Televés presenta novos dispositivos tecnolóxicos con prestacións á medida das demandas actuais
mércores, 2 de maio do 2012
Televés segue a marcar o paso firme que iniciou no sector moito antes de
que a Televisión Dixital Terrestre deixara de ser unha utopía no noso país, fabricando
equipos para a recepción e distribución do sinal que melloran a experiencia
tanto do usuario como do técnico instalador, ao facilitarlle o seu labor con
dispositivos doados de usar.
Desta volta, coincidindo coa incipiente reubicación das frecuencias que se
vai levar a cabo en breve, vén de lanzar unha nova gama de amplificadores
monocanle T.12, que ademais de levar o selo LTE Ready de Televés, aportan,
segundo afirman, “un inmellorable
rendemento no tratamento do sinal, cuns axustes de frecuencia precisos e
sinxelos”.
Estes amplificadores monocanle T.12 preséntanse en once referencias e son
unha evolución avanzada da súa liña de produto anterior, mellorando a
fiabilidade e estabilidade que ofrecían.
A maiores ofrecen alimentación remota de previos e son compatibles co
modelo anterior T.03, respecto do que se mellorou substancialmente o deseño da
blindaxe e a súa fonte de alimentación, que agora pode dar servizo ata a 24
módulos.
Tecnoloxía naval para a mellora das
telecomunicacións
As achegas da
firma compostelá para este mes de maio non rematan coa nova gama de
amplificadores, e no marco do Plan NP100 para poñer no mercado un cento de
novidades de produto en 18 meses, tamén lanzou a torre Q1500, fabricada en
aceiro inoxidable de alta pureza e cun deseño totalmente innovador, baseado en
tecnoloxía naval.
Esta torre alcanza os 14,5 metros de altura con tan só 1,5 metros de radio,
“o que supón aforrar 401 metros cadrados
en terreo para a instalación respecto a un equipo convencional de similares
características”, aseguran.
Grazas aos materiais empregados, ao seu deseño e á tecnoloxía de
fabricación de Televés, a Q1500 ten unha duración practicamente ilimitada, á
que hai que engadirlle a súa resistencia mecánica, rixidez torsional e unha
gran facilidade de manipulación e montaxe, cun novo sistema de racores que
simplifica a unión entre os tramos.
Polas súas “extraordinarias características, altas prestacións e baixo
mantemento”, din dende Televés que está recomendada para a súa instalación en
zonas onde as torres que soportan antenas poidan supoñer un risco para as
persoas, como colexios, hoteis, urbanizacións ou mesmo vivendas unifamiliares;
e tamén pode ser empregada para a instalación de antenas de radioafeccionado.
A súa resistencia aos axentes atmosféricos converten á nova Q1500 nunha
torre ideal para zonas de alta salinidade ou contaminación industrial.