Novos impulsos da USC e o Concello e Diocese de Lugo ao proxecto Muralla Dixital
venres, 25 de abril do 2014
A Universidade de Santiago anunciou hoxe
a renovación do seu compromiso polo desenvolvemento do programa
Muralla Dixital, unha iniciativa da que xa
temos falado en Código Cero salientando precisamente o apoio previo
da USC e o cometido do programa: usar as novas tecnoloxías e as
técnicas máis innovadoras para trasladar o patrimonio da cidade de
Lugo á Rede, facendo así posíbel que se coñeza o seu potencial e
beleza alén das nosas fronteiras. Pois ben, este venres o proxecto
colleu pulos extra coa sinatura dun novo pacto entre o Concello, a
Diocese de Lugo e a USC dirixida a pór en valor a riqueza da cidade
de Lugo botando man de recursos actuais da innovación.
Muralla Dixital, unha iniciativa financiada con
máis de 1,4 millóns de euros pola Unión Europea a través do Fondo
Europeo de Desenvolvemento Rexional -no marco do Programa de
Cooperación Transfonteiriza España-Portugal 2007-2013- ten como
obxectivo a creación dunha rede de cinco cidades amuralladas de
Galicia e do Norte de Portugal (Santiago, Lugo, Monçao, Melgaço e
Valença) que apostan pola xestión conxunta para a valorización do
seu patrimonio histórico e arqueolóxico a través da aplicación e
do uso das TIC.
O programa está liderado polo Concello de Lugo,
mentres que a participación da USC, un dos socios colaboradores do
proxecto, centrarase na elaboración dun estudo evolutivo das cidades
de Lugo e de Santiago. O obxecto fundamental deste traballo,
sinalaron hoxe os seus impulsores, é “propor o estudo urbano das
dúas cidades a partir dun elemento patrimonial indiscutible como é
o caso da muralla de Lugo”.
O convenio asinado entre a USC, Concello de Lugo e
Diocese de Lugo serve de marco legal co que se dá autorización ao
persoal do Concello e da USC para acceder ao patrimonio eclesiástico
e captar imaxes do seu interior e exterior, así como dos bens ou
elementos artísticos que acubillan. Segundo informa a USC, “o
coñecemento e a posterior divulgación deste patrimonio a través da
dixitalización das imaxes captadas antóllase de sumo interese para
a investigación que desenvolverá a Universidade, xa que ata o
pasado século XIX Lugo era unha cidade episcopal, co que o bispo era
a máxima autoridade da que, en certa medida, dependían todas as
demais institucións (Concello, tribunais...)”. Daquela, engadiu, a
posibilidade de acceder ao rico patrimonio eclesiástico de Lugo “é
esencial para explicar a evolución experimentada pola cidade”.