Sanidade expón en Madrid as vantaxes da saúde en liña galega
mércores, 30 de xuño do 2010
A conselleira
de Sanidade Pilar Farjas Abadía, non puido ocultar hoxe a súa satisfacción ao
anunciar, durante unha mesa redonda sobre as TIC celebrada en Madrid, que “actualmente 286 centros de saúde emiten
receitas electrónicas en Galicia e hai 1.233 farmacias conectadas que as
utilizan”.
Isto supón que
o 71 por cento da cidadanía estase a beneficiar xa das vantaxes da e-receita, dahí que a titular da
carteira sanitaria da Xunta non repare en dar datos que confirman o bo estado
da sanidade en liña galega.
Así, fixo
referencia ás características da sociedade galega, da que sinalou que a quinta
parte ten máis de 65 anos –porcentaxe que tende a aumentar- e na que se está
incrementando a proporción de pacientes pluripatolóxicos e con enfermidades
crónicas, polo que se prevé un aumento da frecuentación.
Polo tanto,
dixo, “para adaptarse e dar resposta ás novas
necesidades dos seus cidadáns, Galicia require a modernización do seu sistema
sanitario, debido á permanente innovación tecnolóxica e de medicamentos, á crecente
frecuentación e demanda de servizos sanitarios, ao aumento de procedementos e á
complexidade das patoloxías que se abordan”.
Asemade,
engadiu, “no último ano, case a metade da
poboación foi a máis dun centro de saúde beneficiándose, deste xeito, dunha
historia clínica electrónica única”, destacou Pilar Farjas, afirmando tamén
que a dixitalización supón unha maior eficiencia nos recursos e na atención,
como amosa o feito de que o número de visitas administrativas que realizan os
pacientes aos centros de saúde unha vez que as farmacias están dixitalizadas
pasou dun 25 por cento a valores por debaixo do 13 por cento.
Na súa
intervención na mesa, Farja Abadía engadiu que “grazas á dixitalización do diagnóstico por imaxe tense reducido un 60
por cento o custe respecto ao modelo tradicional de impresión de placas, e que os
sistemas electrónicos de prescrición axudan a promover a utilización de
medicamentos xenéricos ou de marca de menor prezo”.
A conselleira
sinalou que, o pasado ano, realizáronse máis de 14 millóns de accesos de
profesionais sanitarios a IANUS, e explicou que están integrados nela todos os
hospitais da rede do Sergas -aos que hai que sumar dous hospitais concertados-
e 420 centros de saúde (o 90 por cento da poboación). A finais do pasado ano
2009, estaban formados e acreditados para utilizar a IANUS o 90 por cento dos
facultativos de Atención Especializada e o 96 por cento dos de Atención
Primaria; así como o 60 por cento dos sanitarios non facultativos dos dous
niveis.
Tamén fixo
referencia á implantación da Plataforma Diagnóstica Integral en
Radiodiagnóstico, ao desenvolvemento da Administración electrónica como
elemento fundamental para a modernización do funcionamento do sistema sanitario
e á implantación da central de chamadas única para toda Galicia, que unifica o
acceso telefónico a toda a Comunidade por igual.
Para concluir,
tamén fixo referencia á plataforma de formación a distancia, á Escola Galega de
Saúde para Cidadáns e á plataforma Bibliosaúde, dispoñible tanto en Internet
como na Intranet e que o pasado ano recibiu máis de 54.000 visitas.