VLC chega á versión 1.0.0

O reprodutor multimedia multiplataforma máis coñecido posiblemente sexa o VideoLan VLC Media Player, que está dispoñible para Windows, Mac OS X e Linux, e vén de lanzar a súa versión 1.0.0 alcumada como Goldeneye, e que chega así á súa consolidación cunha chea de atractivas características como a independencia do reprodutor con respecto dos codecs instalados no sistema operativo, soportando a meirande parte dos formatos de audio e vídeo existentes, permitindo a gravación en vivo, visualización cadro a cadro, novos codecs para arquivos en alta definición, soporte de novos formatos (como Raw Dirac e M2TS), novo codificador para Dirac e MP3, escalado de vídeo en modo pantalla completa, soporte para RTSP Trickplay, reprodución de arquivos comprimidos en ZIP, barras de ferramentas personalizables e moitas outras melloras (algunhas dirixidas a sistemas operativos en concreto) que postulan ao VLC coma un reprodutor axeitado para un usuario que queira ver os contidos audiovisuais descargados da Internet sen ter que complicarse a vida cos formatos nos que se atopen.