Seis firmas galegas acoden á feira IBC de Amsterdam sobre medios electrónicos e audiovisual
mércores, 5 de setembro do 2012
O IBC, o
mercado internacional europeo dos medios electrónicos e escaparate de primeira
liña sobre a innovación aplicada aos novos xeitos de comunicármonos (o amplo
terreo de colaboración no que se asentan, cada vez máis, novas tecnoloxías e
audiovisuais) contará na súa edición 2012 cunha máis que ampla representación
galega. Así nolo conta o Clúster Audiovisual
Galego (CLAG), que participará dende este xoves, até o vindeiro 11 de
setembro, a través das empresas Arantia 2010, Cinfo, CTV, Gallega de Circuitos
Electrónicos, Ingeniería de Sistemas de Funcionamiento e Voz Audiovisual. A
cita é en Amsterdam e ao seu abeiro as firmas galegas promoverán os seus
produtos e servizos perante a industria mundial dos medios de comunicación
electrónicos, sinala o CLAG.
A asistencia a este mercado, engade, está cofinanciada
polo Instituto Galego de Promoción Económica (IGAPE), a través dun convenio de
colaboración co Clúster Audiovisual Galego para elevar o nivel de internacionalización
das empresas do sector, vixente dende o ano 2010. Lembrar que o convenio de
colaboración entre o IGAPE e o CLAG contempla aínda outras accións para este
ano como a asistencia aos mercados Cartoon Forum e MIPCOM. A presenza dos selos
galegos en Amsterdam e nos outros eventos devanditos permitiralles “crear novas oportunidades de negocio e
coñecer de primeira man as tendencias e innovacións no eido dos medios
electrónicos”.
Segundo informa o Cluster co fin de que nos
fagamos unha idea da importancia de encontros profesionais como o IBC, trátase
esta dunha das citas máis importantes no almanaque para a industria mundial dos
medios audiovisuais. Neste 2012 prevese que participen na principal conferencia
e exposición anual dos medios electrónicos máis de 50.000 profesionais do
devandito sector da comunicación dixital e do lecer.