Tecnópole incrementou os seus ingresos nun 21,4% en 2011
martes, 27 de marzo do 2012
O Parque
Tecnolóxico de Galicia, Tecnópole, vén de facer reconto do que dou de si o
traballo realizado durante o pasado 2011, e todo indica que a actividade foi
vento en popa ao ter incrementado os seus ingresos en máis dun 21%.
En concreto
o incremento experimentado é dun 21,4%, que veñen de manter a facturación por
servizos e alugueres e de incrementar o financiamento para a realización de
proxectos, ademais da súa actividade como entidade colaboradora do Ministerio
de Economía e Competitividade “para
tramitar as axudas a empresas instaladas en parques científicos e tecnolóxicos”,
informaron.
Segundo os
datos manexados na reunión do Consello de Administración da entidade, que tivo
lugar hoxe mesmo, os ingresos obtidos durante o ano pasado ascenderon a 2,4
millóns de euros, “cerca de medio millón
máis ca no exercicio 2010”, precisaron.
Durante esta
reunión tamén se tratou a ampliación do obxecto social da entidade de San
Cibrao das Viñas, que ten como obxectivo adaptalo ao seu papel de axente
dinamizador da I+D+i en toda Galicia, e informouse aos membros do Consello da
finalización do prazo de presentación de ofertas para as obras de ampliación da
superficie do Parque.
Por outra
banda, informouse do visto e prace concedido á instalación de tres novas
empresas na Tecnópole, dúas relacionadas coa estética dental e outra dedicada
aos servizos técnicos da enxeñaría territorial.
Esta última,
que leva por nome Topolaser, é unha empresa
relacionada cos servizos técnicos de enxeñería territorial, que dedicará o seu
niño na Tecnópole a proxectos de I+D+i “para
lograr desenvolvementos propios no eido da auditoría catastral e da obtención
de datos territoriais de baixo custo mediante vehículos non tripulados, entre
outros”, indicaron.