UCGAL pide máis debate ao abeiro da lei de protección dos dereitos dixitais
luns, 16 de xullo do 2018
O
Proxecto Lei de Protección de Datos para abordar os dereitos
dixitais que están incluídos nas dúas emendas do PSOE sobre
liberdade de expresión e dereito ao esquecemento están a xerar
polémica. Sen ir máis lonxe, a Unión de Consumidores de Galicia
(UCGAL), a Asociación de Internautas (AI) e a Asociación pro
Dereitos Civís, Económicos e Sociais (ADECES) veñen
de pedir a súa retirada e de expresar a súa “preocupación pola
instrumentalización da tramitación do proxecto”.
Amais
do seu desbotamento, tamén solicitan que se abra un debate sobre os
citados dereitos, unha fonda análise colectiva que achegue os
mellores precedentes e alicerces para calquera regulación posterior.
As
tres asociacións consideran “un erro” sustentar a veracidade
informativa (e con ela a eliminación dos contidos dixitais) na
“previa queixa ou aviso”, unha queixa ou aviso que de vir dunha
persoa ou ente interesado, podería ser a orixe de conflitos e
problemas relacionados cos piares básicos da liberdade da
información. Segundo engaden, “este proceder traslada o poder
desde os responsábeis dos medios dixitais aos afectados pola
información”, co que se lles estaría dando a estes a capacidade
de “neutralizar calquera contido informativo”. En base a isto,
engaden, ábrese un proceso que desnaturalizaría o propio dereito á
información. As entidades tamén explican que este dereito non se
pode subordinar a protocolos do devandito carácter, ou á Lei de
Protección de Datos.