Volkswagen lanza na Web unha máquina do tempo para albiscar o futuro do automóbil
martes, 5 de agosto do 2008
Volkswagen viaxa no tempo cara o
futuro da man da Internet. A casa xermana vén de tirar partido das novas
tecnoloxías para albiscar no mañá do eido automobilístico e de abrir unha
xanela en liña para que botemos unha ollada. Deste xeito, a través da páxina web acabada de habilitar pola
firma, poderemos facernos preguntas do tipo de: haberá atascos no futuro? ou
serán os coches quen de ler o pensamento
dos semáforos…?
O motor
central desta proposta é a cosmovisión
fixada no automóbil logo de 20 anos. Volkswagen emprega para poñernos en escena
unha curtametraxe interactiva ambientada no ano 2028 que achega ó espectador
unha introdución didáctica. O argumento: un pai cóntalle ó seu fillo como eran
os coches vinte anos antes e no entanto, o internauta pode acceder a diversas
ligazóns para ver o reverso da moeda, como serán os coches dentro de 20 anos.
Volkswagen Research –equipo de desenvolvemento
e deseñadores da proposta- segue de preto ó usuario nesta odisea virtual,
servíndose de tres conceptos de vehículos (One,
Ego e Room) ilústrasenos o mundo automobilístico do futuro subliñando o
lema da casa “Das Auto” (“o coche”) e remarcando un mañá sostible e innovador
para os nosos coches.