Telefónica, CaixaBank e Santander sentan os alicerces dunha nova compañía centrada en novas oportunidades TIC

César Alierta, presidente de Telefónica, nunha imaxe recente de EFE

CaixaBank, Santander e Telefónica veñen de asinar un acordo para o afianzamento dunha sociedade conxunta que impulse novas oportunidades de negocio TIC. A alianza, segundo as partes implicadas a primeira destas características que se leva a cabo en Europa (unindo entidades financeiras e unha operadora de telecomunicacións a prol de novos servizos dixitais), iniciará a súa actividade coa xestión dunha comunidade en liña que facilite a relación entre comerciantes e consumidores en materia de ofertas, descontos e promocións. Esta comunidade será unha nova ferramenta para potenciar as vendas dos comercios, engaden.
A maiores, a compañía conxunta traballará nunha carteira dixital que permitirá aos seus usuarios acubillar tódalas tarxetas de seu. Polo tanto, serviralles non só para identificarse nos establecementos comerciais, senón tamén para levar a cabo compras na comunidade dixital. Tamén lles achegará un servizo de pagos de diñeiro de persoa a persoa (P2P) a través do móbil.
A nova compañía informou que ten programado abrir en breve un proceso de espallamento a outros países, “dada a extensa presenza internacional dos socios e a actual oportunidade de mercado para novos servizos ligados á dixitalización”. O acordo tamén asenta os alicerces para a incorporación de novos socios, que poidan achegar recursos tanto para o desenvolvemento de servizos como para o medre internacional, así como a posibilidade de que outras entidades poidan ofrecer os servizos da nova sociedade. O acordo, informa Telefónica, permitirá á compañía que se creará entre CaixaBank, Santander e Telefónica “desenvolver proxectos de innovación no ámbito dos negocios dixitais, co potencial de chegar, soamente en España, a máis de 600.000 comercios”.
Para José María Álvarez-Pallete, conselleiro delegado de Telefónica, o acordo asinado responde á fonda transformación que está a sufrir o noso comportamento á hora de mercar: “As tecnoloxías dixitais están a mudar como os consumidores buscan os produtos e identifican os mellores prezos, promocións e descontos. Esta nova compañía combina o experiencia en servizos tecnolóxicos e financeiros dos seus socios para crear un ecosistema tanto para o beneficio dos consumidores como do comercio”.