As redes sociais, ferramentas de dobre fío en Internet
mércores, 8 de abril do 2009
As redes sociais, un tema que está dando moito que falar
últimamente na nosa web (sen ir máis lonxe hoxe mesmo),
foron gañando o seu lugar en Internet dunha maneira vertixinosa, convertíndose
nunha ferramenta practicamente imprescindible na socialización dos internautas
máis fieis aos seus costumes.
Estas aplicacións, tan empregadas polos mozos e mozas que
naceron cun ordenador debaixo do brazo (e co móbil debaixo do outro), funcionan
a modo de lugares para encontros humanos que case sempre substitúen aos físicos
pero poden chegar a ser unha arma de dobre fío se non se usan con cabeza.
Deixando á marxe os malos usos que lle poidan dar outros
usuarios á nosa información persoal e contidos ou o risco de suplantación de
identidade, este fenómeno pode ser unha traba para moitos á hora de atopar
traballo.
Hoxe en día, son moitas as empresas que poden (e de feito
fano) acceder aos perfís publicados polos seus candidatos neste tipo de redes, onde
poden ver fotos, detalles da súa vida persoal, comentarios doutros usuarios… e
todo tipo de información que pode influir no seu proceso de selección para o
posto (positiva ou negativamente).
Por este motivo, a empresa de recursos humanos Randstad, vén
de aconsellarlle aos usuarios deste tipo de aplicacións en liña que “teñan precaución á hora de darse a coñecer
nestas plataformas” xa que, cada vez son máis os departamentos de recursos
humanos que recorren a elas para obter referencias dos posibles candidatos.
Nembargantes, a firma recoñeceu que, se se fai un bo uso das
mesmas, “estas comunidades virtuais poden
multiplicar a rede de contactos profesionais dos seus usuarios e abrirlle
algunhas portas”.