Segundo avanza IBM, os computadores poderán ler o pensamento nun prazo de cinco anos

Os computadores, nun prazo relativamente breve de tempo, poderán ler o noso pensamento. Isto, un agoiro de IBM, poderá ter moitas consecuencias positivas para o noso desenvolvemento, aínda que tendo en conta parámetros sobre os nosos gustos e inquietudes como os relativos aos programas máis vistos da televisión, é probable que desemboque, para comezar, en moito tempo libre para os computadores. Bromas aparte e segundo avanza IBM no blog asmarterplanet.com e e en medios españois como El País, a lectura da nosa actividade intelectual poderá ser posible grazas ao rexistro dos procesos eléctricos do noso cerebro a través das máis innovadoras tecnoloxías.
A idea é moito máis positiva do que parece, xa que tería unha gran potencialidade nas persoas con diversidades funcionais ou motrices, persoas dependentes ou en proceso de rehabilitación que, a través de sinapsis eléctricas naturais recollidas e interpretadas por equipamentos informáticos, poderán levar a cabo labores como facer unha chamada de teléfono ou ben avanzar no seu camiño cara a recuperación. A predición de IBM, que se acompaña dun escenario futuro onde carrexaremos sensores e programas que saiban interpretar os datos cerebrais, forma parte da tradicional achega de prognósticos de cada fin de ano. No caso de IBM, o anterior agoiro complétase con outros catro, todos eles cun maior ou menor alicerce de optimismo: a cidadanía producirá electricidade por si mesma (cousa que xa está a ver en determinadas cidades europeas, onde a xente crea luz mentres camiña sobre chans adaptados a aproveitar movemento), xa non serán precisos contrasinais para acceder a programas e sistemas (a través de tecnoloxías biométricas como a lectura do iris), a fenda dixital desaparecerá e o correo lixo converterase, por fin, en información prioritaria. Todas estas predicións están xa na rede con cadanseu vídeo explicativo, podéndose votar, no devandito blog, polas predicións que máis nos gusten.