Xorde Biolandia, plataforma de internautas comprometidos cun estilo de vida san
mércores, 5 de xuño do 2013
- Ana Miño, impulsora da ecotenda Biolandia
É
posíbel pasar dun pequeno espazo na Rede -que achegaba consellos e
información sobre como levar unha vida sa ou como axudar a preservar
o medio ambiente- a unha grande comunidade online,
con tenda incluída. Biolandia
é un bo exemplo disto, estamos a falar dunha iniciativa posta en
marcha por un grupo de cidadáns que van á procura dunha vida
natural. Máis polo miúdo, a creadora desta plataforma é Ana Miño,
unha nai preocupada por dar o mellor ás súas fillas, que decidiu
transformar o seu blog
nunha empresa coa axuda de todos os seareiros/as do seu espazo, que
nacía en maio de 2012.
Arestora
esta páxina converteuse nunha ecotenda, onde se poden atopar
produtos sans e naturais, aqueles que ela mesma recomendaba no seu
blog. Apunta Ana Miño que a forte demanda de preguntas que recibía
sobre onde mercar os produtos dos que falaba, foi o que a alentou a
abrir esta tenda online,
para servir de punto de encontro entre produtores e consumidores.
Deste
xeito xorde Biolandia.es,
un sitio web de produtos e servizos ecolóxicos que só vende o que
foi probado e seleccionado con anterioridade polo equipo de
Biolandia, incluída a súa propia fundadora. E que se pode atopar en
Biolandia.es? Pois dende alimentos, viños, produtos para bebés,
cosméticos, agasallos até un amplo abano de posibilidades en canto
a turismo rural ou escapadas de fin de semana...
Outra baza coa que xoga
Biolandia.es -segundo verbas da súa fundadora- “é o trato persoal
e a experiencia”, pois existe unha relación directa entre
provedores de produtos e vendedores; a isto hai que engadirlle a
principal razón de ser dos produtos ecolóxicos, os innumerábeis
beneficios que posúen. Cómpre informar que o termo de produto
ecolóxico e a tendencia xeneralizada que os recolle denominada
ecofriendly (amigo do ecolóxico) abrangue non só a un
sistema de produción que evita o uso de fertilizantes químicos ou
organismos xeneticamente modificados, senón a un conxunto de valores
que perseguen o respecto ao medio ambiente e fomentan un xeito de
vida máis sa e natural.