar ás novas xeracións no uso seguro de Internet e das redes sociais”.
Olimpia López agradeceu o compromiso dos centros participantes e do equipo da Policía Nacional que lidera o programa.
Ao longo de varias sesións en cada grupo, os axentes traballaron co alumnado cuestións como a navegación segura, a xestión da privacidade en liña e fóra da Rede, o uso responsábel das redes sociais e a prevención fronte aos riscos das Tecnoloxías da Relación, Información e Comunicación (TRIC).
“Este programa demostra que a prevención e a formación son as mellores ferramentas para protexer á infancia no entorno dixital”, subliñou a subdelegada. “As familias, o profesorado e, sobre todo, o alumnado, transmítennos o seu interese por seguir aprendendo sobre ciberseguridade. Esa resposta é a mellor motivación para continuar con esta iniciativa o vindeiro curso”, engadiu.
A xornada deste 16 de xuño pecha un curso no que a educación en valores e competencias dixitais tivo un papel protagonista nas aulas lucenses, da man dunha iniciativa que busca dar ferramentas aos menores fronte aos desafíos do mundo dixital.

O novo videoxogo galego Renegade Jammer, finalista nos II Premios Iris Games

S. P. — 2026-06-16T09:40:00Z

O novo videoxogo Renegade Jammer, un título nado como traballo final do mestrado en Deseño, Desenvolvemento e Comercialización de Videoxogos (impartido na Politécnica de Ferrol, UDC), vén de ser seleccionado como finalista, na categoría de Mellor Videoxogo de Centros Formativos, nos II Premios Iris Games que promove a Academia de Televisión y de las Ciencias y Artes del Audiovisual, o Polo Nacional de Contenidos Digitales de Málaga e a Agencia Digital de Andalucía.
Este xogo, deseñado polo estudo Team Kaulu, competirá con El desgarro, do centro Mercedarias Granada FP, con Not My War de 24-Pack Studios, desenvolvido na U-tad de Madrid, e con Tiris, de Cremaet Studios, da ESAT Valencia. O nome do título gañador coñecerase, o vindeiro 3 de xullo, durante a gala que terá lugar no Palacio de Ferias e Congresos de Mágala, no marco do Andalucía Play Fest.
Tal e como indican desde a organización, nesta segunda edición dos Premios Iris Games presentáronse un total de 288 candidaturas de 32 provincias españolas e de 16 países. Finalmente, foron 36 os xogos seleccionados como finalistas nas categorías Mellor Videoxogo PC/Consola, Mellor Videoxogo Móbil, Mellor Videoxogo Narrativo, Mellor Videoxogo Accesible, Mellor Videoxogo Tech/XR, Mellor Videoxogo de Andalucía, Mellor Videoxogo Internacional, Mellor Videoxogo Indie e Mellor Videoxogo de Centros Formativos”
Detrás de Renegade Jammer están os antigos estudantes do Campus Industrial de Ferrol, Andrea Alonso, Álvaro Martos, David Muradás, Gael Alberto Quintela, Andrea Salgado e Manuel Sanjurjo. Xuntos conforman Team Kaulu, o estudo que desenvolveu este xogo de plataformas 3D no que a súa protagonista, Jammer, unha rebelde que lidera a loita contra a corporación intergaláctica ZenCore, terá que irromper nas instalacións que esta compañía, dedicada ao estudo das mutacións xenéticas con fins pouco éticos, ten en varias galaxias co obxectivo de boicotear os seus sistemas informáticos e deter a súa actividade.
Este título, nado como traballo final do Máster en Deseño e Desenvolvemento e Comercialización de Videoxogos da Escola Politécnica de Enxeñaría de Ferrol (EPEF), conseguiu o Primeiro Premio ao Mellor Xogo Indie no Lérez Up de Pontevedra no ano 2024 e o Premio ao Mellor Xogo Académico no BCN Game Fest en 2025.
Foto: os antigos alumnos e alumnas da Escola Politécnica de Enxeñaría de Ferrol (EPEF) que desenvolveron Renegade Jammer, xunto coa coordinadora do máster en Deseño, Desenvolvemento e Comercialización de Videoxogos, Luz Castro, no stand que a Universidade da Coruña (UDC) tivo, o pasado mes de outubro, no BCN Game Fest.

O Concello de Poio remata o curso de IA logo de mes e medio de formación

S. P. — 2026-06-16T09:22:00Z

Dende o Concello de Poio pechaban esta semana o curso de formación en intelixencia artificial (IA), que durante un mes e medio permitiu ao alumnado achegarse a esta tecnoloxía para aprender a aplicala no día a día, tanto a nivel persoal como profesional.
Salientar que Ángel Moldes, alcalde de Poio, participou na última sesión, na que subliñou a importancia de aproveitar todas as oportunidades que ofrece a intelixencia artificial.
Nesta última sesión, na que participaron o alcalde e a concelleira de Novas Tecnoloxías, Tamara González, fíxose fincapé na importancia das oportunidades que achega a IA. Máis en concreto, no curso aprenderon a xerar ideas orixinais, redactar textos, deseñar imaxes e crear vídeos de calidade en cuestión de minutos a través desta tecnoloxía. Durante as sesións tamén se traballaron a mellora da marca persoal e a identificación de novas oportunidades laborais a través do uso destas aplicacións de uso cotián.
Engadir que esta actividade, que se desenvolveu na Aula Cemit situada en Combarro, forma parte da aposta do Concello de Poio por ofrecer formación presencial gratuíta, adaptada a todos os niveis, co obxectivo de aprender a usar a tecnoloxía para mellorar a vida cotiá.

