Unha investigación critica o uso que os políticos fan de Twitter nas eleccións
mércores, 23 de setembro do 2015
As
últimas eleccións europeas de 2014 foron sometidas a moitas
análises. Desta volta centrarémonos na participación
e receptividade ás mensaxes emitidas na rede social Twitter
ao longo dos devanditos comicios, uns procesos nos se volveu
manifestar (malia a concorrencia dunha comunidade 2.0 que
teoricamente debera xuntar e non crear fendas) a gran distancia que
adoita separar aos candidatos (que desta volta centraron a súa
mercadotecnia na campaña, no sistema electoral e na corrupción) dos
votantes (que envorcaron o seu interese nas polémicas xurdidas na
campaña). Estas son as conclusións (entre outras) dun exhaustivo
traballo da profesora Mª Luz Congosto (Enxeñaría Telemática da
Universidade Carlos III de Madrid).
A
investigadora quixo examinar este contexto de Twitter nas eleccións
europeas para amosar que hai dous planos de conversa con pouca
conexión: a dos políticos (controlado polos partidos e candidatos)
e a dos cidadáns (máis libre en estrutura e temas tratados).
Cómpre
subliñar que dende as eleccións catalás de 2010, cando se acadou
unha masa crítica de usuarios españois en Twitter,
esta rede social supón un importante papel na difusión de mensaxes
en todas as campañas electorais celebradas até a data en España.
Volvendo
ao estudo, publicado na revista Redes,
este centrouse en tres aspectos da conversa política que se
desenvolve nesta rede social: a estrutura dos tuits, o seu
contido e a propagación dos mesmos. A enxeñeira estudou os patróns
de publicación, os temas tratados, a difusión das mensaxes e os
perfís dos usuarios.
As conversas externas e internas
descríbense no artigo como “auga e aceite”. E engade: “O
primeiro que terían que facer os partidos e os candidatos é
escoitar o que di a xente, porque creo que é moi instrutivo coñecer
o que se está a dicir na Rede”, opina a autora do
estudo. Aínda que matiza que os usuarios de Twitter non son unha
representación total da sociedade, xa que se trata en xeral de
usuarios novos e con certa preponderancia masculina.