Até 2.400 pemes da provincia de Lugo recibiron máis de 9 millóns a través do Kit Dixital
xoves, 9 de marzo do 2023
O
presidente da Deputación de Lugo, José Tomé Roca, e Alberto
Martínez, director xeral de Red.es, presidiron este mércores 8 de
marzo, no Consistorio de Monforte, un
encontro para informar ao empresariado da Ribeira Sacra dos avances e
do impacto que está tendo na provincia a liña de axudas do Kit
Dixital e o programa Acelera PEME. Uns proxectos, que tal e como
subliñou o mandatario provincial, impulsa o Goberno do Estado “para
fortalecer e facer máis competitivo o tecido empresarial do noso
país a través da transformación dixital”.
Tamén
participaron na xuntanza, xunto cunha trintena de empresarios da
contorna, o delegado do Goberno en Galicia, José Miñones; a
subdelegada do Goberno en Lugo, Isabel Rodríguez; a primeira tenente
de alcalde do Concello de Monforte, Gloria Prada; e o concelleiro de
Obras, Medio Rural e Servizos do Concello de Monforte de Lemos, José
Luis Losada.
Tomé
Roca sinalou que as pequenas e as medianas empresas, as microempresas
e as persoas autónomas ás que se dirixen o Kit Dixital e o programa
Acelera PEME “conforman a columna vertebral do emprego do noso
concello e da nosa provincia e, polo seu menor tamaño, teñen máis
dificultades á hora de modernizarse ou incorporar novas
tecnoloxías”.
Entre
as accións prioritarias do Goberno da Deputación, o presidente
destacou “o apoio ao tecido produtivo da nosa provincia”, algo
que “xunto aos servizos públicos de calidade, é un factor
esencial para fixar poboación no noso rural”. No marco dese
compromiso co tecido produtivo, puxo o foco na incorporación da
entidade provincial ao Acelera PEME, dotado con medio millón de
euros, dos cales o 80% (400.000€) proceden da Unión Europea a
través da entidade pública empresarial Red.Es e o 20% (100.000€)
da propia institución provincial. “Levamos desde final de ano
despregando esta iniciativa de asesoramento e soporte gratuíto ás
pequenas e medianas empresas en materia de transformación dixital,
cuns bos resultados ata o momento, pois xa contactamos cunhas 250
empresas”. A institución provincial xa ten despregadas oficinas
para prestar asesoramento e acompañamento gratuíto aos negocios nos
concellos de Viveiro, Lugo e A Fonsagrada e traballa para completar a
rede nos municipios de Láncara, Monforte e Vilalba. Grazas ao
Acelera PEME, a Deputación manterá durante dous anos, ata o 2024,
esta rede de oficinas, que contará con 7 traballadores e
traballadoras.
Neste
programa, dixo, poden participar todas as empresas que estean
interesadas, co único requisito de ter sede física nalgúns dos
concellos da provincia de menos de 20.000 habitantes, é dicir, todos
menos o da capital, que dispón doutras iniciativas e recursos para
ofrecer este tipo de servizos. O presidente salientou “a
proximidade e a capacidade de atención presencial” que se ofrece a
través desta iniciativa, “un apoio para garantir a eficacia de
esta ambiciosa acción de transformación do tecido empresarial”.
Kit
Dixital
Sobre
o Kit Dixital sinalou que está a ter un “gran impacto” na
provincia. De feito, 2.400 pequenas e medianas empresas lucenses
recibiron xa máis de 9M€ do Plan de Recuperación, Transformación
e Resiliencia a través desta liña de axudas. “Estou seguro de que
seguirá dando froitos no concello de Monforte e no conxunto da
provincia de Lugo”, valorou.
Para
o programa Kit Dixital, o Ministerio de Asuntos Económicos e
Transformación Dixital destina un orzamento de 3.067 millóns de
euros dos fondos do Plan de Recuperación, Transformación e
Resiliencia para dixitalizar a preto dun millón de pequenas e
medianas empresas e persoas autónomas en todo o territorio nacional
os próximos tres anos. Estas subvencións do Goberno teñen como
finalidade “avanzar na dixitalización de áreas clave como
presencia na Internet, deseño da web, venda electrónica, xestión
de clientes e provedores, oficina dixital, redes sociais, xestión e
automatización de procesos e ciberseguridade”, lembrou.
As
axudas poden solicitarse ata decembro do ano 2024. Están abertas
tres convocatorias: a liña dirixida a empresas de entre 10 e 49
empregados, que poden solicitar o bono de 12.000 euros ata o 15 de
marzo de 2023; para as empresas de 3 a 9 empregados o prazo está
aberto ata o 2 de setembro con axudas de 6.000 euros; e os negocios
de menos de tres empregados e autónomos poden solicitar 2.000 euros
ata o 20 de outubro de 2023.