Vitae ponnos en forma este outono para a máis óptima xestión de proxectos TIC
martes, 25 de setembro do 2018
Con
frecuencia analistas e emprendedores pregúntanse quen sobrevivirán,
de aquí a dez anos, neste mercado en proceso de transformación.
Moitas son as respostas pero dende logo hai unha cousa na que
coinciden: sobrevivirán as empresas que se dixitalicen aposten por
métodos eficaces de traballo. E cando entendemos por dixitalizar e
facer máis eficaz unha empresa non nos referimos a procesos
estáticos, senón metodolóxicas dinámicas, participativas e
sociais. Remataron os tempos de crear un servizo e agardar a que
veñan os usuarios. Vitae
lémbranolo na nova edición do seu Curso sobre Dirección e Xestión
de Proxectos TIC Áxiles con Scrum, Scrumban e Lean Software.
Asemade
lémbranos a importancia de saírmos ás redes coma se fosen un
territorio por explorar, un mapa de oportunidades, co engadido extra
de que as oportunidades tamén as traballamos nós. Podémolo facer
simplemente cos nosos recursos propios? A resposta é si, pero
podemos atopar axuda de primeira orde en ferramentas como as
devanditas: Scrum, Scrumban e Lean Software.
Axudarnos
a coller as rendas das mesmas é o gran obxectivo dunha das
actividades formativas de Vitae Consultores que ten deixado máis
pegadas entre as nosas empresas e profesionais. Falamos do Curso
sobre Dirección e Xestión de Proxectos TIC Áxiles con Scrum,
Scrumban e Lean Software, que chega á súa 23 edición preparando
aos nosos profesionais coma se foran exploradoras/es sen posibilidade
de perda. O obxectivo é facilitar que os esforzos non sexan máis
grandes do debido e do recomendábel, que atopen as mellores rutas
posíbeis, que optimicen o rendemento e que se fagan co equipo máis
axeitado.
A
actividade formativa celébrase na Coruña (Hotel Attica 21) os días
26 e 27 de outubro e 2 e 3 de novembro. Trátase dunha actividade
formativa de 20 horas dirixida a familiarizar aos nosos profesionais
para aplicar os devanditos modelos de traballos áxiles (Scrum,
Scrumban e Lean), uns modelos que poñen en xogo elementos extra de
eficacia, rendibilidade e sintonía cos clientes (axudando aos
primeiros a anticiparse ás demandas dos segundos mesmo antes de que
sexan achegadas).
Segundo
Vitae, a orixe do obradoiro está igualmente nas vantaxes de
anticiparnos ás nosas propias demandas. Ou sexa, de preparar o
camiño a percorrer para saber cara a onde dirixirnos en canto se dea
unha disxuntiva. Desta maneira nolo explica Vitae: “Tendo en conta
o moito que evoluciona o mercado e a necesidade das empresas de
adoptar medidas para satisfacer de maneira eficaz e rápida as
demandas do cliente, propoñemos este curso sobre o uso de Scrum en
proxectos e desenvolvemento de software”. Esta metodoloxía,
engaden dende Vitae, permitirá a implicación e auto-organización
de todo o equipo profesional dunha corporación para fixar un punto
de partida e definir o proceso de desenvolvemento que se executará
durante o proxecto.
Nun
plano máis detallado acerca do programa do curso, neste abordaranse
as diferenzas entre as devanditas metodoloxías áxiles e as súas
vantaxes e inconvenientes con respecto a metodoloxías pesadas como
CMMI, PMI e ISO, “dando unha perspectiva global aos asistentes para
que adquiran os coñecementos precisos para seleccionar a metodoloxía
de dirección segundo as necesidades de cada proxecto”.
O
encargado de impartir estes contidos será Juan de Oliveira,
licenciado en Socioloxía e mestrado en Administración de Empresas,
a día de hoxe coordinador dos equipos de soporte técnico nunha
empresa referencial galega. Na súa bagaxe ten máis de 7 anos de
experiencia como responsábel da área de soporte en empresas de
desenvolvemento de software, e é un experto en xestión, análise e
optimización de servizos e proxectos tecnolóxicos. Traballou con
Inditex, BT, Adif, Tecnocom, ABANCA, Repsol, Gas Natural, BBVA, Bank
of Cyprus, Phillip Morris, LG, Iberdrola, Carrefour ou Grupo PRISA.