Unha aplicación móbil galega axúdanos a tomar os medicamentos á súa hora
luns, 21 de outubro do 2013
Para algunhas persoas resulta realmente complicada a súa
toma diaria de medicamentos, por ter que atender a distintas prescricións, o
que dificulta lembrar a que hora hai que tomar cada menciña ou se xa tomamos o
noso tratamento, e para axudar a solucionar esta problemática estreouse
nos pasados días en Google Play a aplicación AlarMeds, que permite crear
alarmas personalizadas para axudarnos a non saltar ningunha medicación,
distinguíndose esta ferramenta polo xeito de rexistrar os medicamentos (cunha
ficha na que é posible incorporar fotografías que axudarán á súa identificación
por parte do usuario, así como distintas anotacións).
AlarMeds permite introducir alarmas
indicando datas, dose e frecuencia, permitindo incluso configurar o xeito non
que o móbil avisa ao usuario (son, vibración, volume, duración, melodía
personalizada...) e incluso incorpora unha axenda de teléfonos de interese
(ideal para rexistrar números de teléfono de servizos sanitarios ou
emerxencias).
A aplicación permite rexistrar ata 20 alarmas diferentes, permitindo que o
usuario non teña que estar pendente do reloxo ou de terceiras persoas. Pode
adquirirse en Google Play a un prezo de 1,98 euros, aínda que tamén existe unha
versión
de balde limitada a un único medicamento, o que permite probar as
funcionalidades desta ferramenta sen compromiso de ningún tipo.
- Jessica Dopico desenvolveu a aplicación cos coñecementos adquiridos nun curso de Aplicacións para Android
Resulta destacable o feito de que esta aplicación para dispositivos Android non
xurda dun estudio de desenvolvemento de aplicacións móbiles tradicional, senón
que o seu desenvolvemento sexa obra de Jessica Dopico Tuimil, unha rapaza que
decidiu emprender esta creación durante a súa participación no curso Aplicacións para Android, impartido por
David Hermida Mourelle, pai do célebre Pementos
Analyzer, e ao que Dopico acudiu cuns coñecementos informáticos “nivel
usuario” e rematou sendo quen de publicar un produto comercial centrado nun
deseño intuitivo e doado de empregar para usuarios de calquera idade.
Jessica Dopico comenta que a idea de crear esta aplicación naceu nos primeiros
días do mencionado curso, cando “estaba combinando 3 menciñas para unha doenza
pasaxeira, e coincidiu que unha das alarmas do móbil non sonou” o que a obrigou
a volver calcular as horas dalgunhas das tomas, o que pensou que podería ser un
problema que podería solucionar unha aplicación móbil como a que tiñan que
desenvolver nas súas xornadas formativas.
Aínda que David Hermida deu un baño de realismo aos seus alumnos,
manifestándolles o complicado que é vivir de facer aplicacións móbiles, iso non
impediu que Jessica Dopico seguise adiante con este proxecto, e que incluso
teña un par de ideas máis na cabeza que intentará que saian adiante no futuro.
Un claro exemplo de emprendemento que destaca principalmente por atender a unha
demanda do noso día a día, e que é posiblemente unha das prácticas que mellor
poñen en valor o uso da TIC.