Xa é posíbel visitarmos as Illas Atlánticas de maneira virtual e a través de Google Views
luns, 7 de xullo do 2014
Coa axuda das novas
tecnoloxías e en relación ás viaxes podemos facer dúas cousas dun
xeito máis completo que antes da chegada masivas das novas
tecnoloxías e os smartphones: por unha banda coñecer mundo
sen desprazarnos e, pola outra, ampliar ao máximo o coñecemento
adquirido durante unha viaxe. Para uns (para os que se quedan) e para
os outros (para os que se moven) vai
dirixida unha dispoñibilidade habilitada en Google Views que nos
permite empregar esta aplicación para visitar de maneira virtual as
nosas Illas Atlánticas.
Segundo informa a
Administración autonómica, Google Views é unha ferramenta
semellante ao Street View que, a través de puntos panorámicos,
permite percorrer as rutas grazas as imaxes de gran calidade que
proporciona. “Grazas a esta aplicación”, engádese, “as illas
poden ser coñecidas en calquera punto, xa que para iniciar a visita
basta con buscar as illas en Google Maps, arrastrar e soltar a icona
denominada Pegman (boneco laranxa) sobre os puntos azuis para
iniciar a visita”.
Segundo engaden os
responsábeis desta dispoñibilidade, as visitas virtuais que fornece
a ferramenta de Google son unha ferramenta perfecta para o visitante
que quere coñecer o que se vai atopar, así como un alicerce para
escoller as illas galegas como destino turístico, “xa que achega
moita máis información ca unha simple foto”. Por certo que as
fotografías dispoñíbeis están xeoreferenciadas para que o
internauta-viaxeiro teña un coñecemento completo e total do lugar
no que se atopa. As imaxes que se ofrecen son o froito de máis de
dous meses de traballo nos arquipélagos do Parque Nacional. “En
total”, infórmase, “os técnicos traballaron ao longo de máis
de 25 xornadas durante os meses de abril, maio e xuño este ano,
realizando case medio milleiro de fotografías esféricas e logo
facendo unha rigorosa escolma co gallo de elaborar unha montaxe
posterior que permitese a mellor definición posíbel do espazo
natural”.
Lembrar que o Parque
Nacional marítimo terrestre das Illas Atlánticas de Galicia está
composto polos arquipélagos de Cíes, Ons, Sálvora e Cortegada e as
súas augas. Ocupa unha superficie de 8.480 hectáreas, das cales
7.285,2 son marítimas e 1.194,8 son terrestres.