Especialistas en redes auguran en Santiago un futuro virtual para os servizos de atención ao cliente

Se nos falan de asistentes virtuais e non estamos moi introducidos no eido dixital, é posible que non cheguemos a entender o alcance do tema. Porén, a cousa cambia se damos un paso atrás e antes de meternos de cheo nas redes lembramos que calquera empresa ten a día de hoxe unhas persoas e uns servizos dedicados en exclusiva á comunicación con clientes, socios ou provedores. Pois ben, un asistente virtual viría a recoller este cometido e a mesturalo coas particularidades da nova comunicación, a que acontece en dispositivos móbiles, ordenadores e demais. Disto, de tirar partido destes espazos para chegar a novos niveis de diálogo cos clientes, falouse arreo hoxe no Hotel Porta do Camiño, escenario dunha xornada dirixida por APD, Artificial Solutions e Elaboro.
O encontro, de feitura empresarial, celebrouse no Hotel Porta do Camiño de Santiago e serviu, entre outras cousas, para deixar claro que o futuro da atención ao cliente están na Internet e nas redes sociais.
A xornada, que anunciamos onte, contou entre outros coa presenza de Jesús Velasco, responsable de Elaboro, quen abriu as sesións facendo un repaso das principais innovacións rexistradas nos últimos tempos en materia de diálogo con compradores, reais ou potenciais. Ao seu xuízo, estes constitúen o núcleo arredor do cal debería xirar sempre a política de calquera empresa, política que coa concorrencia masiva de organizacións e cidadáns en Internet non pode deixar de lado a innovación comunicativa.
A xornada tamén contou coa participación de Joan A. Ahlund, responsable de Artificial Solutions, quen explicou que a tecnoloxía do futuro xa está aquí, e que unha proba diso é o espallamento dos devanditos asistentes virtuais, recursos que non se limitan a simples animacións gráficas senón que son quen de responder de xeito concreto ás consultas achegadas polos visitantes dun espazo web e empregando a linguaxe natural, “contribuíndo así a reducir custes e a mellorar a calidade da asistencia ao cliente, así como a xerar máis vendas”.
Ahlund tamén salientou que o custe por consulta resulta é moito menor có que se xeraría a través doutras canles como o correo electrónico ou o teléfono, o mesmo o chat. Ao seu xuízo, “o prezo e a calidade da atención ao cliente convertéronse nun problema que medra, e cada máis negocios e interaccións con clientes acontecen en liña”, polo que está claro que este tipo de servizos daranse nas redes cada vez en maior medida. En termos concretos, e facéndose eco de datos da consultora Gartner, Ahlund sinalou que está previsto que para 2014 máis do 35% das organizacións de Global 200 empreguen asistentes virtuais baseados na Web para achegar contido de autoservizo.
No encontro celebrado en Santiago tamén interviñeron Fernando Gallego (director de vendas de Artificial Solutions Iberia), Ignacio Bañó (socio de Intelligence Partner), Andrés Mazaira (director xeral de Sogaserso e profesor de Organización de Empresas da Universidade de Vigo) ou Marcelino Otero (conselleiro delegado de Netaccede).