Telefónica pechou 2014 cun beneficio neto de 3.001 millóns de euros

Telefónica presenta hoxe os resultados correspondentes ao peche do exercicio 2014, un ano no que a compañía deu pasos crave e obtivo resultados visibles na súa estratexia de transformación cara a unha grande empresa dixital de telecomunicacións. Así, tanto o investimento coma a xestión da carteira de activos enfocáronse en incrementar o seu posicionamento competitivo en segmentos e mercados de maior valor, traducíndose nunha aceleración do crecemento dos ingresos ao longo do ano. Ao mesmo tempo, continuouse cunha estrita xestión dos custos e obtivéronse aforros importantes derivados da simplificación do novo modelo operativo, de tal forma que o OIBDA do exercicio volveu ao crecemento en termos orgánicos.
Os ingresos suman no conxunto do ano 50.377 millóns de euros e consolidan, no cuarto trimestre, unha aceleración xeneralizada do crecemento orgánico en case todos os países. Así, esta partida crece, en termos orgánicos, o +5% entre outubro e decembro e increméntase o +2,6% no conxunto do ano. Ao mesmo tempo, as medidas de eficiencia e simplificación sitúan a rendibilidade en niveis sólidos, cun OIBDA de 15.515 millóns de euros (+0,2% interanual orgánico) e unha marxe de OIBDA do 30,8% no conxunto do ano.
Con todo iso, o beneficio neto de Telefónica a peche de 2014 suma 3.001 millóns de euros (-34,7%), afectado por varios impactos extraordinarios, que se produciron especialmente no cuarto trimestre. Descontando todos os efectos extraordinarios do conxunto do ano, o beneficio neto consolidado alcanza os 4.462 millóns de euros (-18,6%).
No informe de presentación de resultados, o presidente de Telefónica, César Alierta, subliñou que "os resultados do cuarto trimestre de 2014 supoñen a culminación dun período de intensa transformación que permitiu reforzar a compañía, o seu potencial de crecemento e a súa posición financeira en algo máis de dous anos,".
Tamén explicou que "esta transformación se produce dende as bases do negocio, grazas a un intenso esforzo investidor que nos permitiu adaptarnos á evolución das necesidades tecnolóxicas dos nosos clientes caracterizadas por un uso cada vez máis intensivo dos datos,".