Unha nova aplicación móbil facilita alertar dos lumes forestais

Redacción — 2026-06-16T09:10:32Z

A Xunta de Galicia puxo xa á disposición da cidadanía ALume, unha nova aplicación móbil deseñada para reforzar a detección temperá de incendios forestais mediante a colaboración directa da poboación. A ferramenta, dispoñible para dispositivos Android e iPhone, permite remitir avisos sobre lumes activos de forma rápida, incorporando datos de xeolocalización precisos e material gráfico que pode resultar de utilidade para os servizos de emerxencia.
A aplicación forma parte das novas medidas tecnolóxicas incluídas no Plan de prevención e defensa contra os incendios forestais de Galicia (Pladiga) 2026, presentado pola Xunta a comezos deste ano. O seu principal obxectivo é ampliar a rede colaborativa de vixilancia e prevención dos incendios forestais, facilitando que calquera persoa poida comunicar a existencia dun foco de lume directamente desde o seu teléfono móbil.
ALume ofrece unha interface sinxela que permite sinalar a localización exacta do incendio sobre unha fotografía aérea de alta resolución. A información transmítese en tempo real aos centros de coordinación provincial encargados da xestión das emerxencias forestais.
Ademais da posición xeográfica do lume, a aplicación permite achegar fotografías, gravacións de voz e observacións adicionais que poidan contribuír á avaliación inicial da incidencia. O sistema incorpora tamén un acceso directo ao teléfono 085, empregado para a comunicación de incendios forestais.
A ferramenta pretende complementar os mecanismos tradicionais de aviso a través dos números 085 e 112. A aplicación foi concibida para que o envío dunha alerta poida realizarse en poucos pasos, facilitando unha resposta máis rápida ante os primeiros indicios dun incendio.
O lanzamento de ALume encaixa nunha estratexia máis ampla de modernización dos sistemas de vixilancia forestal. O Pladiga 2026 contempla tamén a ampliación nun 30 % da rede de videovixilancia, que alcanzará as 241 cámaras distribuídas en 111 localizacións de toda Galicia. Sobre esta infraestrutura está prevista a implantación de sistemas de intelixencia artificial integrados na plataforma interna XeoCode, capaces de detectar automaticamente columnas de fume e focos iniciais de incendio para xerar alertas que posteriormente serán verificadas por persoal técnico.
As medidas tecnolóxicas complétanse coa incorporación de tres drons de última xeración destinados á prevención e detección de incendios, froito dun convenio entre a Consellería do Medio Rural e Abanca. Estes equipos operarán desde as bases de helicópteros de Vilamaior (Verín), O Xurés (Muíños) e A Lomba (Santa Comba), especialmente en áreas de difícil acceso ou con menor cobertura dos sistemas de videovixilancia.

As Xornadas Tecnolóxicas R 2026 analizarán o impacto da innovación, a IA e a xeopolítica nas empresas

Redacción — 2026-06-16T08:51:38Z

R celebrará este mércores unha nova edición das súas Xornadas Tecnolóxicas, que este ano levarán por título Mentes dixitais: Innovación e reunirán na Coruña a expertos de distintos ámbitos para reflexionar sobre o papel da innovación nun escenario marcado pola transformación tecnolóxica, a intelixencia artificial e os cambios xeopolíticos. O encontro terá lugar no espazo Árbore da Veira, no Miradoiro de San Pedro, e estará especialmente orientado ao tecido empresarial galego.
A cita partirá da idea de que a innovación deixou de ser unha opción para converterse nun factor determinante para a competitividade das organizacións. A través das intervencións programadas, abordaranse cuestións relacionadas coa adaptación das empresas a novos escenarios económicos e tecnolóxicos, a toma de decisións baseada en datos e o papel que desempeña a tecnoloxía nun momento no que os resultados prácticos prevalecen sobre as expectativas ou as promesas de futuro.
A apertura correrá a cargo de Alfredo Ramos, director de R e responsable territorial de MasOrange en Galicia, quen situará a innovación como unha prioridade estratéxica para as empresas actuais. A súa intervención incidirá na necesidade de combinar talento e tecnoloxía avanzada, facendo referencia a ferramentas xa dispoñibles como as redes de última xeración, os servizos na nube e a intelixencia artificial. Tras el participará o conselleiro de Facenda da Xunta de Galicia, Miguel Corgos, que tamén tomará a palabra no inicio da xornada.
O primeiro relatorio principal será impartido por Alberto Ruiz-Gallardón, exministro de Xustiza de España, baixo o título Redefinición do equilibrio de poder entre países a través da innovación. A súa exposición centrarase na relación entre innovación, poder internacional e soberanía dos estados. Entre as cuestións que se propoñen para o debate figuran o papel da innovación máis alá do ámbito estritamente tecnolóxico, a súa vinculación coa adaptación institucional e xeopolítica, os beneficios concretos que pode achegar aos cidadáns e a súa capacidade para reforzar a autonomía estratéxica dos países.
A continuación intervirá Antonio Ortiz, analista especializado en intelixencia artificial e tendencias dixitais, coa conferencia Como converter a innovación en resultados. O experto afondará nos factores que explican por que moitas iniciativas tecnolóxicas prometedoras fracasan cando se trasladan á realidade empresarial. Tamén abordará cuestións relacionadas coa xestión do cambio, a resistencia dos equipos á adopción de novas ferramentas dixitais e os dilemas estratéxicos que afrontan as organizacións á hora de decidir entre a redución de custos e a transformación dos seus produtos e servizos para incrementar as vendas.
O programa concluirá coa entrega do III Premio aleluIA, un recoñecemento creado en 2024 para distinguir proxectos que destacan pola aplicación creativa e innovadora da tecnoloxía. A organización considera este galardón unha forma de visibilizar iniciativas capaces de achegar valor engadido mediante o uso das ferramentas dixitais.
As Xornadas Tecnolóxicas R chegan así á súa edición de 2026 coa intención de ofrecer ao empresariado galego ferramentas de análise para comprender un escenario en constante transformación, identificar oportunidades derivadas da innovación e afrontar con maiores garantías os retos asociados á dixitalización e á adopción da intelixencia artificial.

