WhatsApp incorporará chamadas de voz sobre IP

Jan Koum na súa intervención no MWC

Que hoxe estean presentes no Mobile World Congress de Barcelona os máximos responsables de WhatsApp e Facebook é algo que está a captar moita atención no evento, e estes persoeiros non parecen querer decepcionar, e Jan Koum comezou forte anunciando que WhatsApp chegou xa aos 465 millóns de usuarios activos ao mes (dos que 330 millóns usan o servizo diariamente) e adiantando que, ao igual que tamén fan competidores como LINE ou Viber, incorporarán servizos de voz á súa aplicación antes do verán, inicialmente para iOS e Android, e máis adiante tamén para dispositivos de Nokia e BlackBerry.
Koum insistiu en que o acordo de compra por parte de Facebook non suporá cambios no funcionamento de WhatsApp, que continúa sen ter previsto incluír publicidade no seu servizo.