Un cento de profesionais participaron na xornada de introdución a DevOps organizada polo CPEIG
venres, 7 de xullo do 2017
O Colexio Profesional de
Enxeñaría en Informática de Galicia organizou o pasado 29 de xuño
unha xeira de traballo destinada a espallar coñecemento arredor do
emprego da tecnoloxía de contedores. A xornada, que contou co
patrocinio de HPE e a colaboración de ABANCA, contou coa presenza
dun cento de persoas. Celebrouse en Santiago e, en palabras do CPEIG,
resultou un “novo éxito de convocatoria” do colexio, que, para
quen non o saiba, está mergullado esta tempada na celebración dos
seus dez anos de andaina. A
xornada Introdución a DevOps, uso de microservizos e tecnoloxías
de contedores achegou unha
manchea de claves sobre un tema que, en palabras do CPEIG, “resulta
de máxima actualidade para o sector TI”.
O presidente do colexio,
Fernando Suárez Lorenzo, abriu o foro reivindicando a relevancia de
DevOps como un “movemento cultural e profesional que prima a
comunicación, a colaboración e a integración entre os
desenvolvedores de software e os operadores de sistemas de IT”.
Suárez mencionou tamén dos retos e oportunidades que se xeran ao
redor das innovadoras tecnoloxías de contedores, que “lles axudan
ás empresas e ás administracións a ser máis áxiles, competitivas
e aliñarse rapidamente coa nova mentalidade dixital”.
Erik van Ommeren,
analista da empresa Gartner, abriu a quenda das intervencións co
tema Design thinking and Innovation., No seu relatorio
analizou os factores para o éxito con DevOps: enfoque empresarial,
cambio cultural, mellora continua, desenvolvemento áxil e
automatización. Tamén fixo fincapé nun elemento imprescindíbel
para o cambio sexa efectivo: que este debe atinxir a toda a
organización, non só aos departamentos tecnolóxicos, e que cómpre
traballar en conxunto.
A continuación, o
director executivo de Torusware, Guillermo López, introduciu os
asistentes ao “concepto DevOps” e afondou nos porqués do
compoñente “axilizador” dos contedores. Tamén dixo que DevOps
representa” unha nova filosofía baseada na comunicación e na
colaboración, así como na innovación continua e na axilidade”.
Pola súa banda, Ramón
Gordillo, arquitecto de solucións de Red Hat, abordou o relatorio
DevOps, contedores e aplicacións cloud nativas, e
o category manager de HPE, Pablo Ráez, explicou as
vantaxes da infraestrutura como código para contornas DevOps.
O encontro finalizou coa
mesa redonda Aplicación e uso de DevOps e tecnoloxías de
contedores na empresa e administración. Moderada por Guillermo
López, participaron no debate Miguel Ares, de Altia; Antonio Bueno
Iglesias, do SERGAS; Fernando Suárez, da AMTEGA e José Otero, de
Gradiant.