Telefónica España captou o 99% das altas en fibra óptica realizadas ata o pasado xuño
martes, 11 de setembro do 2012
As vantaxes que achega a fibra óptica
fronte ao ADSL (velocidade simétrica, maior velocidade, mellor oferta de
servizos conxuntos...) fan que cada vez sexan máis os usuarios que deciden
apostar por esta tecnoloxía, malia que ata o de agora só se poida gozar dunha
boa relación calidade-prezo nas principais cidades do país.
Aquí en España, segundo datos publicados
pola Comisión do Mercado das Telecomunicacións (CMT), ao remate do primeiro
semestre do ano había un total de 241.121 usuarios de fibra óptica, dos cales o
96% están xestionados por Telefónica.
E é que a nosa operadora máis
internacional captou no primeiro semestre do ano máis de 69.500 novos clientes
no seu negocio de fibra óptica, acadando a finais de xuño os 232.512 clientes.
Isto significa que a compañía absorbeu o
99% do total das altas rexistradas no mesmo período no ámbito da fibra óptica,
acadando un impulso difícil de repetir por parte doutra operadora.
O avance de Telefónica neste
negocio “coincidiu coa aceleración da
actividade de despegue de infraestruturas e de promoción nas principais cidades
españolas, como Madrid, Barcelona e Valencia”.
Agora Telefónica, que puido compensar
lixeiramente o retroceso que sufrira no ADSL, vén de anunciar que investirá
preto de 320 millóns de euros en fibra óptica este ano, fronte aos 256 que
investiu en 2011, a fin de poder manter o ritmo ata 2015 “para que a metade dos fogares españois teñan acceso a Internet a unha
velocidade de 100 megas”, afirmou.
Para levar a cabo esta “misión tecnolóxica”,
a compañía deberá investir preto de 900 millóns de euros entre 2013 e 2015.