Un estudo conclúe que a publicidade nos videoxogos é rexeitada polos máis cativos
mércores, 13 de maio do 2015
Unha
tese de doutoramento con orixe no Campus de Pontevedra someteu a
análise as reaccións
de nenos e nenas de España e Brasil á publicidade das páxinas de
videoxogos infantís. A autora da tese, Pamela Sanders, conclúe
que os máis pequenos xa “teñen unha postura crítica sobre o que
ven nos anuncios” e engade que unha “mala programación” das
insercións publicitarias pode estender entre os cativos “unha
cegueira publicitaria, quizais
mesmo unha animadversión á publicidade”, razón pola que subliña
a necesidade de regular a publicidade nos espazos web para nenos.
Tomando como
base a relación da infancia co consumo, os medios de comunicación e
as novas tecnoloxías, Sanders analizou para a súa tese (dirixida
polo profesor da Facultade de Ciencias Sociais e da Comunicación
Daniel Martí) como era recibida a publicidade dos xogos en liña por
parte dunha serie de estudantes de dúas escolas. Máis polo miúdo,
dous grupos de nenos e nenas de entre 9 e 11 anos de Pontevedra e da
localidade brasileira da Fortaleza, capital do estado de Ceará,
“foron convidados a xogar durante unha hora e media na sala de
ordenadores das súas escolas”, ao tempo que Sanders conversaba de
xeito individual con eles, empregando a “técnica da entrevista
semi-estruturada”, co obxectivo de capturar “a espontaneidade dos
nenos”.
Así,
nas entrevistas realizadas puido observar que os nenos comprenden a
publicidade como unha maneira de financiamento duns espazos de acceso
gratuíto e mesmo que “poden estar ocasionalmente interesados
nalgunhas propostas”. Mais, ao mesmo tempo, tamén puido recoller a
súa postura crítica ante o feito de que “a publicidade que invade
as páxinas se converta nun obstáculo” nas súas partidas. Neste
senso, a investigadora alude á existencia dun “discurso claro”
nos nenos e nenas entrevistados, que “piden un marco diferente para
o seu tempo de xogo”, no que os anuncios se adapten ás
características das partidas e non supoñan unha interrupción.
A
investigadora tamén fai énfase en que, “a miúdo, a publicidade
convértese nunha extensión dos xogos”, e, de feito, recórrese
con frecuencia ao formato advergame,
un anuncio con feitura de xogo “máis efectivo cos
nenos que cos adultos”.
Asemade,
Sanders tamén extrae da súa investigación a necesidade de que
tanto os centros de ensino como as familias non permanezan alleos ao
moito tempo que os cativos pasan na rede. "Deben actuar como
institucións mediadoras na súa relación con internet", sinala
esta investigadora, para quen é preciso axudar aos máis novos a
"desenvolver competencias críticas en contornas dixitais”.