Arrinca na Coruña un encontro internacional sobre as tecnoloxías que fan posible unha web aberta

Redacción — 2026-06-15T20:05:02Z

A Coruña converteuse no punto de encontro dunha parte significativa da comunidade internacional responsable das tecnoloxías que sustentan a web. O Web Engines Hackfest 2026, organizado por Igalia en Palexco, abriu as súas portas cunha primeira xornada centrada na interoperabilidade dos navegadores, os estándares web, a accesibilidade, a seguridade e a integración de novas tecnoloxías como a intelixencia artificial na plataforma web.
O encontro reúne durante tres días representantes dos principais motores de navegador do mundo, entre eles Chromium, WebKit, Gecko, Servo e Ladybird, así como especialistas vinculados ao W3C, WHATWG, TC39, Web Platform Tests (WPT), MDN e outras iniciativas fundamentais para o desenvolvemento da web aberta.
A programación de hoxe arrincou cun relatorio de Valerie Young dedicado aos avances na validación da accesibilidade mediante Web Platform Tests. A investigadora explicou como as ferramentas de probas compartidas entre navegadores están comezando a permitir verificar de forma automatizada aspectos relacionados coa accesibilidade, un ámbito tradicionalmente máis difícil de avaliar de maneira interoperable.
Outro dos momentos destacados da mañá foi a intervención de Behdad Esfahbod, creador e principal impulsor de HarfBuzz, un dos compoñentes máis importantes para a representación de texto en múltiples linguas nos sistemas modernos. Coincidindo co vixésimo aniversario do proxecto, Esfahbod repasou a súa evolución e presentou os traballos en marcha arredor de HarfRust, a adaptación do motor á linguaxe Rust.
A evolución das API web tamén ocupou un lugar relevante no programa. James M. Snell abordou posibles cambios no ecosistema das Streams API, mentres que Aki Rose Braun e Daniel Ehrenberg analizaron o impacto que terá a Lei Europea de Ciberresiliencia (CRA) sobre os navegadores e outros compoñentes da infraestrutura web. A aplicación desta normativa europea está a converterse nun dos asuntos de maior interese para os desenvolvedores de software de código aberto e para os responsables dos principais navegadores.
A sesión da tarde estivo marcada pola presenza da intelixencia artificial e da computación de alto rendemento aplicada á web. Markus Tavenrath presentou RustNN, unha implementación de WebNN desenvolvida en Rust que busca facilitar a execución acelerada de modelos de IA tanto en aplicacións nativas como directamente no navegador mediante WebAssembly.
Tamén xerou interese a presentación de Eemeli Aro sobre localización de contidos web. A proposta procura avanzar cara a un sistema estandarizado que permita adaptar páxinas e aplicacións a múltiples idiomas con maior precisión e menos dependencia de solucións particulares desenvolvidas por cada proxecto.
Pecharon a sesión vespertina dúas presentacións ligadas á gobernanza do ecosistema web e das infraestruturas que sustentan o desenvolvemento moderno de software. Aki Rose Braun e Ethan Arrowood explicaron como o grupo WinterCG (actualmente integrado no comité TC55 de Ecma International) resolveu a necesidade de manter un rexistro de claves para contornos de execución web sen depender dunha infraestrutura centralizada, optando pola súa publicación como informe técnico estandarizado.
A continuación, Daniel Roe e Matias Patak Capeletto presentaron npmx, unha alternativa comunitaria ao navegador tradicional do rexistro npm que busca facilitar a identificación de paquetes modernos, fomentar a adopción de estándares de JavaScript e mellorar a colaboración entre comunidades de desenvolvedores. Ambas as intervencións puxeron o foco na sustentabilidade das infraestruturas abertas e na evolución das ferramentas que empregan millóns de programadores en todo o mundo.
Máis aló das conferencias públicas, boa parte da actividade do Web Engines Hackfest desenvólvese en sesións de traballo especializadas. Durante a primeira xornada celebráronse encontros centrados en cuestións como a construción de ferramentas para Servo, a evolución de AsyncContext, a mellora das ferramentas de desenvolvemento web e os desafíos derivados do uso crecente de sistemas de intelixencia artificial que consumen contidos da web a grande escala.

O evento pódese seguir en directo a través de streaming

Varios estudios de Xbox poderían pechar ou segregarse

Redacción — 2026-06-15T20:00:00Z

: O equipo de Ninja Theory

Os estudios de Xbox están a atravesar un proceso de reordenación que podería supoñer o peche de Ninja Theory, estudio responsable da serie Hellblade, mentres outras divisións como Compulsion Games e Double Fine se atopan en negociacións avanzadas para unha posible saída de Microsoft mediante operacións de venda ou spin-off.
O persoal de Ninja Theory foi informado nunha chamada interna celebrada o luns sobre o posible peche do estudio, aínda que se mantén a expectativa de que poida ser adquirido por outro comprador. A situación enmarca un movemento máis amplo de revisión da estrutura de estudios de desenvolvemento vinculados a Xbox.
En paralelo, información publicada apunta a que varios equipos da división de Xbox Game Studios están inmersos en conversas activas sobre o seu futuro, incluíndo Compulsion Games e Double Fine. Nalgúns casos trátase de negociacións que poderían derivar na súa separación da estrutura corporativa de Microsoft.
As informacións publicadas sinalan tamén que o clima de incerteza impacta en proxectos en curso e na continuidade de franquías e novas propiedades intelectuais. No caso de Hellblade e da súa evolución recente, a falta de claridade sobre o futuro do estudio abre interrogantes sobre o desenvolvemento dos títulos anunciados.
Mentres se desenvolven estas negociacións, diversos equipos internos terían xa iniciado movementos profesionais fóra das súas compañías, en previsión de posibles cambios estruturais. As fontes consultadas polos medios estadounidenses apuntan a que non hai unha decisión definitiva en todos os casos, e que o escenario continúa aberto a novas fórmulas de continuidade ou adquisición dos estudios implicados.

