Twitter compra TweetDeck por máis de 40 millóns de dólares

TweetDeck é o cliente de escritorio de Twitter máis empregado, nunha imaxe de Bwana McCall

Distintos medios especializados en información económica están a dar conta da adquisición de TweetDeck por parte de Twitter por unha cantidade superior aos 40 millóns de dólares (parte en efectivo e parte en accións), pondo fin ás especulacións sobre esta operación que levaban escoitándose dende hai varios meses pois, ao parecer, o acordo de compra formalizouse onte.
Nos últimos tempos Twitter xa realizou outras adquisicións semellantes, como cando mercou a aplicación de pagamento Tweetie para iOS e converteuna no cliente oficial de Twitter para iPhone (pasando a ser de balde). TweetDeck, pola súa banda é o cliente de escritorio de Twitter de maior sona (contando tamén con versións móbiles, aínda que menos populares) e con esta operación Twitter estaría a fornecer a súa presenza fóra da web, o que podería supor unha serie ameaza para os desenvolvedores doutras aplicacións cliente do seu servizo (cos que xa houbo múltiples conflitos nos últimos meses).