TELGalicia promove entre os estudantes a ciencia da programación de computadores “tamén en galego”
xoves, 6 de novembro do 2014
- O profesor Manuel Caeiro, coordinador da rede de investigadores TELGalicia
Co
gallo da quinta edición do Día da Ciencia en Galego (o pasado 4 de
novembro) nestes días estanse a desenvolver numerosos actos nos
centros educativos, nas universidades e noutras institucións que
pretenden que o alumnado
aprenda ciencia sen ningún tipo de prexuízos, nin sobre a ciencia,
nin sobre as posibilidades de aprendizaxe da ciencia en calquera
idioma. E neste marco científico-galego, a Coordinadora
Galega de Equipos de Normalización e Dinamización Lingüística e a
rede de investigadores TELGalicia
organizou unha videoconferencia na que o profesor da Escola de
Enxeñaría de Telecomunicación e coordinador da rede, Manuel
Caeiro, achegou
a máis de 4200 alumnos do 2º ciclo de ESO e Bacharelato de 75
centros escolares de toda Galicia a ciencia da programación de
computadores "tamén en galego”.
Deste xeito, na súa
intervención Caeiro introduciu a historia da programación de
ordenadores dende a orixe do algoritmo dos árabes pasando por Ada
Lovelace e Alan Turing para chegar á estrutura dos computadores
actuais e os paradigmas de computación máis empregados, amosándolle
ao alumnado ferramentas coas que é moi doado programar (ferramentas
Scratch e Squeak), para que poidan facer, tamén en galego, os seus
programas. Asemade, alumnos e alumnas tiveron tamén a oportunidade
de dirixirlle preguntas de xeito sinxelo a través dun chat na propia
sala virtual da videoconferencia.
Engadir,
por último, que os colectivos convocantes (Agapema, Apetega e
Enciga) e as institucións e entidades que se suman a esta data
reivindicativa (4 de novembro), como a propia coordinadora e
TELGalicia, expresaban deste xeito que as linguas -neste caso o
galego- apréndense usándoas en todos os contextos.