Spigal permitirá prever a evolución dos lumes con 12 horas de antelación

Redacción — 2026-06-15T19:07:45Z

A Xunta porá este verán á disposición do operativo de loita contra os incendios forestais unha nova ferramenta tecnolóxica destinada a prever o comportamento dos grandes lumes e facilitar a toma de decisións durante as tarefas de extinción. O sistema, denominado Sistema de Propagación de Incendios de Galicia (Spigal), foi desenvolvido pola Consellería de Medio Ambiente e Cambio Climático a través de MeteoGalicia.
O presidente da Xunta, Alfonso Rueda, informou da posta en marcha desta solución, deseñada para simular a evolución dun incendio nas horas seguintes ao seu inicio e ofrecer distintos escenarios sobre a súa posible expansión. O obxectivo é mellorar a capacidade de resposta dos equipos de emerxencia e aumentar a seguridade tanto da poboación como dos efectivos que traballan sobre o terreo.
Spigal integra nun visor información actualizada en tempo real, como a localización do lume, as condicións meteorolóxicas, a presenza de fume ou as características da vexetación. Esta información permite axustar continuamente as simulacións e obter previsións rápidas. Segundo explicou Rueda, o sistema é capaz de xerar en arredor de 30 minutos unha estimación da evolución do incendio durante as seguintes 12 horas.
A ferramenta tamén incorpora funcións avanzadas, como a simulación de focos secundarios provocados polo transporte de faíscas, a predición da dirección de avance das lapas ou a estimación dinámica da humidade da vexetación en función de factores como a chuvia. Ademais, pode integrar as actuacións realizadas polo operativo de extinción, incluíndo liñas de defensa e outras intervencións executadas sobre o terreo.
O desenvolvemento de Spigal baséase nunha adaptación propia do sistema internacional WRF-Fire, que combina un modelo meteorolóxico de alta resolución cun modelo de comportamento do lume. Esta integración permite simular simultaneamente a evolución das condicións atmosféricas e do propio incendio, unha capacidade especialmente relevante nos grandes lumes, que poden alterar a atmosfera ao seu redor e influír na súa propia propagación.
A Administración galega considera que esta capacidade de anticipación contribuirá a optimizar a xestión dos incendios forestais, reducindo riscos para a cidadanía, mellorando a seguridade dos equipos de intervención e favorecendo a diminución da superficie afectada polo lume e das emisións asociadas.
O sistema foi validado utilizando datos reais dos grandes incendios rexistrados en Galicia durante o verán de 2025, especialmente na provincia de Ourense. Tras superar a fase de probas, Spigal entra agora nunha etapa preoperativa previa á súa utilización polo Servizo Galego de Prevención e Defensa contra os Incendios Forestais.

EA presenta unha plataforma publicitaria para os seus xogos

Redacción — 2026-06-15T19:00:00Z

Electronic Arts anunciou o lanzamento de EA Advertising, unha nova plataforma orientada a transformar a forma na que as marcas se conectan coas audiencias a través de experiencias dixitais e tamén no ámbito físico, aproveitando o seu catálogo global de xogos e servizos interactivos.
A proposta baséase na integración de publicidade directamente dentro da experiencia de xogo mediante colocacións dinámicas en tempo real, integracións creativas e colaboracións con marcas. Estas aparicións poden incluír elementos como sinalética en estadios virtuais, contidos personalizados ou activacións dentro de modos de xogo en liña, coa intención de que formen parte do entorno sen interromper a experiencia do xogador.
A plataforma apoiase na escala de usuarios da compañía, que alcanzou máis de 120 millóns de xogadores mensuais durante o exercicio fiscal de 2026. No caso das propostas deportivas, o ecosistema de EA Sports consolídase como un dos principais vectores de interacción, con centos de millóns de usuarios anuais e volumes de xogo que inclúen miles de tempadas simuladas ao día en Madden NFL e máis de mil millóns de partidos mensuais en EA Sports FC.
O novo sistema de publicidade permite tamén activar campañas en contornos 3D con unidades nativas como paneis publicitarios dixitais, marcadores ou superposicións de emisión, integradas en simulacións deportivas. Estas insercións poden ser xestionadas de maneira dinámica e adaptarse a diferentes obxectivos de campaña, con métricas baseadas en estándares do sector e ferramentas de medición avanzadas.
Outro dos piares da iniciativa é a incorporación de capacidades de segmentación e análise mediante un servidor publicitario propio e un SDK desenvolvido para o motor Frostbite. Este sistema permite unha optimización das campañas en función de datos agregados de interacción, baixo criterios de privacidade e verificación de audiencias reais en colaboración con terceiros especializados en medición publicitaria.
Dentro desta estrutura, o EA Sports Partner Program propón un modelo ampliado de colaboración con marcas, que pasa da publicidade tradicional a experiencias co-creadas dentro e fóra do xogo. O programa inclúe activacións en eventos en directo, contidos para creadores, ferramentas sociais e experiencias comunitarias, ademais de iniciativas culturais e relacionadas con deportistas a través de novos formatos de narrativa dixital.
A empresa xa comezou a traballar con diferentes marcas na implementación destas integracións. Entre os exemplos citados atópanse Visa, con experiencias vinculadas a EA Sports FC e EA Sports College Football; Lowe's, con desafíos e contidos personalizados en varios títulos deportivos; Red Bull, con obxectivos dentro do xogo e colaboracións con atletas; ou Xfinity e Peacock, con integracións dinámicas en contornos de estadio e recompensas personalizadas. Tamén se destaca a proposta Dew University de Mountain Dew, integrada en EA Sports College Football 26, que inclúe equipo xogable, estadio propio e sistema de recompensas.

Narón activa unha nova edición do seu programa de informática divertida e segura para a rapazada

S. P. — 2026-06-15T18:50:55Z

O Concello de Narón lanza un verán máis o programa municipal educativo INDI, siglas de Informática Divertida. Trátase dunha iniciativa pensada para que os nenos e nenas de entre 8 e 12 anos se acheguen ao mundo dixital de forma lúdica e creativa durante o mes de xullo, segundo explicou o concelleiro de Novas Tecnoloxías, Román Romero.
O edil subliñou o enfoque práctico e creativo da iniciativa: "Non se trata só de aprender informática, senón de que os rapaces descubran que coa tecnoloxía poden crear, inventar e traballar en equipo". Baixo o formato de obradoiro matinal, de 10.00 a 13.30 horas, os participantes aprenderán a crear avatares e personaxes dixitais, a deseñar carteis e historias con ferramentas creativas, a facer cómics e pequenas animacións, e a resolver retos e xogos de pensamento lóxico.
O programa incorpora tamén un scape room tecnolóxico, iniciación á mecanografía, creación dun videoxogo sinxelo con bloques, nocións de seguridade en Internet, experimentación con robótica e simuladores educativos, e a elaboración dun proxecto final en equipo.
O programa impartirase tanto na Aula CeMIT de Narón como nos sete locais sociais do municipio —San Xiao, Sedes, Pedroso, San Mateo, Castro, O Val e Doso—, con idéntico horario e contido en todos eles.
A Aula CeMIT oferta 15 prazas, mentres que cada local social disporá de 10.
Para participar nas sesións da CeMIT, as persoas interesadas deben presentar a súa solicitude a través do Rexistro do Concello de Narón ou da sede electrónica (con instancias dispoñíbeis xa no apartado de actividades). O prazo de inscrición abre este próximo luns, 15 de xuño, ás 8.30 horas, e pecha o 22 de xuño ás 13.00 horas. Para os locais sociais, as persoas interesadas deben dirixirse directamente a cada entidade. Máis información no teléfono 981-337700, extensión 1502.

