Ineo impulsará o vindeiro xoves a colaboración entre empresas galegas TIC e máis do transporte

Entre os moitos espazos de actividade onde as empresas TIC da nosa terra poden medrar, achegar innovación e afianzarse sitúase sen dúbida un sector en proceso firme de renovación: o transporte. Dito doutra maneira, as conexións entre as empresas tecnolóxico-dixitais e as de carrexado de mercadorías ou persoas van alén dunha simple achega de recursos de navegación e comunicación. Poden supoñerlles ás transportistas unha mellora de tódolos seus procesos, dende a xestión e control dos recursos ao impulso á seguridade, pasando por unha meirande eficacia no consumo de combustible. O potencial é ilimitado, e co obxecto de dalo a coñecer entre as empresas galegas de ámbolos dous eidos, a asociación Ineo organiza o xoves 21 de outubro unha xornada empresarial e divulgativa, a desenvolver no Hotel Porta do Camiño de Santiago a partir das 11.30 horas.
A xornada, que se insire no proxecto Smart (iniciativa de raizame europea para estreitar a colaboración entre as TIC e o transporte), reunirá a un bo número de representantes de ámbolos dous eidos de actividade económica, cos obxectivos de “xerar e debater ideas para o desenvolvemento de proxectos de I+D dirixidos ao transporte por superficie e que poidan ser impulsados a nivel europeo a través de Smart”.
O proxecto en cuestión, impulsado na nosa terra pola Fundación para o Fomento da Calidade Industrial e o Desenvolvemento Tecnolóxico de Galicia, é unha actividade cofinanciada polo 7º Programa Marco da Comisión Europea, cuxo obxectivo é fomentar a participación das empresas en iniciativas de I+D ligadas á mellora do carrexo de persoas e mercadorías. Todos aqueles profesionais que queiran participar no evento do 21 de outubro, que é gratuíto, deberán formalizar a súa asistencia a través da conta de correo comunicación@ineo.org.
Programa de actividades
A xuntanza dará comezo ás 11.30 horas coas intervencións de Covadonga Toca, xerente da Fundación para o Fomento da Calidade, e Jorge Cebreiros, presidente de Ineo. Logo, falará Octavio Pernas, director territorial de Econet, que fará un repaso polos programas de axudas europeas a través dos cales as empresas poden obter pulo para proxectos I+D no transporte.
Luís Moreno, director xeral do CTAG; José Carlos García, secretario xeral de FEGATRAMER e José Luís Liñares, director xeral de FEGABUS, serán os encargados de moderar as mesas de traballo que virán a continuación e nas que se tratarán cuestións como por exemplo os métodos tecnolóxicos máis axeitados para mellorar a circulación asistida, a eficacia no consumo e no emprego de recursos e máis a seguridade na estrada.
Amais de todo isto, tamén se dará acubillo á presentación dun novo proxecto innovador da entidade Red.es dirixido, precisamente, ao trasporte. Elena González de Miguel, membro da entidade público-empresarial TIC, será a encargada de afondar nas claves desta iniciativa, inserida no Programa de Empresas de Red.es.