Vitae achéganos ás claves para facer dun proxecto tecnolóxico algo sinxelo e motivador
martes, 2 de outubro do 2018
Dun
tempo a esta parte estase a xerar nas empresas tecnolóxicas e nos
ámbitos profesionais especializados unha importante demanda de
ferramentas e metodoloxías que garantan dúas cousas concretas: por
unha banda elementos que garantan a fluidez dun proxecto e mailo seu
desenvolvemento nas mellores condicións de claridade e organización,
e pola outra unhas maiores seguridade e comodidade en todo o relativo
ao contido do proxecto e ao seu continente. Dito doutro xeito: fan
falta elementos que boten luz sobre os proxectos, dende a orixe dos
mesmos até a chegada a destino. Achegar esta fonte de nitidez,
eficacia e sinxeleza é un dos grandes obxectivos do Curso
Dirección e Xestión de Proxectos baixo a Metodoloxía PMI 6, que
organiza Vitae Consultores.
A
actividade formativa, que vai pola súa 14 edición, celebrarase na
Coruña (Hotel Attica 21) os días 9, 10, 16, 17, 23, 24 e 30 de
novembro. Para quen non o saiba, o curso é válido para o exame de
Certificación PMP do PMI. Serán 35 horas de sesións de
adestramento teórico pero sobre todo práctico.
Segundo
informa Vitae acerca da orixe e os obxectivos da actividade, esta ten
o seu punto de partida en contrarrestar unha das grandes eivas do
noso tempo en materia laboral: a gran complexidade que adquire
calquera proxecto que acometamos no ámbito das novas tecnoloxías e
a innovación en xeral. Son estas contornas de traballo cada vez máis
complexas? Sen dúbida si, sinala Vitae, que nos lembra que estas
condicións veñen por factores externos (crise económica, conflitos
sociais, cambios políticos, normas e regulamentos cada vez máis
restritivos) e tamén por condicionantes internos, por exemplo unha
meirande presión para o cumprimento de obxectivos, a procura
constante dunha meirande eficiencia (obter máis con menos elementos
en xogo), a limitación de recursos ou procura a tempo completo de
novos mercados e áreas de negocio.
En
consecuencia, sinala Vitae, “os proxectos non só se volven máis
difíciles de levar a cabo, senón tamén máis incertos; sendo a
incertidume un factor que pode impactar de maneira moi negativa na
consecución do éxito dunha iniciativa empresarial, xa sexa
introducindo adiamentos, sobrecustes ou corrupción do alcance”, o
que nos obriga a ter en conta, ademais, “a desmotivación dos
membros da organización, a insatisfacción por parte dos clientes
así como o deterioro da imaxe externa da organización”.
Sexa
como sexa, as boas prácticas recoñecidas internacional para a
dirección de proxectos, axudan e moito. Por exemplo achegando un
meirande nivel de certidume, ao fornecer aos profesionais que
desempeñan o rol de directores de proxecto dunha visión máis ampla
sobre as iniciativas nas que traballan, precisa para entender como se
interrelacionan co resto da organización e axudar na consecución
dos obxectivos estratéxicos. Neste senso, Vitae engade que “a
certificación PMP acredita a persoas e xera impactos directos de
valor nas organizacións”, xa que a dirección eficaz e eficiente
de proxectos debe considerase como unha competencia estratéxica das
empresas, xa que lles permite competir de maneira máis rendíbel e
áxil nos seus mercados, sustentar á organización e responder ás
consecuencias dos cambios na contorna de negocio, “axudando a
cumprir os obxectos dos proxectos, a ser máis predicíbeis, a
optimizar o emprego de recursos da organización e, en xeral, a
actuar de maneira proactiva e non reactiva”.
Para
quen non o saiba, a PMI (Project
Management Institute) é a organización máis recoñecida a
nivel internacional na disciplina da dirección de proxectos. Está
integrada por máis de 600.000 profesionais de todo o mundo, expertos
na xestión de iniciativas, con independencia do tamaño e
complexidade das mesmas, en múltiples sectores industriais. Vitae
recorda que “as boas prácticas aplicadas e postas en marcha polo
PMI son coñecidas, recoñecidas e avaladas por milleiros de
profesionais ao longo dunha chea de anos en miles de traballos de
todos os ámbitos”.
En
termos máis concretos, o PMI acredita aos profesionais na dirección
de proxectos co certificado PMP (Project Management Professional), o
cal goza dun alto recoñecemento, identificando a quen o posúe como
profesional altamente cualificado e demandando, na medida en que
aporta un coñecemento moi detallado para a dirección de
iniciativas, anticipando problemas, xestionando proactivamente a
incertidume e aumentado as probabilidades de éxito nos proxectos.
A
persoa encargada de impartir os contidos será Isaac Olalla Del Real,
licenciado en Dereito (Universidade Complutense de Madrid) amais de
ser un profesional certificado co PMP e co PMI-RMP por parte do
Project Management Institute. Trátase dun experto en xestión de
iniciativas innovadoras, con máis de 15 anos de experiencia neste
ámbito e preto dunha década como formador, impartindo cursos de
xestión baseada na metodoloxía PMI. Polas súas actividades de
adestramento xa pasaron máis de dous milleiros de persoas,
formándose en xestión dunha PMO, en xestión de riscos e en xestión
avanzada de proxectos. Ten traballado para Telefónica, Vodafone,
Deloitte, IECISA, BT, a DXT, Bankinter, FedEx, o Ministerio de
Industria, Votorantim, OHL ou a Xunta de Galicia.