O CITIC participou no peche do 1º Sandbox Europeo de IA co proxecto galego de mellora da xestión de emerxencias

S. P. — 2026-06-15T15:44:56Z

O Centro de Investigación en Tecnoloxías da Información e das Comunicacións (CITIC) da Universidade da Coruña participou o xoves 11 de xuño en Madrid no acto de clausura do primeiro Sandbox Europeo de Intelixencia Artificial, unha contorna de probas pioneira impulsada polo Ministerio para a Transformación Dixital e da Función Pública para facilitar a adaptación de sistemas de IA de alto risco ás esixencias do Regulamento Europeo de Intelixencia Artificial.
En representación da Fundación CITIC asistiu Eduardo Mosqueira, subdirector do centro, nunha xornada na que se presentaron os resultados das doce iniciativas seleccionadas para formar parte deste programa piloto europeo.
Entre os proxectos participantes atópase a solución promovida pola Xunta de Galicia para a automatización e mellora da transcrición de chamadas de emerxencia mediante tecnoloxías avanzadas de recoñecemento automático da fala. A Fundación CITIC participa nesta iniciativa achegando a súa experiencia en investigación e innovación en intelixencia artificial e análise de datos.
Durante o acto de clausura, o director da Axencia para a Modernización Tecnolóxica de Galicia (AMTEGA), Damián Rey, destacou o valor da participación galega nesta contorna de probas, que permitiu “traballar de maneira práctica sobre os requisitos do Regulamento Europeo de Intelixencia Artificial e comprender como aplicar eses requisitos reguladores nun sistema real de alto risco”.
A solución presentada pola Xunta permite transcribir chamadas en tempo real ou case real, almacenar as conversacións en formato estruturado e facilitar tarefas de busca, análise e investigación relacionadas con incidencias de emerxencia.
Ademais, abre a porta ao desenvolvemento de novas funcionalidades baseadas en analítica avanzada, detección de patróns ou apoio á priorización de chamadas.
Segundo lembra o CITIC, a iniciativa galega foi a única das doce seleccionadas impulsada por unha administración pública e encádrase no ámbito dos servizos esenciais.
A participación neste Sandbox Europeo permitiu á Fundación CITIC e ao resto das entidades implicadas validar metodoloxías, procesos e mecanismos de gobernanza para o desenvolvemento responsable de sistemas de intelixencia artificial, reforzando así o compromiso de Galicia cunha IA de confianza, ética e aliñada cos estándares reguladores europeos.
O proxecto no que participa a Fundación foi seleccionado en 2025 para formar parte do primeiro Sandbox Europeo de Intelixencia Artificial, unha iniciativa destinada a acompañar organizacións públicas e privadas na aplicación práctica das obrigas establecidas polo AI Act. A través desta contorna controlada, os participantes puideron avaliar os seus sistemas de IA en condicións reais, recibindo orientación técnica e reguladora para garantir a súa adecuación ao novo marco normativo europeo.

Aberto o prazo de envío de resumos de proxectos para o IX Congreso XoveTIC

S. P. — 2026-06-15T14:00:00Z

Estes días abriu o prazo de envío de resumos de proxectos de investigación (abstracts )para o Congreso XoveTIC, organizado polo Centro de Investigación en Tecnoloxías da Información e das Comunicacións (CITIC) da Universidade da Coruña en colaboración coa Facultade de Informática da UDC.
Trátase dun encontro científico dirixido a persoal investigador júnior, tanto en etapa predoutoral como posdoutoral, que desexe dar a coñecer as súas investigacións nun ambiente colaborativo e distendido.
O prazo de envío ficará aberto ata o venres 17 de xullo de 2026. Os abstracts deberán ter unha extensión máxima de 800 caracteres e cargarse na páxina web do congreso a través de EasyChair. Logo notificaranse os traballos seleccionados e avaliados polo comité científico e habilitarase o prazo para a subida dos papers, que deberán ter unha extensión de entre catro e oito páxinas, sen contar o índice nin a páxina en branco do modelo.
O congreso ten como principal obxectivo fomentar un espazo de intercambio académico que favoreza a discusión científica, a colaboración e a formación de mozas investigadoras e mozos investigadores no ámbito das TIC (Tecnoloxías da Información e a Comunicación).
Coa apertura desta convocatoria, a comunidade científica pode xa remitir os seus resumos de contribucións para a súa avaliación en formato de comunicación oral ou póster. Aceptaranse tanto traballos de investigación orixinais como resultados previamente presentados noutros foros, sempre que fosen adaptados ao formato do congreso.
O evento mantén o seu carácter gratuíto e a súa vocación de encontro próximo e colaborativo. Todos os traballos aceptados serán recollidos nun libro de actas, contribuíndo á difusión da investigación presentada durante o congreso.
Toda a información actualizada, incluídas as datas clave do proceso de envío e avaliación, está na páxina oficial do Congreso XoveTIC.

O proxecto Interferencias EL/LA chega a Cee para xuntar na Rede testemuños sobre igualdade de xénero

