Telefónica investiu 250.000 euros en dotar de FTTH aos polígonos de Lugo
xoves, 6 de novembro do 2014
Teléfonica deu conta
hoxe do
estado de cousas dos seus traballos de despregamento de fibra FTTH
nos polígonos da cidade de Lugo, un parte informativo que
cómpre sumar ao referente a Santiago recentemente emitido.
Segundo fai saber a operadora, unha parte moi considerábel das
empresas da Cidade da Muralla, emprazadas nos polígonos do Ceao e
das Gándaras, ten xa ao seu alcance a tecnoloxía de Fibra Óptica
Até o Fogar (FTTH polas súas siglas en inglés). Falamos en total
de 658 firmas, “o que supuxo a instalación de case 20.000 metros
de fibra e 247 puntos de conexión óptica”, explica a compañía,
que tamén engade que se instalaron ou adaptaron 66 arquetas e máis
de 200 postes. Todo iso supuxo un investimento aproximado de 250.000
euros.
Para a empresa española
de telecomunicacións, non cabe dúbida de que estes traballos van
permitir o acceso “á tecnoloxía de transmisión de datos máis
rápida e eficiente do mercado”. Neste senso, Telefónica destaca
que a FTTH de seu ten a particularidade de que é quen de chegar até
as propias oficinas das empresas, ou sexa, explica, “que non se
emprega cobre ou coaxial no último treito e, por tanto, non existe
perda de velocidade”. E engade: “Ten un ancho de banda ilimitado
e simetría na baixada e suba de datos, ademais dunha gran
estabilidade e unha taxa de avarías moi baixa con respecto a
calquera outra tecnoloxía”.
Telefónica tamén lembra
que investirá en Galicia este ano 48 millóns de euros en
infraestruturas de última xeración e ao final de ano levaría fibra
óptica até o fogar a 351.844 vivendas galegas e zonas industriais.