Vigo acolle este mediodía unha xornada sobre retos empresariais de produtividade, dixitalización e talento
xoves, 21 de setembro do 2023
No mediodía de hoxe, xoves 21 de setembro, ás 13 horas Vigo celebra
os Diálogos
para o Desenvolvemento baixo o lema Produtividade,
dixitalización e talento: unha perspectiva empresarial.
O encontro, organizado por Management Activo e patrocinado por
Solunion, Cajamar e SEIDOR, celebrarase no Hotel Attica 21 e acudirán
o exministro de Enerxía, Turismo e Axenda Dixital, Álvaro Nadal, e
o exdirector do Centro Nacional de Intelixencia e embaixador español,
Jorge Dezcallar. Os e as participantes falarán sobre o novo contexto
sobre as perspectivas económicas de España e Europa para os meses
finais de 2023 e comezo de 2024.
Álvaro Nadal fará un repaso sobre o novo contexto económico
internacional derivado do Brexit, o shock enerxético, a
inflación e o xiro das políticas monetarias. Asemade, analizará a
súa pegada sobre a economía española e o seu comercio dentro do
novo contexto e fará unha breve análise sobre o tipo de políticas
que son precisas para combater a inflación e que poden ser un
elemento de impulso e mellora da competitividade.
Pola súa banda, Jorge Dezcallar revisará os vectores xeopolíticos
que explican a día de hoxe as relacións internacionais, cunha
especial atención nos conflitos máis actuais, como son a guerra de
Ucraína e as tensións polas reclamacións territoriais de China con
Taiwan. Alén disto, revisará a revolución dixital, atendendo ás
súas posibilidades e os riscos que supón a realidade dun cambio
acelerado.
Na quenda das conclusións, as e os asistentes reflexionarán sobre
os desafíos xeopolíticos, enerxéticos, de defensa e económicos
aos que se enfrontan España e a Unión Europea, e o impacto dos
fondos Next Generation na economía nacional. Para rematar, as e os
relatores debaterán sobre retos e oportunidades do tecido
empresarial de Vigo.