S. P. — 2026-06-15T11:40:00Z

A igualdade de xénero é o eixo sobre o que xira o proxecto artístico e multimedia Interferencias EL/LA, que chega estes días ao municipio de Cee, unha proposta procesual, participativa e interdisciplinar que está a percorrer diferentes territorios do país a través de testemuños cidadáns, instalacións con códigos QR, proxeccións audiovisuais e accións performativas.
Detrás desta acción atopamos a Artes Visuais, con Maya Marja Jankovic á fronte, o proxecto conta con financiamento da Secretaría de Estado de Cultura dentro do Plan Xeral de Dereitos Culturais do Ministerio e o apoio do Concello de Cee e a súa alcaldesa Margot Lamela Louzán, e da Universidade de Santiago de Compostela, a través de Eva López. A acción desenvólvese estes días en diferentes fases abertas á participación da cidadanía.
Interferencias EL/LA parte dunha investigación vinculada á lexislación actual, á cultura popular e ás memorias colectivas. A través de conversacións distendidas e entrevistas documentais, o proxecto recolle testemuños persoais sobre identidade, xénero e experiencia vital, xerando un arquivo audiovisual que posteriormente se vincula a códigos QR integrados no espazo público.
Durante a súa estancia en Cee, o proxecto está a desenvolver sesións de escoita activa, xénero e identidade, así como xornadas de gravación documental con veciñas e veciños do municipio. Estas sesións forman parte do proceso de construción colectiva da obra, no que a cidadanía participante é parte fundamental do proxecto.
Alén disto, o martes 16 de xuño, ás 21 horas, o Auditorio da Casa da Cultura de Cee acollerá a presentación e as proxeccións audiovisuais do proxecto Interferencias EL/LA, dentro do proceso de activación artística e documental que estes días se está a desenvolver no municipio.
Indo ao proxecto Interferencias, dicir que se define como unha proposta multimedia procesual que aborda diferentes temas da sociedade contemporánea a través de metodoloxías participativas e contextuais. Establécese unha relación activa entre artista, participante e espectador, empregando o testemuño individual como ferramenta de construción colectiva e memoria social.
Interferencias EL/LA aspira a conectar diferentes municipios e territorios nacionais e internacionais mediante unha rede de interacción cidadá construída a través de arquivos audiovisuais e códigos QR instalados no espazo público. O proxecto xa pasou por diferentes municipios, entre eles Vilafranca (Castelló), e ao longo do ano continuará activándose en distintos puntos da xeografía española mediante novas intervencións, procesos participativos e accións vinculadas ao territorio e á memoria colectiva.

Pagan 3 millóns de dólares por unha copia precintada de Super Mario Bros.

Marcus Fernández — 2026-06-15T10:14:31Z

Cada certo tempo chama a atención algunha poxa relativa a videoxogos clásicos polos que chegan a pagarse cantidades estratosféricas, e nesta ocasión Heritage Auctions é a casa de poxas encargada da operación de venda dunha copia precintada do Super Mario Bros. de NES cunha cualificación de conservación PSA 9.6 A++, ou sexa, «o mellor exemplar coñecido».
Pese a que estamos ante unha unidade da segunda produción do xogo (ou sexa, que sería de 1986 e non de 1985, cando se lanzou o xogo), dado que non se conserva ningunha unidade precintada da primeira produción, estamos ante unha unidade extremadamente rara e cobizada polos coleccionistas.
O xogo inclúe unha consola NES Control Deck completa e en uso, conformando un lote que finalmente acadou un prezo de venda de 3 millóns de dólares, o que significaría que realmente o xogo non está valorado en tal cantidade, xa que a consola incluída co mesmo tamén ten un valor elevado.
Cómpre salientar que os prezos acadados por este tipo de poxas están a dispararse nos últimos anos a niveis que levan a desconfiar de operacións de manipulación do mercado dos videoxogos retro.
Como exemplo das dificultades de establecer prezos neste ámbito temos como nos últimos meses tamén emerxeu unha copia graduada de Mike Tyson's Punch Out cun nivel de conservación de 9.2 pola que agora piden 117.000 dólares, o que non parece moi razoable, se temos en conta que é posible realizar ofertas por unha copia cunha valoración de 9.6 por 18.750 dólares.

A Coruña acolle un foro para analizar o papel de Galicia como potencia tecnolóxica e industrial

Redacción — 2026-06-15T09:30:00Z

A Coruña converterase os días 16 e 17 de xuño nun punto de encontro para representantes institucionais, directivos empresariais e especialistas en innovación co gallo da quinta edición do Foro Económico Español: La Galicia que viene, organizado por El Español, Invertia, Quincemil e Treintayseis no Auditorio Afundación e de acceso gratuíto previa inscrición.
Aínda que o evento abordará cuestións políticas, económicas e turísticas, a tecnoloxía, a innovación e a transformación industrial concentrarán boa parte do protagonismo da programación. O encontro servirá para debater sobre o posicionamento de Galicia en ámbitos estratéxicos como a intelixencia artificial, a computación cuántica, a soberanía do dato, a transición enerxética ou a industria aeroespacial.
Un dos momentos máis destacados da primeira xornada será a conversación centrada na oportunidade de Galicia para liderar o desenvolvemento tecnolóxico, na que participarán o director de NTT Data en Galicia e Asturias, Alberto Borrego, e o director xeral da Axencia Española de Supervisión da Intelixencia Artificial (AESIA), Alberto Gago. A sesión permitirá analizar o impacto da intelixencia artificial na economía e as posibilidades que se abren para o ecosistema tecnolóxico galego.
A mañá do mércores estará dedicada principalmente á industria, a innovación e as tecnoloxías emerxentes. O programa inclúe unha análise do potencial da eólica mariña en Galicia, así como o papel da comunidade como futuro nodo enerxético e industrial. Tamén se abordarán cuestións relacionadas coa seguridade enerxética, a competitividade empresarial e o financiamento da transformación tecnolóxica.
O Centro Tecnolóxico ITG terá unha presenza destacada ao participar en varias sesións centradas na enerxía, a xestión do dato e a computación cuántica. Entre elas figura unha conversación sobre soberanía e trazabilidade da información empresarial ante a nova regulación europea, así como unha intervención dedicada aos retos que a computación cuántica expón para a ciberseguridade e os sistemas actuais de protección criptográfica.
A intelixencia artificial volverá ocupar un espazo relevante cunha sesión específica sobre IA avanzada, na que participará Julia Díaz, responsable de Data Science de Repsol. A programación tecnolóxica completarase cunha intervención de Alén Space para abordar as oportunidades da industria espacial galega e a crecente presenza da comunidade no desenvolvemento de satélites e tecnoloxías vinculadas ao sector aeroespacial.
A innovación aplicada ao ámbito sanitario tamén contará cun espazo propio a través dunha conversa sobre medicina e transformación tecnolóxica nos servizos de saúde.

