Sdweb amosará nun curso sobre Drupal 7 a súa frutífera experiencia co xestor de contidos libre
luns, 3 de marzo do 2014
- Diego Meixeiro, de Sdweb
Sdweb Solucións
Dixitais, empresa galega centrada en desenvolvemento web e
formación- comunicación dixital, infórmanos que vén de xuntar
forzas co Colexio Profesional de Enxeñaría en Informática de
Galicia (CPEIG) para achegar unha máis que interesante actividade de
divulgación sobre Drupal 7 orientada aos nosos profesionais do
deseño de páxinas e aplicacións con coñecementos básicos no dito
paquete libre de ferramentas de xestión de contidos. O curso, do
que xa falamos os días pasados avanzando as súas liñas xerais,
responde ao interese das dúas entidades “por seguir respondendo ás
necesidades formativas do tecido empresarial tecnolóxico galego”.
O seu obxectivo, coméntanos Diego Meixeiro,
consultor especialista en Drupal e membro do equipo de
desenvolvemento web de Sdweb, é axudar aos alumnos a ter o alicerce
preciso para impulsar proxectos de comercio electrónico e redes
sociais, “así como optimizar o rendemento de portais baseados en
Drupal 7”.
Como dixemos, a empresa Sdweb é a responsábel de
impartir esta formación na que “ademais de coñecementos teóricos
afondarase na propia experiencia práctica como de Sdweb empresa
punteira na implantación de Drupal en grandes e pequenas
organizacións, así como no desenvolvemento de proxectos de comercio
electrónico e redes sociais baseados neste CMS”.
Este curso celebrarase na cidade da Coruña do 21 ao
29 de marzo cunha duración total de 20 horas, distribuídas en 4
xornadas. O número de prazas dispoñíbeis é de 25. As
persoas que desexen participar poderán inscribirse na web do CPEIG.
O custo da actividade é de 95 € para membros do colexio,
colexiados e precolexiados, e aqueles “non membros” con
compromiso de colexiación ou precolexiación; e de 190 € para “non
colexiados”. Como dixemos, o encargado de impartir as diferentes
sesións e obradoiros é Diego Meixeiro, que xa ten unha longa
experiencia, xunto con Sdeweb, en importantes proxectos de
desenvolvemento para clientes como Anaya, Novagalicia Banco, Xunta de
Galicia, Universidade de Barcelona ou Universidade de Santiago de
Compostela.