Sanidade fai unha nova aposta pola saúde en liña
luns, 19 de xullo do 2010
A Consellería
de Sanidade, na súa teima por levarlle á cidadanía as máis modernas ferramentas
para acceder á saúde en liña e atallar os seus trámites con esta entidade
pública da maneira máis eficaz, vén de por en marcha un novo servizo telemático
que lle permite tódolos galegos e galegas o acceso ao Rexistro dos Centros,
Servizos e Establecementos Sanitarios da nosa Comunidade Autónoma.
Este novo
servizo do departamento que dirixe Pilar Farjas Abadía facilita, de maneira doada
e rápida, información á poboación relativa ao estado actual das autorizacións
dos centros sanitarios, servizos e establecementos, así como da oferta
asistencial que teñen autorizada.
Xa que logo, na
páxina web do Servizo Galego de Saúde, no
apartado Buscador de centros, a
cidadanía ten acceso dende agora a consultar, en tempo real, a información dos
centros sanitarios galegos, tanto públicos como privados, que constan no
Rexistro dos Centros, Servizos e Establecementos Sanitarios da Comunidade
Autónoma de Galicia.
Asemade, pódense
realizar consultas dos centros autorizados seguindo diferentes criterios de
selección, tales como a tipoloxía do centro, a oferta asistencial, a
titularidade, os datos de localización... estes últimos permiten escoller entre
localizar os centros mediante o enderezo postal ou mediante a visualización da
situación nun mapa, que remite ó internauta ó seu emprazamento exacto no
rueiro.
Sanidade
considera que este avance na modernización tecnolóxica da información, “ten grandes vantaxes para todos os galegos
e galegas” e, ademais, continúan, “vai
incidir, de xeito especial, nun achegamento do Sistema de Saúde á cidadanía, de
xeito especial no que atinxe ao seu funcionamento administrativo”.