Anthropic pecha a billa dos seus modelos de IA máis avanzados

Redacción — 2026-06-15T09:15:19Z

Poucos días despois do lanzamento comercial de Claude Fable 5 e Claude Mythos 5, Anthropic anuncia a suspensión inmediata do acceso aos mencionados modelos tras recibir unha directiva de control de exportación emitida polo Goberno dos Estados Unidos por razóns de seguridade nacional. A medida afecta a todos os usuarios destes modelos, tanto dentro como fóra do país, incluídos os propios empregados de Anthropic que non sexan cidadáns estadounidenses.
Segundo explicou a empresa, a orde foi recibida o 12 de xuño e obriga a desactivar completamente ambos os modelos para garantir o cumprimento da normativa. O resto dos modelos da compañía seguirán funcionando con normalidade.
Anthropic asegura que a comunicación oficial non inclúe detalles concretos sobre os riscos detectados. A súa interpretación é que as autoridades consideran que se identificou un método para eludir ou jailbreakear os mecanismos de seguridade de Fable 5. A compañía afirma ter revisado a demostración desta técnica e conclúe que só permitía descubrir un número reducido de vulnerabilidades menores xa coñecidas previamente, sen que os resultados observados superasen as capacidades dispoñibles noutros modelos de acceso público.
A empresa defende que Fable 5 foi sometido antes do seu lanzamento a miles de horas de probas de seguridade realizadas en colaboración con organismos gobernamentais estadounidenses e británicos, organizacións externas e equipos internos. Esas avaliacións, segundo sostén, demostraron que os mecanismos de protección do modelo eran máis efectivos que os presentes en sistemas anteriores.
Anthropic recoñece que a resistencia absoluta aos jailbreaks non parece tecnicamente alcanzable na actualidade para ningún provedor de modelos de intelixencia artificial. Por ese motivo adoptou unha estratexia de defensa en profundidade baseada en dificultar a creación de métodos de evasión amplos, limitar o impacto dos ataques máis específicos e reforzar a monitorización para detectar posibles abusos. Nese marco tamén se encadra a conservación durante 30 días dos datos dos clientes que utilizan Fable 5, unha medida que, segundo a compañía, facilita a investigación e mitigación de vulnerabilidades.
O comunicado sostén que ata o momento non recibiu probas documentadas dun jailbreak capaz de producir resultados perigosos. Anthropic asegura que a evidencia facilitada polas autoridades consiste nun método específico e limitado que, esencialmente, pide ao modelo analizar unha base de código e corrixir erros de software. A compañía afirma que revisou o informe que considera a base da decisión gobernamental e concluíu que as capacidades demostradas están amplamente dispoñibles noutros sistemas comerciais, citando expresamente GPT-5.5 de OpenAI.
A empresa manifesta o seu desacordo coa decisión das autoridades e considera que a identificación dun posible jailbreak limitado non debería ser motivo suficiente para retirar un modelo comercial utilizado por centos de millóns de persoas. Tamén advirte de que, se este criterio se aplicase de maneira uniforme a todo o sector, podería frear practicamente a despregadura de novos modelos avanzados de intelixencia artificial.
Anthropic sinala que apoia a existencia de mecanismos gobernamentais para impedir lanzamentos considerados inseguros, pero defende que esas actuacións deben desenvolverse mediante procedementos transparentes, claros e baseados en feitos técnicos verificables. Na súa opinión, a decisión adoptada neste caso non cumpre eses principios.
Mentres traballa para recuperar o acceso aos modelos afectados, a empresa pide desculpas polos problemas ocasionados aos clientes e asegura que considera a situación resultado dun malentendido.
Non faltan voces críticas que consideran que a situación actual foi provocada en boa medida pola propia Anthropic, que utilizou a política do medo para vender os seus novos modelos de IA, e agora que as autoridades poñen limitacións ao seu acceso queren corrixir a imaxe proxectada.
Dende Europa o acontecido tamén reforza a idea de conseguir certo nivel de soberanía tecnolóxica, xa que a posibilidade de que os EE.UU. limite a exportación das súas tecnoloxías de fronteira situaríanos nunha clara situación de desvantaxe competitiva, o que agora pode verse como algo palpable.

Alfonso Rueda inicia unha serie de entrevistas mensuais en vídeo

Redacción — 2026-06-15T09:00:00Z

O presidente da Xunta, Alfonso Rueda, vén de pór en marcha Galicia Calidade Podcast, unha nova iniciativa de comunicación coa que manterá conversas mensuais con figuras destacadas da sociedade galega procedentes de ámbitos como a sanidade, o deporte, a cultura, a empresa ou a investigación.
O proxecto estreouse esta fin de semana cunha entrevista ao pediatra e investigador Federico Martinón, xefe do Servizo de Pediatría do Hospital Clínico Universitario de Santiago e unha das voces de referencia internacional no ámbito das vacinas.
Durante a conversa abórdanse cuestións relacionadas coa sanidade pública, a investigación biomédica e a importancia de contar en Galicia con profesionais de prestixio internacional.
Segundo explicou o Goberno galego, o obxectivo do espazo é contribuír a poñer en valor «o potencial da comunidade autónoma» e dar visibilidade ás persoas que están a facer posible a transformación de Galicia cara a un territorio máis moderno e competitivo. Cada episodio desenvolverase arredor dunha conversa informal sobre a traxectoria profesional do convidado e os desafíos de futuro da comunidade, e rematará con tres preguntas persoais comúns para todos os participantes.
A iniciativa forma parte da estratexia da Xunta para reforzar e ampliar o alcance da marca Galicia Calidade. O selo, tradicionalmente asociado á excelencia dos produtos galegos, pretende consolidarse agora como unha marca transversal capaz de representar a identidade, o talento, a innovación, a cultura e a capacidade competitiva do país, máis aló do ámbito alimentario.
O formato escollido permite ao presidente adoptar o papel de entrevistador e anfitrión das conversas, nun rexistro máis próximo e distendido que o das comparecencias institucionais habituais. Deste xeito, Rueda súmase a unha tendencia cada vez máis presente na comunicación política, na que os responsables públicos recorren a formatos dixitais propios para conectar coa cidadanía e difundir as súas mensaxes sen depender exclusivamente dos medios tradicionais.

