Senén Barro participa como experto na iniciativa do Senado para lexislar a transformación dixital
martes, 27 de abril do 2021
Senén
Barro, director científico do CiTIUS, centro de investigación da
USC centrado nas posibilidades das tecnoloxías de Intelixencia
Artificial, participa como experto na iniciativa do Senado para
lexislar o proceso de transformación dixital de España.
O
responsábel científico do CiTIUS e ex reitor da USC acudiu como
autoridade convidada ao Relatorio de estudo sobre a adopción
dunha regulación das novas realidades tecnolóxicas, disruptivas e
sociais, promovido pola Comisión de Asuntos Económicos e
Transformación Dixital do Senado. O obxectivo é elaborar un informe
que sirva de base para adoptar unha regulación das novas realidades
tecnolóxicas, disruptivas e sociais, ante o desenvolvemento e
implicación que a cuarta Revolución Industrial vai ter na vida da
cidadanía.
Segundo
confirmou o CiTIUS, o relatorio está a convocar a autoridades, a
representantes de organizacións públicas e privadas e a persoal
experto na materia, entre eles o director científico do centro da
USC. En última instancia búscase redactar un estudo completo que
“dea cabida tanto á información máis actualizada, precisa e
obxectiva posíbel, como ás conclusións e recomendacións dirixidas
á elaboración da devandita regulación na materia”, explica o
CiTIUS.
Ao
longo da súa alocución, centrada no Uso intelixente da
Intelixencia Artificial na automatización do traballo, Barro
reflexionou sobre o proceso de automatización como algo
“inevitábel”, incidindo en que para acadar os resultados máis
enriquecedores para todos os ámbitos sociais implicados non debemos
“deixar que simplemente ocorra, que se estenda sen maior espírito
crítico e recursos de anticipación para aproveitar todo o que de bo
pode achegar”. Para o ex reitor da USC, “a automatización do
traballo irá cambiando progresiva pero aceleradamente o perfil e a
actividade dos traballadores e das empresas, cuxa competitividade, e
mesmo supervivencia, dependerá cada vez máis da súa capacidade
para incorporar de xeito eficaz as tecnoloxías intelixentes nos seus
produtos, servizos, procesos e modus operandi”.
E
engadiu: “As organizacións e, sobre todo, os gobernos, deben ser
conscientes de todo iso e anticipar as medidas que poidan paliar os
efectos non desexados deste imparábel proceso”.
En
palabras do catedrático da USC, as claves principais para o
devandito sitúanse no seguinte: 1) a educación; 2) a innovación
que han de desenvolver as organizacións ao redor das tecnoloxías
intelixentes; e 3) a implantación de políticas públicas que
incidan positivamente nas anteriores e despreguen ademais o necesario
amparo socioeconómico a aqueles que de xeito inevitábel se verán
desprazados ou desfavorecidos polo constante avance da automatización
do traballo.