Un concurso premiará aos proxectos de titulacións TIC de Galicia e norte de Portugal
luns, 10 de novembro do 2014
Como pulo ao emprendemento e para ligar a investigación
universitaria ao eido empresarial convócase a XIV edición do Concurso de
Proxectos Tecnolóxicos, un certame da Escola Superior de Enxeñaría Informática
e Expourense, financiado pola Deputación de Ourense, que convida aos alumnos
das titulacións TIC das universidades de Galicia e do norte de Portugal a
presentar traballos de fin de estudo máis innovadores.
O certame presentouse
hoxe no Pazo Provincial nun acto no que participaron Francisco Javier
Rodríguez, subdirector de Sistemas e Infraestruturas da Escola Superior de
Enxeñaría Informática do campus de Ourense; Rosendo Fernández, vicepresidente
da Deputación; e Alejandro Rubín, director xerente de Expourense; que sinalaron
que este certame pretende “pór en valor a investigación e a creatividade
aplicada á tecnoloxía dos nosos universitarios para que poidan ter a súa
continuidade no eido empresarial, especialmente no que atinxe á informática e
ás telecomunicacións”.
O Concurso divídese en 2 modalidades: a modalidade A para os títulos de
Enxeñaría en Informática, Enxeñaría de Telecomunicación e Traballos de Fin de
Máster de posgraos oficiais relacionados coas TIC, e a modalidade B para os
títulos de Grao en Enxeñaría Informática, Grao en Enxeñaría de Tecnoloxías de
Telecomunicación, Enxeñaría Técnica en Informática e Enxeñaría Técnica de
Telecomunicación. A dotación económica dos tres primeiros premios da Modalidade
A será de 500, 200 e 100 euros respectivamente; e na Modalidade B será de 350,
150 e 100 euros.
O rexistro a este concurso estará aberto até o 21 de novembro ás 12:00 horas e
farase público o resultado o 2 de decembro, estando dispoñibles as súas bases
en formato PDF.
- Presentación do certame no Pazo Provincial de Ourense