Unha aplicación para móbiles achéganos predicións marítimas para surfear en Galicia

O programador autónomo Óscar Gonçalves López, tras coñecer a dispoñibilidade da API de MeteoGalicia, decidiu desenvolver unha aplicación móbil para promover as praias galegas nas que pódese practicar o surf, de aí que hai uns meses publicase na App Store Swell, aplicación coa predición marítima para os principais areais galegos para facer surf, e que esta mesma semana estreouse tamén en Google Play, en ambos casos dispoñible de balde.
Swell permítenos consultar a información das praias a través de listaxes provinciais nas que figuran predicións para varios días nas que se detalla a altura das ondas, a temperatura da auga, a frecuencia das ondas, a dirección do mar, a dirección e velocidade do vento, o estado do ceo e as mareas, datos especialmente relevantes para os que queiran cabalgar as ondas na nosa costa.
Esta ferramenta está en español e inglés, carece de publicidade e pretende incorporar novidades para converterse nun referente tanto entre os surfeiros galegos como nos que veñen ata as nosas costas para practicar surf.