Un Xeoportal fará accesible a información territorial de Galicia e Norte de Portugal
martes, 1 de marzo do 2011
Este luns o director
xeral de Sostibilidade e Paisaxe, Manuel Borobio, que presentou xunto co
secretario xeral do Eixo Atlántico, Xoán Vázquez Mao, un proxecto de
cooperación transfronteriza na Eurorrexión Galicia-Norte de Portugal, en
asociación co Eixo Atlántico do Noroeste Peninsular, que ten como obxectivo
definir un modelo para a planificación e xestión territorial da Eurorrexión,
denominado Desourb, que conta cun orzamento de algo máis de 1,5 millóns de
euros, do que o 75% é financiado polo fondo estrutural FEDER.
Entre os obxectivos
deste proxecto destaca a posta en marcha dun instrumento novo que porá a
disposición dos interesados a información detallada de todo o territorio da Eurorrexión.
Deste xeito, toda a información territorial susceptible de ser representada
(estradas, entidades de poboación, usos do solo ou espazos protexidos por
exemplo) estará
contida nunha ferramenta, o Xeoportal, que permitirá mellorar a toma de
decisións en materia de planificación territorial sostible.
A Xunta de Galicia
entende este proxecto como o medio e a oportunidade para facer máis real a
proposta que xa se formulou coas Directrices de ordenación do territorio (DOT)
e o Plan de ordenación do litoral (POL), a xestión dinámica da planificación e
das actuacións territoriais. Esta xestión dinámica non é outra cousa que a
monitorización do territorio ao longo do tempo, e dunha forma transparente e
áxil, para poder avaliar se as propostas de planificación e estratexias postas
para a sustentabilidade territorial (DOT e POL), acadan os seus obxectivos. O
acceso e a xestión da información, no seu senso máis global, será posible a
través do Xeoportal e a súa xestión continua no tempo permitirá que os
instrumentos de planificación e as actuacións sexan coherentes coa evolución da
realidade ambiental, social e económica.