Tecalis pon a disposición do Concello de Ames unha aplicación móbil para axudar ao comercio local
martes, 16 de xuño do 2020
A
empresa
tecnolóxica Tecalis Innovación, con sede no Polígono de Milladoiro
(Ames), formalizou este martes a cesión da súa aplicación móbil
ao Concello, con vistas a botar a poñer a ferramenta a servizo
das empresas e axudalas a superar a crise económica derivada da
pandemia. Na cesión oficial da app participaron o alcalde de
Ames, Jose Miñones, a concelleira de Promoción Económica e
Emprego, Ana Belén Paz, director de Operacións de Tecalis Alberto
Campos, e máis a directora de Desenvolvemento Corporativo da
devandita empresa TIC, Berta Caro. Segundo fixeron saber os
responsábeis de Tecalis, a ferramenta porase a disposición do
Concello e do tecido produtivo local totalmente de balde.
Campos
e Caro explicaron que a aplicación achegará ás empresas unha
tecnoloxía innovadora para a xestión das súas citas cos clientes,
permitíndolles evitar as longas colas e a exposición directa e a
interacción innecesaria con outras persoas nos devanditos
establecementos, e todo isto mediante unha plataforma que axusta e
planifica os ocos na axenda das persoas coas citas que queiran
xestionar nos diferentes negocios do seu interese (barbería,
dentista...).
Mediante
esta plataforma, que será gratuíta para os seus usuarios/as, unha
mesma persoa pode xestionar á vez diferentes citas en diferentes
establecementos e negocios pertencentes ao concello de Ames (cun só
rexistro ten todas as súas citas diarias, semanais e mensuais nos
diferentes centros).
Ademais,
engadiron, os usuarios poderán elixir os seus horarios de
preferencia para que o establecemento lles reserve un oco nesas
franxas horarias dispoñíbeis, e poderán bloquear horarios a outros
establecementos, cando xa ten pechada outra cita noutro negocio.
“Isto”, sinalouse no acto deste martes 16, “permítelles ser
atendidos dun modo individualizado na franxa horaria exacta definida,
sen colas nin esperas derivadas doutros servizos a outros clientes”.