Primeira entrega de Galicia Calidade Podcast

Galicia Business School móstranos como crear imaxes máis profesionais con IA

S. P. — 2026-06-15T08:20:04Z

A iniciativa de formación avanzada Galicia Business School, con sedes na Coruña e Vigo, organiza este mes de xuño un novo seminario de transformación tecnolóxica para facer avanzar en excelencia o quefacer dos nosos profesionais: a xornada gratuíta Crea contidos visuais con IA. Será este mércores 17 de xuño a partir das 13.00 horas (cunha hora de duración).
Segundo explican dende o o equipo de formación, “as ferramentas de intelixencia artificial están a permitir a empresas de calquera tamaño crear contidos visuais de maior calidade, sen necesidade de coñecementos de deseño nin recursos especializados”. Seguindo este fío, neste seminario en liña poderemos obter recursos de IA para mellorar fotografías de produto, xerar imaxes máis atractivas e crear materiais visuais listos para utilizar en mercadotecnia, vendas ou comunicación. Amais, as persoas asistentes traballarán sobre un caso práctico real, mostrando paso a paso como transformar unha imaxe sinxela nunha peza moito máis profesional e preparada para captar a atención de clientes e usuarios.
“Trátase dunha sesión práctica dirixida a profesionais, directivos e equipos que queiran aproveitar o potencial da IA visual para comunicar mellor e aforrar tempo na creación de contidos”, explican dende Galicia Business School.
Os contidos serán impartidos Pau Villier Ferrer, deseñador e director de arte con máis de 25 anos de experiencia liderando proxectos creativos para empresas e institucións de distintos sectores.

O IES Rafael Dieste celebrou a súa gran festa do galego: o 3ª festival Aquí tamén se fala

S. P. — 2026-06-15T08:00:00Z

O pasado venres 12 de xuño celebrouse o 3º festival Aquí tamén se fala, enmarcado na campaña de dinamización da lingua posta en marcha pola mocidade do instituto coruñés Rafael Dieste (co apoio de entidades como a Secretaría Xeral da Lingua e o Concello da Coruña).
A cita desenvolveuse na praza do Tolerancia e contou coa presenza da portuguesa Carolina Deslandes, un fenómeno musical na súa terra de orixe e en boa parte da comunidade en liña, onde conta con máis dun millón de seareiros nas redes sociais.
Tamén estiveron o concelleiro de Cultura, Gonzalo Castro, e o secretario xeral da Lingua, Valentín García, quen celebrou que “a música tamén sexa un gran medio para fomentar a presenza do galego, sobre todo entre as xeracións máis novas”. Salientou tamén o importante recoñecemento recibido polo festival, que foi distinguido co Premio da Cultura Galega o ano pasado polo “compromiso da xuventude coa nosa lingua e a implicación do alumnado”.
O programa musical completouse coas formacións galegas De Ninghures, Apolo 18 ou Kid Mount.
O festival foi coordinado por Alberto Pombo, Ramón Barreiro e Arcadio González.
A festa tivo lugar na praza da Tolerancia coas actuacións da banda internacional Carolina Deslandes, artista portuguesa con máis dun millón de seguidores nas redes sociais, e cos galegos De Ninghures, Kid Mount e Apolo 18.
Cómpre lembrar que baixo o paraugas desta iniciativa, que se estende 300 centros da Comunidade, realízanse outras accións de fomento do idioma como entrevistas ou campañas nas redes sociais que contan coa participación de persoeiros galegos e internacionais e entidades que animan á xuventude a usar a lingua. Así mesmo, trátase dunha proposta que se une a outras que tamén involucran o estudantado como 21 días co galego e +, Falamos + ou Nós tamén creamos.
Sobre Aquí tamén se fala
Baixo o paraugas desta iniciativa, que se estende a 300 centros, realízanse outras accións de fomento do idioma como entrevistas ou campañas nas redes sociais que contan coa participación de persoeiros galegos e internacionais e entidades que animan á xuventude a usar a lingua.
Así mesmo, trátase dunha proposta que se une a outras que tamén involucran o estudantado como 21 días co galego e +, Falamos + ou Nós tamén creamos, materializadas pola Secretaría da Lingua. A iniciativa #aquítaménsefala é unha campaña de dinamización lingüística da mocidade estudantil, con accións directas nos barrios e na contorna inmediata de cada alumno: un proxecto que comezou no IES Rafael Dieste da cidade da Coruña para logo estenderse por centros de todo o país, en boa medida a través das redes sociais (Instagram, Youtube, Spotify e Tiktok). Trátase dunha iniciativa que pon especial atención á música e á cultura galega realizando gravacións e entrevistas que se divulgan nas RRSS.
Aquí tamén se fala contou nas redes sociais co apoio inicial de representantes da cultura como Viggo Mortensen, James Rhodes ou Tanxugueiras.

A Aula AMTIC achega tres novos cursos para a rapazada centrados nas artes dixitais

S. P. — 2026-06-15T07:48:02Z

A Aula Municipal Tecnolóxica da Información e da Comunicación, a Aula AMTIC, organiza para estes meses de xuño e xullo tres novos cursos para público infantil e xuvenil arredor das artes dixitais. Para poder participar é preciso enviar cuberto este formulario de inscrición a informatica.milladoiro@gmail.com. Tamén se poderán facer inscricións no número de teléfono 698 172 347.
O programa comezará os vindeiros 25 e 26 de xuño co curso de debuxo dixital con PixelArt, dirixido a cativos e cativas de entre 6 e 9 anos. Neste curso, que se desenvolverá en horario de 17.30 a 18.30 horas, as persoas asistentes recibirán unha formación nesta plataforma de arte dixital e aprenderan a crear personaxes, escenarios e demais figuras.
Tamén para rapaces e rapazas de entre 6 e 9 anos está dirixido o curso de debuxo dixital e animación 2D con PixelArt. Os luns e os mércores do mes de xullo, entre as 11.00 e as 12.00 horas, os nenos e nenas aprenderán a crear personaxes e darlles vida con pequenas animacións, seguindo a súa formación na plataforma PixelArt e en todas as posibilidades creativas que achega.
O último dos cursos está orientado para un público algo maior, en idades entre os 10 e os 15 anos. Esta formación xirará arredor da creación de videoxogos e Game Design, onde as persoas participantes aprenderán a deseñar os seus propios videoxogos e todos os elementos que os compoñen: personaxes, mecánicas, niveis e xogos interactivos. A formación impartirase os martes e xoves do mes de xullo en horario de 11.00 a 12.30 horas.
Todos estes cursos son gratuítos. Para poder participar, será preciso enviar cuberto este formulario de inscrición ao enderezo de correo electrónico informatica.milladoiro@gmail.com. Tamén se poderán facer inscricións no número de teléfono 698 172 347 en horario de 9.00 a 14.00, os luns, e de 10.00 a 12.30 horas e de 16.00 a 20.00 horas, os mércores, xoves e venres.