Os produtos de PescadeRías ofrecen garantías adicionais de integridade grazas á tecnoloxía blockchain de SIVSA
martes, 23 de xuño do 2020
A
empresa galega SIVSA, con sede principal en Vigo, foi a encargada de
achegar tecnoloxía de cadea de bloques (blockchain) e
rastrexabilidade á marca galega PescadeRías,
de onde se non?,
impulsada pola Consellería do Mar. O obxectivo deste proxecto
impulsado pola axencia AMTEGA e adxudicado a SIVSA é achegar
garantías adicionais acerca da integridade de cada unha das
operacións que se producen na cadea de valor dos peixes e mariscos
galegos certificados coa dita marca.
A
iniciativa, xa en funcionamento, procesou máis de 308.000 etiquetas
desde o seu arranque e fíxoo tirando proveito do que en palabras de
SIVSA é unha das principais fortalezas do blockchain: a
inmutabilidade. Grazas á cadea de bloques, explica a empresa
galega, “as evidencias rexistradas non poden ser eliminadas nin
manipuladas, o que achega garantías da orixe e integridade dos
datos, así como da data na que se produciu a operación”. Dito
doutro xeito: o emprego da dita tecnoloxía equivale a asinar ante
notario todo o acontecido na cadea de valor do produto, neste caso
concreto un produto pesqueiro galego certificado. Isto afecta á liña
de actividade comprendida dende que se recibe o produto nas lonxas
até que chega ao consumidor final.
Segundo
explica SIVSA, a aplicación da cadea de bloques na marca PescadeRías
pon a disposición do usuario, xa sexa un axente ou un comprador de a
pé que leva o peixe para a súa casa, “un informe completo de
rastrexabilidade que pode atopar en calquera etiqueta do produto”.
O informe presenta as características do peixe ou marisco, a data e
zona de captura, peso, entre outras informacións, e a traza de todos
os axentes da marca polos que pasou ese produto.
A
empresa engade que arestora está a avaliarse a extensión do sistema
tecnolóxico, durante este ano, a outros ámbitos autonómicos, como
a comercialización do produto das lonxas adheridas ao proxecto
Lonxas Galegas 4.0, ou a rastrexabilidade da madeira nas tallas
públicas e persoais realizadas en Galicia.