Videoxogos de apoio á docencia e á investigación na Universidade Rey Juan Carlos
martes, 23 de marzo do 2010
"Os
videoxogos son o formato multimedia de maior éxito e relevancia do
século XXI e nos últimos anos convertéronse no medio audiovisual por
excelencia”.
Con estas verbas, o profesor titular de Comunicación Audiovisual da
Universidade Rey Juan Carlos de Madrid, Alfonso Cadrado, xustifica a creación,
na entidade académica que representa, dunha ludoteca onde se integran
videoxogos para a docencia e a investigación.
Cadrado
afirma que os videoxogos, como produto cultural, “xa reclamaron a atención de
multitude de universidades americanas e europeas”, a madrileña
entre elas.
A ludoteca, que se incorporará na
mediateca da Biblioteca da Facultade de Ciencias da Comunicación, servirá, segundo
afirma Cadrado, “de apoio á asignatura
Imaxe Sintética e Videoxogos, materia do novo plan de estudos de grao en
Comunicación Audiovisual, así como aos másteres de Informática gráfica, xogos e
realidade virtual e ao de Cine, televisión e medios interactivos”.
Para conseguir exemplares, os docentes
ofrecen aos alumnos a posibilidade de xogar ao videoxogo James Cameron’’s Avatar: The
Game con lentes estereoscópicos en 3D. A
cambio, iso si, deberán entregar un videoxogo orixinal nalgún dos formatos e
sistemas máis habituais: PC, PlayStation, PlayStation 2, e Xbox.
O xogo realizarase nas instalacións do Laboratorio de Animación e Imaxe
Sintética, no Campus de Fuenlabrada da URJC. Trátase dun laboratorio que ofertará pronto servizos
de aprendizaxe e produción de sistemas de animación e imaxe 3D. O seu campo céntrase na imaxe de síntese, a animación e
os videoxogos. Un dos seus equipamentos é o sistema de visionado
estereoscópico en 3D Nvidia
3D Visión, que permite
xogar a numerosos videoxogos cun grao de inmersión sen precedentes.