Unha app de música galega e unha revolucionaria guitarra eléctrica, Premios Sixto Seco
xoves, 21 de novembro do 2019
A
Cidade da Cultura foi este xoves 21, especialmente, un lugar de
coñecemento, innovación e experiencias que marcan un
antes e un despois na nosa liña de progreso tecnolóxico-empresarial.
Estamos a falar da entrega de galardóns da sétima edición dos
Premios Emprende Gaiás – Sixto Seco, que distinguiron, novamente,
as mellores ideas emprendedoras do ano no sector das industrias
culturais e creativas. Nesta
edición, o xurado decidiu premiar unha aplicación móbil de música
galega (GMusic) e un novo deseño de guitarra eléctrica. Os
galardóns, que impulsa a Xunta a través da Fundación Cidade da
Cultura, teñen o patrocinio de Afundación e a colaboración do
IGAPE.
O
acto de entrega dos premios, celebrado esta tarde no auditorio da
Biblioteca e Arquivo de Galicia, contou coa participación do
secretario xeral técnico da Consellería de Cultura e Turismo,
Manuel Vila; do director xeral de Políticas Culturais, Anxo M.
Lorenzo; a coordinadora de Educación de Afundación, Carlota
Sánchez-Montaña Puga; e o director do IGAPE, Juan Cividanes. Para
finalizar a xornada, a lingüista, divulgadora e especialista en
comunicación no ámbito profesional, Estrella Montolío Durán,
impartiu a conferencia O poder da conversa, na que
subministrou respostas útiles para tirar proveito da nosa imaxe
persoal a través das conversas cotiás.
- O galardón na modalidade de aplicacións e proxectos de Internet
Unha
app para a música feita en Galicia
O
proxecto GMusic, para o desenvolvemento dunha app móbil
especializada en música feita en Galicia, foi o elixido como
vencedor na modalidade A do certame, destinada a premiar proxectos en
Internet e aplicacións informáticas do sector cultural. GMusic
pretende aproveitar “a dimensión estético-emocional da música”
para conectar cos oíntes, a través dunha ferramenta que leve ao
teléfono móbil as bandas emerxentes e abra unha nova fiestra á
interacción co usuario a través de tres tipos principais de
contidos: radio online, podcast e concertos retransmitidos en
live streaming.
O
proxecto está promovido por Germán Cacheda de Paz, en colaboración
con Xavier Facal. Ambos son técnicos superiores de son e traballan
na Radio Galega como técnicos de control de radio. Xavier Facal é
licenciado polo Conservatorio Superior da Coruña en Piano-jazz,
mestrado en educación secundaria na especialidade de música e
posgrao en sistemas de audio e sonorización. Desde 2017 é ademais
director do programa de Radio Galega Música Notas de Jazz. Germán
Cacheda ten unha traxectoria máis vencelalda ao ámbito empresarial
e comercial, polo que “as combinacións de ambos perfís
profesionais aportan valor ao proxecto emprendedor”, segundo fixo
saber o xurado.
- O premio na modalidade de proxectos creativos
Innovación
en guitarras eléctricas
No
caso da modalidade B do certame, destinada a premiar ideas
emprendedoras nos eidos do deseño, a xestión cultural ou a creación
artística e plástica, o xurado escolleu a proposta do enxeñeiro en
deseño industrial e desenvolvemento de produto Martín Gómez
Domínguez, centrada na creación dunha guitarra eléctrica
innovadora no seu deseño e prestacións: un instrumento modular que
posibilita cambiar a pastilla (que sempre está fixa noutras
guitarras) en cuestión de segundos e poder movela en calquera
posición sen cambiar as cordas ou desafinar. “Lógrase así unha
variedade de sons e combinacións, dótase de versatilidade o
instrumento e permite ao músico elixir entre case o 95% das
pastillas existentes no mercado”, sinalou o xurado.
Apoio
económico e acompañamento experto
A
través dos Premios Emprende Gaiás – Sixto Seco, a Fundación
Cidade da Cultura e a Xunta de Galicia apostan por apoiar os
emprendedores e emprendedoras galegas desde que dan os seus primeiros
pasos. Cada proxecto galardoado recibe un premio en metálico (3.000
euros para cada modalidade) e a posibilidade de incorporarse de
balde e durante un ano ao coworking do Centro de Emprendemento
Creativo da Cidade da Cultura. Os emprendedores e emprendedoras
disporán no espazo de traballo colaborativo dun emprazamento para
lanzar os seus proxectos, “beneficiándose dun ambiente innovador e
cooperativo e dun programa de titoría personalizado que lles servirá
de guía para transformar as súas ideas en empresas sustentábeis e
competitivas”.