Yoigo rebaixa a súa tarifa Sinfín a 8 GB
mércores, 2 de setembro do 2015
A operadora Yoigo lanza
oficialmente esta semana unha nova tarifa de seu, a Sinfín 8G, un
paquete que en palabras da compañía “vén para ficar” e que
representa, por outra banda, “a mellor tarifa do mercado no ámbito
dos servizos de telefonía móbil a nivel estatal”. Entre outras
cousas, engaden
fontes da firma nun comunicado en PDF, salienta por fornecer
(como ben indica o seu nome) chamadas ilimitadas e 8 GB de datos por
29 euros ao mes, IVE incluído. Esta oferta estará dispoñíbel
dende o 3 de de setembro. Yoigo apunta a que a tarifa fíxose tras un
longo estudo das necesidades de datos e voz dos clientes de seu.
Porén, non deixa de ser un dato rechamante o feito de que esta
achega SinFín rebaixe a 8 GB os
20 GB sen limite de velocidade que se subministraban na anterior
SinFín lanzada en marzo con vixencia de tres meses.
Volvendo á proposta
presente, sinalar os devanditos 8 GB de datos pódense gozar a alta
velocidade até 4G e, en caso de consumilos, podemos seguir navegando
de maneira indefinida a unha velocidade de até 128 Kbps. Sexa como
sexa, explícase, “en ningún caso se interromperá o fluxo de
datos nin se cobrará o exceso de xeito adicional”.
Polo que respecto ás
chamadas, son ilimitadas sempre e cando se sigan “unhas normas de
uso razoábel” a fixos e móbiles nacionais, a calquera hora do día
e todos os días da semana. Permítese o acceso, a través desta
oferta e sen custo engadido, a servizos de chamadas de voz e
vídeo-chamadas VoIP tirando partido dos datos incluídos na tarifa,
que é tanto para clientes novos como para usuarios antigos, amais de
non vir con compromiso de permanencia.