Tecnocom obtén de mans de SAP un premio á calidade dos seus servizos

Tecnocom, unha empresa con forte presenza de profesionais da nosa terra (procedentes de Softgal, na súa meirande parte, agora integrada en Tecnocom), vén de obter un importante recoñecemento a nivel nacional pola súa aposta de calidade nos seus servizos tecnolóxicos e de consultoría TIC. O recoñecemento veu da man de SAP España, que celebrou este 15 de febreiro en Madrid a súa reunión anual de socios, unha xuntanza que deu acubillo a máis de 200 profesionais.
No transcurso do encontro, os directivos de SAP fixeron un percorrido polos froitos máis salientables dos seus socios de canle durante o pasado ano, ao tempo que avanzaron algunhas das liñas a seguir en 2011. Asemade, resolveu os seus Premios á Excelencia, dirixidos a identificar o máis destacado da produción TIC dos seus partners e, asemade, as mellores estratexias para comercializar solucións para empresas de SAP. Na categoría SAP All-in-One, a empresa decidiu premiar a Tecnocom Servizos e Aplicacións, pola “mellor xestión de calidade e satisfaccións aos clientes”, sinalou. Asemade, engadiu, Tecnocom é o socio con mellor resultado na enquisa de satisfacción de usuarios, e acadou a certificación AQM de Active Quality Managenment “que acredita a súa aliñación cos principios de calidade de SAP nos procesos de venda e soporte”.
Tecnocom, con sedes na Coruña, Vigo ou Santiago, é unha multinacional española que centra unha boa parte da súa actividade nas tecnoloxías da información, sector que encabeza a nivel estatal en materia de ingresos (arredor de 400 millóns). Máis polo miúdo, a empresa (que é socia de Ineo) ten unha ampla experiencia en operacións “de elevado nivel tecnolóxico”, como medios de pago bancarios ou sistemas de automatización.