Telefónica lembra que máis da metade os galegos accede decote á Rede
mércores, 28 de setembro do 2011
Telefónica, o operador elixido
para o desenvolvemento da nova fase do Plan de Banda Larga da Xunta, en
detrimento dos operadores galegos, fixo públicos este mércores en Santiago, no
Hostal dos Reis Católicos, os datos do seu informe Galicia Sociedade Dixital, un estudo que, como o seu propio nome
indica, constitúe unha análise da nosa situación no mundo TIC. O informe, en
cuxa presentación tamén participou Mar Pereira (tal e como
sinalamos nesta mesma web), sinala que máis da metade dos galegos accede
decote a Internet, taxa que sube até o 85% entre a mocidade e ao 97,3% nas
empresas.
Con todo, estes e
outros datos tamén indican, directa ou indirectamente, que nos separa unha
distancia coa media estatal e europea en afianzamento TIC. Loitar contra isto
será, en opinión de Telefónica, o obxectivo do seu traballo no Plan de Banda
Larga. A presentación contou, entre outros representantes da empresa, coa
presenza do director territorial Norte de Telefónica España, Javier Zorrilla,
quen quixo destacar “o compromiso” da
súa empresa coa nosa terra no despregue da infraestruturas de acceso á Rede. Zorrilla
recordou que ao abeiro do devandito plan inclúese levar banda larga ao noso
rural “coa tecnoloxía UMTS-3G a 11.300
novos núcleos de poboación onde residen case 250.000 persoas, ás que cómpre
sumar outros 728.000 galegos que verán mellorada a súa cobertura de datos a
partir de agora”.
Volvendo ao
informe, dicir que Zorrilla destacou o feito de que máis da metade da cidadanía
galega poida acceder a Internet de xeito cotiá, e que, desta porcentaxe,
arredor do 52%, accede para contactar coas administracións públicas, “o que supón un 5% máis cá media do Estado”. A
maiores, sinalou, case a metade dos nosos fogares teñen arestora conexión, e
desta taxa, o 96% conta con banda larga. “Esta
penetración de Internet”, sinala Telefónica, “elévase moito nas empresas, pois o 97,3% delas ten acceso á Rede e a práctica
totalidade faino con banda larga, xa sexa fixa ou móbil”.