Vigo quere poñer 150 edificios na vangarda das cousas conectadas
mércores, 4 de xullo do 2018
O Concello de Vigo quere
avanzar no camiño de converterse en cidade smart. Ou sexa, no
vieiro de ser unha urbe mellor comunicada, xestionada e sustentábel.
Con
este obxectivo, vén de dar a coñecer que concorrerá ás axudas
europeas para edificios intelixentes solicitando 5 millóns para máis
de 150 inmóbeis, entre os que se contan os predios que pertencen
á entidade local: dende bibliotecas a mercados, pasando por museos e
estacións.
Este proxecto piloto
prevé instalar nos ditos emprazamentos o chamado Nodo IoT, que
permitirá captar e procesar información en tempo real do que
acontece nos edificios a través da tecnoloxía da Internet das
Cousas e das redes que fan posíbel conectar obxectos de maneira
efectiva e co mínimo esforzo: as redes 5G. Esta colleita de datos a
tempo continuo posibilitará, en palabras do Concello, tomar as
mellores decisións ambientais, de seguridade e de mobilidade.
O alcalde Abel Caballero
explicou onte que a devandita achega de 5 millóns de euros virá
dada a través da axenda dixital para España con edificios
intelixentes. O proxecto piloto de Vigo, dixo, “está enfocado á
mellora do benestar e calidade de vida das persoas”. Segundo o
rexedor, a instalación do Nodo IoT permitirá facer
cousas como “comunicar en tempo real o que pasa nos edificios para
extraer datos e tomar medidas como a elaboración de mapas de ruído,
de contaminación e de consumo enerxético”. Caballero mostrouse
convencido de que a cidade de Vigo reúne as condicións establecidas
para ser beneficiaria, xa que nesta convocatoria poderán participar
municipios de máis de 200.000 habitantes de Andalucía, Cataluña,
Comunidade Valenciana, Galicia e Madrid. O prazo para presentar
propostas é o 26 de xullo e Vigo concorrerá cunha selección de
máis de 150 inmóbeis da cidade.
Liderada polo Concello, a
proposta incluirá todos os edificios administrativos, o parque de
servizos do Concello, o Auditorio Mar de Vigo, os museos, as
bibliotecas, o Estadio de Balaídos, a Escola de Artes e Oficios, o
Albergue Municipal, os mercados, os centros cívicos, os aparcamentos
subterráneos, o VigoZoo, o edificio da Xerencia de Urbanismo, o
aeroporto, a estación de ferrocarril, a estación de autobuses e o
porto. Tamén se proporán edificios de sectores privados como
vivendas, centros comerciais, hoteis ou Zona Franca.