Siri permite enviar cartos a través de PayPal

Aínda que esteamos afeitos a empregar PayPal como plataforma de pagamentos seguros na Internet, a súa razón de ser é o intercambio de cartos entre particulares e, de feito, a compañía prevé que moverá máis de 17 millóns de dólares entre persoas durante o vindeiro mes de decembro e, para facelo aínda máis doado, vén de estrear a integración de PayPal en Siri, de xeito que os usuarios de iPhone e iPad con iOS 10 poderán enviar cartos dun xeito extraordinariamente doado: mediante ordes de voz do estilo “manda 15 euros a Laura usando Paypal”.
Esta nova funcionalidade está activa en 30 países e varias linguas incluíndo Australia, Austria, Bélxica (en francés e holandés), Brasil (deixando fóra a Portugal), Canadá (en inglés e francés), China, Dinamarca, Finlandia (en finés), Francia, Alemaña, Hong Kong (en cantonés), India, Israel (en hebreo), Italia, Xapón, Malaisia (en malaio), México, Países Baixos, Nova Zelandia, Noruega, Rusia, Arabia Saudí (en árabe), Singapur (en inglés), España (só español), Suecia, Suíza (en francés, alemán e italiano), Tailandia, Reino Unido, Emiratos Árabes Unidos (en árabe) e EE.U.
Para gozar da integración de Paypal con Siri só sería preciso instalar e configurar a última versión da aplicación de PayPal para iOS.