Vitae introdúcenos cun novo curso virtual nos segredos e posibilidades do Machine Learning
mércores, 11 de novembro do 2020
Entre
as tecnoloxías que máis expanden a súas ramificacións a día de
hoxe, propoñéndose como un gran recurso de utilidade para aumentar
competitividade, rendibilidade, eficiencia e capacidade de xestión e
análise, atópase a tecnoloxía chamada Machine Learning,
unha disciplina científica do ámbito da Intelixencia Artificial que
crea sistemas que aprenden automaticamente: algoritmos que revisan
datos e son quen de predicir comportamentos futuros. Mostrar a ampla
marxe de posibilidades que ofrece o ML no noso día a día
empresarial é un dos grandes obxectivos do curso
Desenvolvemento de Solucións con Machine Learning, que organiza a
consultora Vitae os días vindeiros.
A
sexta edición desta actividade formativa incluirá 10 horas de
adestramento a desenvolver en formato online, a través da aula
virtual de Vitae. Celebrarase os días 9, 11, 16 e 18 de decembro.
Como dixemos, o Machine Learning é o ámbito de
investigación que se centra en crear programas capaces de
xeneralizar comportamentos nas computadoras, é dicir, que fai
realidade a aprendizaxe de pautas para rendibilizar e mellorar cousas
como sistemas de busca, análise de textos, análise de redes
sociais, recoñecemento de obxectos e facianas, procesado do ADN,
recoñecemento da fala, analítica de datos médicos ou aplicacións
para a intelixencia do negocio. Ademais, alén do seu papel
científico, ten moitas potencialidades para os sectores da banca, da
medicina, do motor, das vendas ou das telecomunicacións, entre
outros moitos.
Segundo explican dende Vitae, a finalidade deste
curso é introducir ao alumnado no mundo do ML para que saiba
diferenciar que problemas de negocio son susceptíbeis de seren
resoltos mediante algoritmos de aprendizaxe máquina, e como asociar
cada tipo de problema co algoritmo axeitado, e, tamén, como preparar
os datos para obter os mellores resultados deses algoritmos. “Todo
isto dende un punto de vista práctico, sinxelo e botando man de
exemplos reais”.
A persoa encargada de impartir estes contidos
será Antonio Soto Rodríguez, enxeñeiro en Informática de Sistemas
pola Universidade da Coruña e profesional con máis de dúas décadas
de experiencia como consultor técnico experto e certificado,
achegando formación na Universidade Microsoft e a empresas e
organismos como a NASA, NASDAQ, PEMEX, SERGAS, Citroen, CEAGA,
Inditex, Ferroplast, Banco Popular, ABANCA, Xunta de Galicia ou
Abertis.