Un novo navegador permite ver as webs en 3D
mércores, 6 de xuño do 2007
Os usuarios que queiran facer un uso máis espectacular
do seu navegador de Internet estarán contentos de descubrir que unha empresa
neoiorquina vén de lanzar SpaceTime 3D,
un navegador tridimensional que amosa o historial de web vistas a xeito de liña
de tempo, permitindo o desprazamento dunhas webs a outros nun contorno
3D, podendo verse cada fiestra en 2D con facerlle dobre clic.
Destaca o feito de que amosa tridimensionalmente os resultados de buscas en
Flickr, Google, Yahoo!, eBay ou o buscador de imaxes de Google.
Por desgraza non se trata dun navegador con moitas prestacións, xa que non
conta con xestión de favoritos nin admite engadidos, polo que non parece unha
boa alternativa para visualizar páxinas web, pero os usuarios que conten cun
equipo potente poden empregar este sistema para realizar presentacións e
impresionar cun xeito distinto de ver a Internet.
