Tecnoloxía galega no concurso de Oulu para crear a cidade dixital do futuro
xoves, 16 de xuño do 2011
- Unha vista de Oulu, achegada por Antía Fernández
Hai presenza galega
entre os catro finalistas seleccionados no concurso UBI
Challenge da Universidade de Oulu, Finlandia, encamiñado a
recoñecer as máis salientábeis propostas internacionais para a
creación e posta en marcha dunha cidade intelixente. Segundo nos
conta Gradiant, esta achega
nosa vén da man da Universidade de Vigo e máis do dito centro de
investigación, emprazado precisamente no Campus vigués. A proposta
galega no certame UBI (Urban Interactions), destaca grazas en boa
medida grazas á súa aposta por un espazo urbano onde o cidadán
interactúa coa informática ou a computación de xeito natural e
transparente. Subliñar que o programa UBI, no que se insire o
concurso, diríxese a habilitar un prototipo funcional dunha urbe
intelixente e sustentábel, arela materializada xa nunha
infraestrutura innovadora de todo tipo de equipamentos e servizos na
devandita localidade finesa.
Co certame do que estamos
a falar, a Universidade de Oulu quere convidar a toda a comunidade
científica mundial a colaborar activamente na súa iniciativa co
envío masivo de propostas. Segundo nos conta Gradiant, de tódalas
recibidas escolléronse catro para ser desenvolvidas, integradas e
probadas en Oulu, sendo unha delas a achegada pola Universidade de
Vigo e o centro galego de investigación, de nome RunWithUs. As
restantes veñen da man da comunidade tecnolóxica de Grecia, Suíza
e Alemaña.
“Nos últimos anos”,
coméntase dende Gradiant ao fío da súa proposta, “estamos
a asistir a continuos cambios nos modos de interacción entre persoas
e computadores, afastándonos do modelo tradicional
escritorio-ordenador e da man de teléfonos móbiles e tablets con
conexión permanente a Internet”.
Con todo, a evolución non fica nese punto, e os sistemas de
procesado de información intégranse cada vez máis nosas tarefas
cotiás e nos dispositivos que empregamos para realizalas. “Este
novo modelo de interacción entre persoas e sistemas de procesado de
datos chámase computación ubicua”,
engade.
As faces desta integración son moitas e diversas,
tendo en conta a longa listaxe de espazos nos que se pode dar (fogar,
oficina, vehículo, escenarios públicos, rúa, cidade) e os
dispositivos postos en xogo. Albiscar as posibilidades disto, ver até
onde podemos chegar, adiantar vantaxes para a nosa calidade de vida é
un dos obxectivos da Universidade de Oulu, que pon a disposición da
comunidade investigadora mundial a súa infraestrutura para que
aquela poida deseñar, probar e avaliar as súas aplicacións sobre
un contorno real e despregado sobre toda unha cidade. A raizame
disto, convocouse en 2010 o concurso UBI Challenge, no que se facía
un chamamento para o envío de propostas. De todas as recibidas,
escolléronse catro para probalas virtual e fisicamente en Oulu,
sendo unha das escolmadas a viguesa.
“Tanto en Gradiant
como na Universidade de Vigo”,
engade o centro de investigación, “estamos
a traballar en temas relacionados coas cidades intelixentes, temos
varios proxectos nesta liña e participar neste desafío coa
Universidade dábanos a oportunidade de colaborar con grupos doutros
países”, sinala Javier
González, director da área de Redes e Aplicacións de Gradiant. E
continúa Felipe Gil , coordinador do proxecto e profesor da
Universidade de Vigo, logo da experiencia levada a cabo na cidade
viguesa: “É estupendo poder
probar a aplicación nun escenario real, Oulu ten uns 3.000 puntos de
acceso Wi-Fi por toda a cidade, Bluetooth, redes de sensores,
displays... Non hai moitas cidades así no mundo, e todo isto permite
facer probas de validación fóra do laboratorio”. Segundo
engade, a aplicación galego presentou “como
é lóxico” algúns
erros, pero o grao de satisfacción é alto.
A
previsión é seguir traballando no proxecto até xullo, mes no que
as aplicacións faranse visíbeis e ficarán dispoñíbeis para o uso
de tódolos cidadáns de Oulu. Ao longo de xullo e agosto, xuntarase
toda a información sobre o uso destas ferramentas e, a finais do
verán, os equipos presentarán resultados. Un pouco máis adiante,
na recta final de 2011, daranse a coñecer os resultados nun congreso
en Pequín.
RunWithUs
A
aplicación galega é un servizo creado para motivar aos cidadáns na
práctica do deporte. Pon en xogo unha rede social na que os usuarios
poden compartir as súas actividades de adestramento e os resultados
coas súas amizades e competir con elas. Os destinatarios deste
recurso rexístranse nos displays espallados por toda a cidade
e a través das infraestruturas Wi-Fi de Oulu e dos seus propios
dispositivos dotados con acceso sen fíos. Os resultados fican
rexistrados, con información relativa á duración, velocidade e
percorridos. Ao mesmo tempo, poderán compartir os seus rexistros e
acceder aos dos seus contactos, como por exemplo as súas rutas
favoritas. As persoas inscritas poden consultar tamén cales dos seus
amigos está a facer deporte nese intre.
Os
proxectos seleccionados
1.
RunWithUs, Universidade de Vigo e
GRADIANT
2.
Clio, Research Academic Computer
Technology Institute (Grecia)
3.
Digifieds, University of Lugano
(Suiza)
1.
Funsquare, University of
Duisburg-Essen (Alemaña)