Vigo acolle este sábado a entrega dos premios Viaxe ás covas do Folón
venres, 25 de marzo do 2011
- A empresa Desonhos nunha imaxe de El Faro de Vigo
Recentemente falamos en Código
Cero do traballo conxunto de dúas empresas viguesas, Moonbite Games e Desoños, a prol da recuperación da historia
e a cultura da súa cidade a través das feituras propias do lecer dixital.
Falamos do videoxogo en liña Viaxe
ás Covas do Folón, o resultado do seu traballo de lecer-histórico,
unha achega tecnolóxica encamiñada sobre todo á comunidade estudantil para
facilitarlle o coñecemento do medio urbano no que vive. Dábase a casualidade de
que unha parte do xogo ficara aberta á participación, máis polo miúdo a través
dun concurso no que se convidou á rapazada a propoñer os personaxes da aventura
gráfica. Pois ben, segundo nos conta o Concello de Vigo, xa hai premiados á
vista. A listaxe será dada a coñecer este sábado 26 de marzo, no auditorio
municipal ás 12.00 horas.
No acto convocado procederase (entre outras cousas) á entrega de premios do
concurso de creación de persoeiros da proposta de Moonbite e Deseños, impulsada
polas concellarías de Normalización Lingüística e Xuventude de Vigo. Segundo
fan saber ámbolos dous departamentos, o acto dará acubillo a unha exposición
das mellores 60 láminas que foron enviadas polos rapaces e rapazas que
participaron neste concurso; un total de 15 láminas de cada curso (2º e 3º
ciclo de Primaria).
Amais da entrega de premios, procederase a resumir os obxectivos e natureza
do videoxogo. “A finalidade deste
proxecto é a de dar a coñecer a historia de Vigo a través do xogo, onde os
rapaces e rapazas poderán coñecer moitos feitos importantes da historia da
cidade, do noso patrimonio e da nosa lingua”, informa o Concello de Vigo.